Kȧŋȧibinɛ 8 - Ȧŋlemrȧnɛ Ȧfu

¹ Ma kaLɔmɛ kəfɛth ɔ po kanthi ȧŋmȧthlɛ aŋa bekȧ tamthədɛrəŋ-e, pə taŋk yeŋ ro riyana ta ahawa ratɔŋ.

² Ɔwa i nənk aŋmȧleka tȧmthədɛrəŋ aŋa təmȧ rodi ka Kuru, ka a sɔŋ ŋa təthɛma tȧmthədɛrəŋ.

³ Ka umȧleka ulɔm ɔ der kɔ təmȧ ka ȧŋbɛsɛ, ɔ wop alaŋka ŋa məbɔŋɔ; ɔwa a sɔŋ kɔ agboŋgbo afɔlfɔl agbȧthi kȧmȧ ɔ kulunɛ ŋi yi taramnɛ ta aŋfəm asəm bɛ rokɔm ka ȧŋbɛsɛ ŋa məbɔŋɔ aŋa yi rodi ka kawaŋ ka rȧbȧy.

⁴ Ɔwa akimɔ ka aŋgboŋgbo kə ŋat rodi ka Kuru rɛ yi taramnɛ ta aŋfəm ŋɔŋ asəm kəwur ka kȧta ka umȧleka.

⁵ Ka ɔmaleka ɔwe ɔ gbasi aŋlaka, kɔ lasər ŋi yi nȧnt na ȧŋbɛsɛ, kɔ kus ni ka ȧdȧru. Ɔwa sim tə wur, yi sɛŋ, yi ɔnakthinɛ ɔbana, ka ȧŋthɔf aŋ tən gbər.

⁶ Ka aŋmȧleka tȧmthədɛrəŋ aŋa ba təthɛma tȧmthədɛrəŋ aŋ bɛnɛnɛ tə kəfɛŋ.

⁷ Ɔmaleka utɔtɔkɔ ɔ fɛŋ, ka kɔm kətɔs yi nȧnt nəkulunɛ yi mətir, ɛ thor ka ȧdȧru, ka ȧgbȧp ŋin ŋa ɛgbȧp ɛsas ya ȧdȧru, dɛ yi ȧgbȧp ŋin ŋa ɛgbȧp ɛsas ya yint ɛ fey, ɔwa akereŋ kəŋeseŋ bɛ kə fey.

⁸ Ɔmaleka ɔwe bekȧ ŋarəŋ ɔ fɛŋ; ka pə bȧlȧnɛ mɔ-e kȧteŋ kəbana, ȧke mara rɛ yi nȧnt, a fitha ki ro bȧŋ ratɔŋ; ka ȧgbȧp ŋin ŋa ɛgbap ɛsas ya kȧbȧŋ kəbana aŋ səkɛ mətir.

⁹ Ka ȧgbȧp ŋin ŋa ɛgbap ɛsas ya ɛyɛt ɛtəpi ɛyɛ ba aŋesəm ro bȧŋ, aŋ fi. Ɔwa sɔ-e, ȧgbȧp ŋin ŋa ɛgbap ɛsas ya tȧbil aŋ dinɛ.

¹⁰ Ɔmaleka ɔwe bekȧ asas ɔ fɛŋ; ka akɔs kəbana kə fumpɔ kəwur ka kȧriyana, kə mara mɔ kulɛ, ɔwa kə fumpɔ ka ȧgbȧp ŋin ŋa ɛgbap ɛsas ya taboŋ dɛ yi tafɔr ta mȧnt.

¹¹ Aŋes ŋa akɔs aŋ yi Roŋkəth; ka ȧgbȧp ŋin ŋa ɛgbap ɛsas ya ȧmȧnt mə səkɛ məroŋkəth; ɔwa afəm alai aŋ fi maŋ mun ȧmȧnt mati, pəkasifɛ a po roŋkəthəs ma.

¹² Ɔmaleka ɔwe bekȧ ŋanlɛ ɔ fɛŋ, ka ȧranka aŋ fumpɔ ka ȧgbȧp ŋin ŋa ɛgbap ɛsas ya aret, yi ȧgbȧp ŋin ŋa ɛgbap ɛsas ya aŋof, dɛ yi ȧgbȧp ŋin ŋa ɛgbap ɛsas ya atɔs; kȧmȧ ȧgbȧp ŋin ŋa ɛgbap ɛsas yati ɛ biyȧ, pə yi rəyaŋ-o, thalɔm tȧtȧk.

¹³ Ka ȧŋlɔkɔ ŋati i kəli, ka i nənk agboyo ɔ fal ka kȧriyana kɔ fɔf rə rim rəbana, Mɔnɛ-o, mɔnɛ-o, mɔnɛ-o ta aŋfəm aŋa yi ka ȧdȧru asabu ŋa ȧsim ta tathɛma ta aŋmȧleka asas aŋa ba ras tə kəfɛŋ!