Kȧŋȧibinɛ 9 - Ȧŋlemrȧnɛ Ȧfu

¹ Ka ɔmaleka ɔwe bekȧ tamath ɔ fɛŋ; ɔwa i nənk kɔs kɔwur ka kȧriyana kə fumpɔ ka ȧdȧru; ka a sɔŋ kɔ aŋsapɔ ŋa ȧŋbi aŋa te ba ɔthalnɛ.

² Ɔwa ɔ kanthi ȧŋbi aŋa te ba ɔthalnɛ, ka kima kə wur ka ȧŋbi mɔ akimɔ ka nȧnt nəsaŋk nə bana; ɔwa aret dɛ yi aŋfena ɛ suma salata akimɔ ȧke wur ka ȧŋbi.

³ Ka ɛlama aŋ wur ka akimɔ ka ȧŋthɔf, ka a sɔŋ ŋa afɔsɔ mɔ aŋfɔsɔ ŋa tulis ta ȧdȧru.

⁴ Ka a yamari ŋa kȧmȧ aŋ te ləsər akereŋ ka ȧŋthɔf thalɔm ɛyɛt ɛtɛp, thalɔm ŋənt o ŋənt; thambe aŋfəm son aŋa te ba ȧŋmȧthlɛ ŋa Kuru ka mabuŋ maŋ.

⁵ Aŋ yi hɛ tə kədif ŋa, kɛrɛ aŋ yi tə kəgbaŋar ŋa rə kəsɔmpa kəbana ta yof tamath; ɔwa ɔbaŋ wati ɔ yi mɔ ɔbaŋ wa kulis ma ɔ ta wuni.

⁶ Ka marei ame afəm aŋ tə thɛns rəfi, kɛrɛ aŋ ba hɛ kəfir ri; aŋ tə fela tə kəfi, kɛrɛ rəfi rə tə gbukɛ ŋa.

⁷ Ɔwa ɛlama aŋ bȧlȧnɛ mɔ təsoy aŋa yi abɛnɛnɛ tə kətim rəfa; ka tabomp taŋ aŋ ba ɛyɛ bȧlȧnɛ mɔ ɛniɔ ya məbɔŋɔ, ɔwa aser taŋ tə yi mɔ aser ta afəm.

⁸ Aŋ ba afon mɔ aŋfon ŋa afəm abom, ɔwa ɛsek yaŋ ɛ yi mɔ ɛsek ya tȧsɔyila.

⁹ kaŋ ba suma ta ro kəpəth-e, mɔ suma ta rəfat. Ȧŋsɔnkɔ ŋa ɛkufna yaŋ aŋ yi mɔ ȧŋsɔnkɔ ŋa ɛtariyɔt ɛyɛ təsoy təgbȧthi maŋ gbukɛnɛ rə kəgbuŋ tə kətim rəfȧ.

¹⁰ Aŋ ba təleŋa mɔ tulis, yi ɛsos sɔ; ɔwa aŋfɔsɔ a ŋaŋ tə kəsɔmpar afəm ta yof tamath aŋ yi ka taleŋa taŋ.

¹¹ Ɛlama aŋe aŋ ba ubȧy ɔwe yi mɔ-e ɔmaleka ka ȧŋbi aŋa te ba ɔthalnɛ, ɔwa ȧŋes ŋɔŋ ka kəHibru aŋ yi Abadɔn, kɛrɛ ka kəKrik a tela kɔ Apɔliyɔn.

¹² Ȧŋthȧlər ȧtɔtɔkɔ aŋ po thas; kəla, yɛrəŋ ras yȧ mə derȧŋ sɔ.

¹³ Ka ɔmaleka ɔwe bekȧ tamthərukin ɔ fɛŋ, ɔwa i təlȧ rim rə wur ka talɛn tanlɛ ta ȧŋbɛsɛ ŋa məbɔŋɔ rodi ka Kuru,

¹⁴ rə pa ka ɔmaleka ɔwe bekȧ tamthərukin ɔwe ba kathɛma, Səli aŋmȧleka ŋanlɛ aŋa a po sek rayɛr ka kȧbȧŋ kəbana mə a tela Ufretis.

¹⁵ Ɔwa aŋ səli aŋmȧleka ŋanlɛ aŋa a po bɛnɛ ta aŋwakathi yi ta ȧŋrey, yi ta aŋof, yi ta kȧren kati gbeŋ, kȧmȧ aŋ dif ȧgbȧp ŋin ŋa ɛgbap ɛsas ya afəm a kəpet.

¹⁶ Amɔlɔ ma atobali ta təsoy mə yi ɛwul tɔfɔt tətəp ɛwul tɔfɔt haŋ kətəma mȧrəŋ. I tɔl amɔlɔ maŋ.

¹⁷ Yaŋ i nənk tasoy ka mȧnənk mȧmi. Ŋaŋ aŋa rensa ŋa-e, aŋ ba suma ta rəfȧt ka ɛkəpət yaŋ ȧte bȧlȧnɛ mɔ nȧnt yi asafayir, yi ȧsɔlfɔ. Ɔwa tabomp ta tasoy tə yi mɔ tabomp ta tȧsɔyila, ɔwa nȧnt yi kimɔ-e, dɛ yi ȧsɔlfɔ ɛ wur ka tȧsəŋ taŋ.

¹⁸ Ka ɛyɛt ɛthȧlər ɛsas ɛye a dif ȧgbȧp ŋin ŋa ɛgbap ɛsas ya afəm, pə yi mɔ-e ka nant-e, ka akimɔ-e, dɛ yi ka ȧsɔlfɔ ɛyɛ wur ka tasəŋ taŋ.

¹⁹ Ȧtesoma-e, aŋfɔsɔ ŋa tasoy aŋ yi ka tasəŋ, dɛ yi ka taleŋa taŋ, kotȧy-e taleŋa taŋ tə yi mɔ ɛbok, ɔwa aŋ yɔ ɔbaŋ rɛ tabomp taŋ.

²⁰ Aŋfəm a kəpet alɔm aŋa te fi ka ɛfithina ɛye, aŋ thupi hɛ ka ɛyɛt ɛyɛ aŋ po bɛmpanɛ ka mȧta maŋ, ɔwa aŋ gbapɛ hɛ kabȧtho ka aŋkərəfi, yi ɛrɔŋ ya məbɔŋɔ, yi akala ȧferȧ, yi akɛm, yi ȧsar, dɛ yi kənt, ɛyɛ te gbəli nənk thalɔm ɛ təl, thalɔm ɛ kɔth.

²¹ Aŋ thupi hɛ ras ta mȧdif maŋ, thalɔm ta mȧthupəs maŋ, thalɔm ta marəp maŋ, ta a pa ras ta takey taŋ.