Luk 11 - Ȧŋlemrȧnɛ Ȧfu

¹ Ka pə re yi ma ɔ bɔ ramnɛ ka ɔdɛr ulɔm, ma ɔ poŋ-e, ukin ka aŋkarande ŋɔŋ ɔ pa ro ŋɔŋ, Mariki thəksa su tə kəramnɛ mɔ mə Yɔnȧŋ ɔ thəksa aŋkarande ŋɔŋ.

² kɔ pa ro ŋaŋ, Ma nə ramnɛ-e, pa nu, ƆKas kȧsu ɔwe yi ro riyana, ta ȧŋes a mu aŋ yi asəm. Ta rȧbȧy ra mu rə bek. Ta mȧselɔ ma mu mə yɔnɛ nɔru mɔ mȧ mə yɔnɛ ro riyana.

³ Yer su thonɔŋ ɛdi ɛbeki su,

⁴ ɔwa tera su maləs ma su kotȧy-e saŋ sɔ sə tera ŋaŋ bɛ aŋa yɔ su ɔləs. Te su wɔŋȧ rə tȧy ta məgbɔns, kɛrɛ wurɔ su ka mȧtȧy mələs.

⁵ kɔ pa ro ŋaŋ, Kanɛ ka nu ɔwe ba uyathki, mɔ kɔ ro rɔŋɔŋ kəren datɔŋ, mɔ yif kɔ, Yathki, bɔ mi təbo təsas,

⁶ kotȧy-e, uyathki kȧmi ɔ yi rə ȧbiyas, kɔ po der ro rɔmi, ɔwa i ba hɛ koko tə kəsɔŋ kɔ tə kədi.

⁷ Ɔwa kɔnɔ ɔwe yi ka ȧŋseth rokor ɔ tə wosa kəpa, Te mi sɔmpa. A po kantha kadare, ɔwa aŋfɛth a mi aŋ yi rɛ yi minɛŋ ro fənt. I gbəli hɛ yokanɛ tə kəsɔŋ mu ti.

⁸ I kanɛ nu, Hali ɔ selɔ hɛ yokanɛ tə kəsɔŋ kɔ pəkasifɛ ɔ yi ɔyathki kɔŋ-e, kɛrɛ salata kakithinɛ kɔŋ, ɔ tə yokanɛ tə kəsɔŋ amɔlɔ mɔ yema.

⁹ Ɔwa i pa ro rɔnu, Yif, ɔwa a ba tə kəsɔŋ nu ti; thɛns, ɔwa nə tə fir; gbȧtgbȧt, ɔwa a tə kanthɛ nu.

¹⁰ kotȧy-e wuni o wuni ɔwe mə yif, ɔ tə sɔthɔ; ɔwe mə thɛns ɔ tə fir; ɔwa ɔwe mə gbȧtgbȧt, a tə kanthɛ kɔ.

¹¹ Ukas ureke kətɔŋ ka nu-i, bepi ɔwan kɔŋ ɔ yif kɔ ta kəbo-e, ɔ tə sɔŋ kɔ asar-e? Thalɔm bepi ɔ yif ta kəlop-e, ɔwa kɔnɔ-e, ta kəlop, ɔ tə sɔŋ kɔ ȧbok-i?

¹² Thalɔm bepi ɔ yif ta rəmɛs-e, ɔ tə sɔŋ kɔ ukulis-i?

¹³ Bepi naŋ, ma nə yi aləs-e, nə tȧrȧ tə kəsɔŋ ɛboya ɛfinɔ ka aŋwuth a nu-e, thamsinɛ ɔKas ka nu ɔwe yi ro riana-e, ɔ tə sɔŋ ɔYina məsəm ka ŋaŋ aŋa mə yif kɔ-i?

¹⁴ Ɔwa, ɔ bɔ wurɔ ukərəfi ka kəbobo. Ka pə re yi ma ɔkərəfi ɔ wur-e, kabobo ɔ fɔf, ɔwa aŋfəm bɛ aŋ kabanɛ.

¹⁵ Kɛrɛ afəm alɔm aŋ pa, Ɔ wurɔ akərəfi ka aŋfɔsɔ ŋa Biyɛlsibɔb, ɔbȧy ka aŋkərəfi.

¹⁶ Ɔwa alɔm-e, maŋ yema mɛm kɔ-e, aŋ yif kɔ ta amisali kəwur ro riyana.

¹⁷ Kɛrɛ kɔnɔ, ma ɔ tȧrȧ ɛnanɛ yaŋ-e, ɔ pa ro ŋaŋ, Rəbȧy o rəbȧy bepi məputhanɛ mə wɔŋ di-e, rə tə sakthɛ; bepi məputhanɛ mə wɔŋ rə aseth-e, ȧŋseth ŋati aŋ tə fumpɔ.

¹⁸ Bepi Sethani sɔ ɔ timnɛ-e, to rȧbȧy rɔŋ mə rə gbəli təma-e? kotȧy-e nə pa i wurɔ akərəfi ka aŋfɔsɔ ŋa Biyɛlsibɔb.

¹⁹ Ɔwa bepi i wurɔ akərəfi ka aŋfɔsɔ ŋa Biyɛlsibɔb-e, ka aŋfɔsɔ ŋa kanɛ aŋwuth a nu aruni mə aŋ wurɔ ŋa-e? Tiyȧŋ ŋaŋ gbeŋ aŋ tə gbəka nu ȧŋpa.

²⁰ Kɛrɛ bepi minɛ i wurɔ akərəfi yi aŋsəl ŋa Kuru-e, pə yi kəpa rȧbȧy ra Kuru rə po der ro rɔnu.

²¹ Bepi wuni bȧk mədɛr ɔ wɔŋ ɛyɛt ɛtima-e, ɔ bumər ȧŋseth ŋɔŋ-e, ɛyɛt yɔŋ ɛ tə tiyȧ yi məthɔfəl;

²² kɛrɛ bepi ulɔm ɔ der ɔwe ba afɔsɔ athasi kɔ-e, ɔ tham kɔ, ɔ tə nɔy kɔ ɛyɛt yɔŋ ɛtima bɛ ɛyɛ ɔ sɛlinɛ, ɔ tə yerəs ɛyɛt ɛluk yɔŋ.

²³ Kɔn ɔwe te yi ta ȧtȧ mi ɔ yi utheranɛ kȧmi; ɔwa kɔnɔ ɔwe te mar mi tə kəthonkla-e, ɔ sakthi.

²⁴ Bepi ukərəfi uləs ɔ po wur rə wuni-e, ɔ tə kɔth ro dɛr rə mȧnt mə te yi kȧmȧ ɔ thɛns kəfothanɛ; ma ɔ te fir ki-e, ɔ pa, I ti kȧlanɛ ka ȧŋseth a mi ro i wur-e,

²⁵ Ɔwa ma ɔ bek-e, ɔ bəp ŋi agbal yi ayesi.

²⁶ Ɔwa ɔ kɔnɛ, ɔ gbasi akərəfi tȧmthədɛrəŋ alɔm aləs athasi kɔ, kaŋ wɔŋ aŋ yirȧ ri; ka mayi mələpsɔ ma ɔlaŋgba kati mə yi mələs məthasi matɔtɔkɔ.

²⁷ Ma Yisɔsȧŋ ɔ fɔf mȧtȧy ame-e, wuni bom ulɔm ka ȧruniya ɔ ŋata ȧrim rɔŋ, ɔ pa ro ŋɔŋ, Kor ka aruba kaŋ ȧke kom mu, yi aŋmȧsȧ ȧme mə mȧsȧ-e.

²⁸ Kɛrɛ kɔnɔ ɔ pa, Ŋa tha ba aruba aŋa təl ȧrim ra Kuru-e ɔwa aŋ wop ri.

²⁹ Ma ȧsuniya tə gbanɛ ro ŋɔŋ-e, ɔ təp kəpa, Rakomra are rə yi rələs, rə thɛns amisali, kɛrɛ aŋ ba hɛ tə kəsɔthɔ amisali thambe ȧŋmisali ŋa Yona.

³⁰ kotȧy-e mɔ mə Yona ɔ səkɛ amisali ka aŋNinifɛ-e, yaŋ sɔ ɔWan ka wuni ɔ tə yi amisali ka rȧkomra are.

³¹ Ɔbȧy ubɛra ka aŋdiɔ ɔ tə yokanɛ ka ȧŋlɔkɔ ŋa karɔk ɛpa yi aŋfəm ŋa rȧkomra are, ɔ tə sɔŋ ŋa mətheri, kotȧy-e kɔnɔ ɔ der kəwur ka ɔthalnɛ wa ȧdȧru tə kətəl kȧtemp ka Sɔlɔmɔn; ɔwa kəla, ubana uthasi Sɔlɔmɔn ɔ yi anɔ.

³² Aŋfəm ŋa ro Ninibɛ aŋ tə təmȧ ka ȧŋlɔkɔ ŋa karɔk ɛpa yi rȧkomra are ɔwa aŋ tə sɔŋ di mətheri, kotȧy-e aŋ thupi ka ȧkɛra ka Yona; ɔwa kəla, ubana uthasi Yona ɔ yi anɔ.

³³ Wuni o wuni bepi ɔ moth amotha-e, ɔ bot hɛ ŋi dɛr ɔmaŋknɛ thalɔm rə ȧthunthȧ rata, kɛrɛ ɔ tə bot ŋi rȧ ɔtəmər, kȧmȧ ŋaŋ aŋa mə wɔŋ ri aŋ nənk kawalɛ.

³⁴ ȧŋmothȧ ŋa aŋdɛr a mu aŋ yi rafɔr ra mu. Tiyȧŋ bepi rafɔr ra mu rə yi rəfinɔ, aŋdɛr a mu bɛ aŋ la ɔwaŋ; kɛrɛ bepi rə yi rələs-e, aŋdɛr a mu aŋ la asum.

³⁵ Tiyȧŋ kəli bepi ȧŋmothȧ aŋa yi mu rokor aŋyi hɛ asum.

³⁶ Bepi aŋdɛr a mu aŋla ɔwaŋ-e mə ba hɛ asum hali, mə tə la ɔwaŋ bɛ, mɔ mə amotha aŋ gbɛntha aŋ sɔŋ mu ɔwaŋ.

³⁷ Ma ɔ bɔ fɔf-e, uFarisi ɔ muti kɔ tə kədi yi kɔnɔŋȧŋ, kɔ wɔŋ, ɔ yirȧ tə kədi.

³⁸ Ma ɔFaresi ɔ nənk ti, ɔ kabanɛ ta ma ɔ te mɔtha yanɛ.

³⁹ Ka ɔMarki ɔ pa ro ŋɔŋ, Naŋ naŋ aFaresi nə fethər ampɔthi yi ȧŋbɔl romuth, kɛrɛ rokor ka nu nə la kansoŋ yi mələs.

⁴⁰ Naŋ apənk, kɔnɔ ɔwe bɛmpa romuth ɔ bɛmpa hɛ sɔ rokor-i?

⁴¹ Sɔŋ ta ɛboya ɛyɛt ɛyɛ yi rokor, ɔwa kəla, yɛt bɛ ɛ tə yi ɛgbəraŋ ro rɔnu.

⁴² Mɔnɛ ro nu, nia aFaresi! kotȧy-e nə sɔŋ ɛyaka ya ɛnana yi ɛru yi ɛbuma o buma, kɛrɛ nə painɛ kagbək ɛpa ɔlompi yi mabɔthər ma Kuru. Mȧtȧy ame nə yi tə kəyɔ, ɔwa te nu tey tə kəyɔ malɔm sɔ.

⁴³ Mɔnɛ ro rɔnu, naŋ aFaresi! kotȧy-e, nə bɔthər tawaŋ tətɔtɔkɔ ka ɛseth ɛgbanɛ yi ɛkori ka ɔdɛr ɔthila.

⁴⁴ Mɔnɛ ro rɔnu naŋ akarmɔkɔ yi aFaresi, amunafaki! Ȧtesoma-e nə yi mɔ taboma təmaŋknɛ, ɔwa aŋfəm aŋa kɔth rokɔm kati aŋ tɛ hɛ ti.

⁴⁵ Ukin ka aŋtara ɛthɔ ɔ lasi ɔ pa, Karmɔkɔ, ma mə fɔf ȧte-e, mə sambos su sɔ.

⁴⁶ Ka Yisɔs ɔ pa, Naŋ aŋtȧrȧ aŋthɔ, mɔnɛ ro rɔnu sɔ! Ȧtesoma-e nə sɔŋ aŋfəm tothe təlel, kɛrɛ naŋ nə gboŋ hɛ atothe tati, hali rə ȧsəl a nu ŋin.

⁴⁷ Mɔnɛ ro rɔnu! kotȧy-e naŋ nə bɛmpa taboma ta aŋnabi, ɔwa aŋkas a nu aŋ dif ŋa.

⁴⁸ Tɛntɛnɛ nə seri kəpa nə selɔ ta mȧyɔs ma aŋkas a nu; pəkasifɛ ŋa po dif ŋa, ɔwa naŋ nə bɛmpa taboma taŋ.

⁴⁹ Tiyȧŋ kȧtemp ka Kuru kə pa, I ti somra ŋa anȧbi yi asom; aŋ tə dif alɔm, aŋ tə sɔmpa alɔm,

⁵⁰ kȧmȧ a kɔpra ka rȧkomra are mȧtir ma aŋnabi bɛ ama a loŋ kȧbi ka kabot ɔtəmər wa ȧdȧru,

⁵¹ kətəp ka mȧtir ma Ebɛl haŋ ka mȧtir ma Sakaraya ɔwe a dif kətɔŋ ka ȧŋbɛsɛ yi ȧŋseth ŋa Kuru. Tɛntɛnɛ i kanɛ nu, a tə kɔpra ma ka rȧkomra are.

⁵² Mɔnɛ ro rɔnu na aŋtȧrȧ aŋthɔ, ma nə po nɔy aŋsapɔ ŋa kətara tȧy! Nan nə wɔŋ hɛ, ɔwa nə bɛnt ŋaŋ aŋa yema wɔŋ.

⁵³ Ma Yisɔs ɔ wur-e, aŋkarmɔkɔ yi aŋFarisi aŋ gbɛtənɛ kɔ kȧmȧ ɔ fɔf ta mȧtȧy məgbathi;

⁵⁴ aŋ səth kɔ kȧmȧ aŋ gbəli wop ȧtȧ ɔ pa tə kəgbanthir kɔ.