Luk 10 - Ȧŋlemrȧnɛ Ȧfu

¹ Kədarəŋ ka mȧtȧy ame ɔMarki ɔ thith akarande alɔm sɔ, təgba təsas tɔfɔt, kɔ som ŋa ŋarəŋ ŋarəŋ tə kətəma kɔ kədi rə kəpet o kəpet yi rə dɛr o dɛr ro kɔn kɔnɔnɛ ɔ ba kəkɔ.

² kɔ pa ro rɔŋaŋ, Karɔk kə bana kɛrɛ aŋrɔk a than. Tiyȧŋ nɛmthɛnɛ nu ɔMarki ka karɔk kȧmȧ ɔ somra arɔk ka karɔk kɔŋ.

³ Kɔnɛ nu. Kəla i som nu mɔ təlɔmɛ təfɛth kətɔŋ ka tathɔlu.

⁴ Te nu keranɛ abuthu-o, agbaŋfa-o, thalɔm ɛkɔftha. Ɔwa te kori wuni o wuni ro roŋ.

⁵ Rə aseth o seth mə nə wɔŋ-e, mɔtha pa, Ta məthɔfəl mə yi ka ȧŋseth aŋe.

⁶ Ɔwa bepi uwan ka məthɔfəl ɔ yi ri-e, mathɔfəl ma nu mə tə rensa kɔ, kɛrɛ bepi ɔ yi hɛ ri-e, mə tə kȧl ro rɔnu.

⁷ Tia nu ka ȧŋseth ŋati, di ɔwa mun ɛyɛt ɛwunɔŋ ɛyɛ mə a sɔŋ nu, kotȧy-e ɔyɔ məpanth ɔ mari tə kəsɔthɔ ȧŋrȧm ŋɔŋ. Te nu tepnɛ tepnɛ ɛseth.

⁸ Rə kəpet o pet nə wɔŋ-e, bepi a malanɛ nu-e, di nu ɛyɛt ɛwunɔŋ ɛyɛ mə a təməra nu.

⁹ Ɔwa yenkəs aŋtui aŋa yi ri, tɔri ŋa kəpa, Rȧbȧy ra Kuru rə po nu fat.

¹⁰ Kɛrɛ rə kəpet o pet mə nə wɔŋ-e, bepi aŋ te malanɛ nu-e, wur nu rokaŋ kati, ɔwa pa nu,

¹¹ Hali kabof ka kȧpet ka nu ȧke gbapsa ȧtȧtək ta su, sə nasi ki; kɛrɛ tȧrȧ nu kəpa, tɛntɛnɛ rȧbȧy ra Kuru rə po nu fat.

¹² I kanɛ nu, Pə tə yi ɔfisa ta Sɔdɔm ka ȧŋrey ŋati pəthasi kȧpet kati.

¹³ Mɔnɛ ro mu, Korasin! Mɔnɛ ro mu Bɛthsayda! kotȧy-e bepi mȧyɔs məkabanɛ ama a yɔ kətɔŋ ka nu mə po yɔnɛ ro Tair yi ro Sidon-e, aŋ tə po thupi ɔwoni, kəyira rə kotha kəkasa yi rə ros.

¹⁴ Kɛrɛ pə tə yi ɔfinɔ ta ro Tair yi ro Sidon ka karɔk ɛpa, pəthasi ta ȧtȧ nu.

¹⁵ Ɔwa munɔ, Kepaniyɔm, mə tə ŋatanɛ ro riana-i? A tə thora mu ro kərəfi.

¹⁶ Ɔwe mə təlȧ nu ɔ təlȧ mi, ɔwa ɔwe mə pɛnsa nu ɔ pɛnsa mi sɔ. Ɔwa ɔwe mə pɛnsa mi ɔ pɛnsa kɔnɔ ɔwe som mi.

¹⁷ Ma aŋkarande təgba təsas tɔfɔt aŋ kalanɛ-e, aŋ pa yi məbɔnɛ, Pa, hali aŋkərəfi aləs aŋ sanɛ ro rɔsu ma sə bont ȧŋes a mu.

¹⁸ kɔ pa ro ŋaŋ, I nənk Sethani ɔ fumpɔ mɔ ɔnakthinɛ kəwur ka ȧkuru.

¹⁹ Ɔwa i po sɔŋ nu afɔsɔ tə kənas ɛbok yi atulis, dɛ yi kətham rokɔm ka aŋfɔsɔ bɛ ŋa ɔtheranɛ; ɔwa koko bɛ rə gbəli hɛ yɔ nu ɔbaŋ.

²⁰ Kɛrɛ te ti ba məbɔnɛ ta ma nə po tham aŋkərəfi, kɛrɛ ta pə bɔnɛ nu pəkasifɛ a po gbal ames ma nu ro riyana.

²¹ Ȧŋlɔkɔ ŋati ɔYina məsəm ɔ lasər Yisɔsȧŋ yi məbɔnɛ, kɔ pa, I mɔmɔ mu ɔKas, ɔMarki ka ro riyana yi ȧdȧru, ma mə po maŋk mȧtȧy ame ka aŋtempi yi aŋtara tȧy, ɔwa mə tɔri ma ka aŋfɛth. Yao ɔKas pəkasifɛ ame mə yi mȧselɔ ma mu.

²² ƆKas kȧmi ɔ po maŋkər mi mȧtȧy bɛ, ɔwa wuni o wuni ɔ tȧrȧ hɛ ɔWan thambe ɔKas; yi ɔ tȧrȧ hɛ ɔKas thambe ɔWan yi kɔnɔ ka ɔwe ɔWan mɔ ŋaibia kɔ.

²³ Ka Yisɔsȧŋ ɔ fəlɛ ka aŋkarande, kɔ pa ro rɔŋaŋ sɔy, Aruba aŋ yi ka ɛfɔr ɛyɛ nənk mȧtȧy ama naŋ nə nənk,

²⁴ kotȧy-e i kanɛ nu anȧbi yi abȧy agbȧthi aŋ fela tə kənəŋk mȧtȧy ama naŋ nə nənk, kɛrɛ aŋ nənk hɛ ma. Ɔwa tə kətəl mȧtȧy ama naŋ nə təl, kɛrɛ aŋ təl hɛ ma.

²⁵ Ɔwa kəla ukarmɔkɔ ka aŋthɔ ɔ yokanɛ, ɔ mɛm Yisɔsȧŋ ɔ pa, Karmɔkɔ, to mə i yɔ kȧmȧ i sɔthɔ aŋesəm thəbana-e?

²⁶ kɔ pa ro ŋɔŋ, To a gbal ka aŋthɔ-e? To mə karaŋ ri-e?

²⁷ kɔ wosa ɔ pa, Ta mə bɔthər ɔMarki ɔKuru ka mu yi ȧŋmerȧ a mu bɛ, yi aŋesəm a mu bɛ, yi aŋfɔsɔ a mu bɛ, yi aŋnanɛ a mu bɛ; ɔwa ɔfatanɛ ka mu sɔ mɔ mȧ mə bɔthərnɛ.

²⁸ Ka Yisɔsȧŋ ɔ pa ro ŋɔŋ, Mə po gbaki ɔlompi. Yɔ ȧte, mə tə sɔthɔ aŋesəm.

²⁹ Kɛrɛ kɔnɔ, ma ɔ yema lompəsnɛ-e, ɔ yif sɔ, Kanɛ yi ɔfatanɛ ka mi-e?

³⁰ Yisɔsȧŋ ɔ lasi ɔ pa, Ulaŋgba ulɔm ɔ thor kəwur ro Yerusalɛm tə kəkɔ ro Yɛriko. Ma ɔ yi ro roŋ-e, ɔ fumpɔ ka mȧta ma aŋkey abana, kaŋ bus ȧsuma tɔŋ, aŋ sap kɔ, aŋ kɔnɛ, kaŋ tey kɔ ɔ bun fi.

³¹ Ka pə bɛŋȧnɛ ufode ulɔm ɔ thor ri; ma ɔ nənk kɔ-e, ɔ thas rolɛŋkɛn.

³² Ya pə yi sɔ uLibay, ma ɔ bek ka ɔdɛr ɔwe, ɔ kəli kɔ kɛrɛ kɔnɔ sɔ ɔ thas rolɛŋkɛn.

³³ Kɛrɛ uSamaria ulɔm, ma ɔ yi ka ȧŋbiyas ŋɔŋ-e, ɔ bek ro ɔ yi. Ma ɔ nənk kɔ-e, ȧney aŋ wop kɔ,

³⁴ kɔ der ro ŋɔŋ, ɔ sek tȧsam tɔŋ, ɔ kus ri mȧro yi məber məfɛth, kɔ reŋ kɔ ka ȧŋsoy ŋɔŋ, ɔ kera kɔ rə aseth ayiya, kɔ kəlianɛ kɔ.

³⁵ Ka rabəth rəlɔm ɔ wurɔ ɛsiliŋ yɛrəŋ, ɔ sɔŋ yi ɔkas ka ȧŋseth ayiya, ɔ pa, Kəlȧnɛ kɔ, ɔwa ara mə ləsər pəthas are, ma i kȧl der-e, i ti ram mu ti.

³⁶ Ka aŋsas aŋe-e, kanɛ mə nanɛ kəpa ɔ yi ufȧtȧnɛ ka kɔn ɔwe fumpɔ ka mȧta ma aŋkey abana-e?

³⁷ kɔ pa, Kɔnɔ ɔwe ba kɔ ȧney. Ka Yisɔsȧŋ ɔ pa Kɔnɛ, mə yɔ yaŋ.

³⁸ Maŋ kɔnɛ ka ȧŋbiyas ŋaŋ, ɔ wɔŋ ka kȧpet kəlɔm. Ka ubɛra ulɔm, ȧŋes ŋɔŋ ŋə yi Martha-e, ɔ wɔŋȧ kɔ ka ȧŋseth ŋɔŋ.

³⁹ Ɔ ba wɔnt bɛra, ȧŋes ŋɔŋ ŋə yi Meri, ɔwe yirȧ ka ȧtȧtək ta Yisɔsȧŋ, kɔ su ɛləns ka tafɔf tɔŋ.

⁴⁰ Kɛrɛ Mathaŋ ɔ ba asoli ta kəbɛnɛnɛ kəbana. Ɔ der ro ŋɔŋ, ɔ pa, Pa, tə ba hɛ mu tȧy kəpa ɔwɔnt kȧmi ubɛra ɔ tey mi son tə kəbɛnɛnɛ-i? Tiyȧŋ kanɛ kɔ kȧmȧ ɔ mar mi.

⁴¹ Ka Yisɔsȧŋ ɔ pa ro ŋɔŋ, Matha, Matha mə soli, ɔwa ȧŋmerȧ a mu aŋ sɔmpanɛ ta mȧtȧy məgbathi.

⁴² Kɛrɛ tȧy tin gbo mə paŋ, ɔwa Meri ɔ po thith ȧte yi təfinɔ, ȧtȧ mə a te kɔ nɔy.