Kȧŋȧibinɛ 4 - Ȧŋlemrȧnɛ Ȧfu

¹ Kədarəŋ kati i kəli, ka i nənk kədare kə kanthɛ ro riyana, ɔwa ȧrim ara i mɔtha təl rə bȧlȧnɛ mɔ kəthɛma ȧke bɔ fɔfȧnɛ mi, kəpa ye, Der ŋat anɔ, i ti tɔri mu mȧtȧy ama ba tə kəder.

² Ka ɔlɛmp wati i lasǝrnɛ ɔYina, ka i nənk kawaŋ ka rȧbȧy ro riyana, ɔwa Wuni kin ɔ yirȧ ka kawaŋ kati,

³ ɔwa, kɔn ɔwe yirȧ ri-e, ɔ bȧlȧnɛ mɔ masar ama a tela yaspa dɛ yi asardius; ka abənt afarma aŋ gbətɔ kawaŋ ka rȧbȧy aŋa bȧlȧnɛ mɔ aŋsar mə a lei ɛmɛrald.

⁴ Ɔwa təwaŋ kəgba tanlɛ tə gbətɔ kawaŋ ka rȧbȧy, ka i nənk abȧki kəgba ŋanlɛ aŋ yirȧ ri-e, aŋ lopra suma təfera, kaŋ sara ɛniɔ ya məbɔŋɔ.

⁵ Ɔwa ɔnakthinɛ, dɛ yi sɛŋ, dɛ yi sim tə wur ka kawaŋ ka rȧbȧy, ka təmulɛ tȧmthədɛrəŋ tə mara rodi ka kawaŋ ka rȧbȧy, ȧtȧ yi mɔ ɛyina tȧmthədɛrəŋ ya Kuru Məsaba.

⁶ Ɔwa kəbaŋ ka ɛmɛmnɛ mɔ kristal kə yi rodi ka kawaŋ ka rȧbȧy. Ɔwa ɛwuka akəli ŋanlɛ aŋ yi kətɔŋ ka kawaŋ, dɛ yi ȧgbȧp o gbap ŋa kawaŋ-e, kaŋ la yi ɛfɔr rodi yi rodarəŋ.

⁷ Ɔwuka utɔtɔkɔ ɔ yi mɔ ȧsɔyila, ɔwe bekȧ ŋarəŋ ɔ yi mɔ athura, ɔwe bekȧ asas ɔ ba der mɔ wuni, ɔwa ɔwe bekȧ ŋanlɛ ɔ yi mɔ agboyo ufȧl.

⁸ Ka ɛwuka ŋanlɛ aŋe aŋ ba kin o kin ɛkufna tȧmthərukin, kaŋ la sɔ ɛfɔr rokor-e, ɔwa pali gbɛs aŋ fothanɛ hɛ tə kəpa, Ɔsəm, ɔsəm, ɔsəm, ɔMarki Kuru ka aŋfɔsɔ bɛ, ɔwe la yi, ɔwe yi, dɛ yi ɔwe ba tə kəder.

⁹ Ma ɛwuka ŋanlɛ aŋ sɔŋ ayiki-e, yi kəthɔkəs, yi mɔmɔ ka ɔwe yirȧ ka kawaŋ ka rabȧy-e, ɔwe yi haŋ thȧnkȧŋ thəbana-e,

¹⁰ aŋbȧki kəgba ŋanlɛ aŋ fumpɔ rodi ka kɔn ɔwe yirȧ ka kawaŋ ka rabȧy-e, ɔwa aŋ thɔkəs kɔn ɔwe yi thȧnkȧŋ thəbana, kaŋ fitha ɛniɔ yaŋ rodi ka kawaŋ-e, kaŋ pa,

¹¹ Munɔ ɔMarki Kuru mə yi ubeki tə kəsɔthɔ ayiki, yi kəthɔkəs, dɛ yi afɔsɔ; kotȧy-e munɔ mə po bɛmpa ɛyɛt bɛ, ɔwa salata mabɔnɛ ma mu ɛyɛt bɛ ɛ yi, tȧsom a la bɛmpa yi.