Kȧŋȧibinɛ 3 - Ȧŋlemrȧnɛ Ȧfu

¹ Gbal ka ɔkəlianɛ ka aŋchɔch ŋa ro Sadis kəpa ye. Kɔn ɔwe ba ɛYina tȧmthədɛrəŋ ka Kuru dɛ yi atɔs tȧmthədɛrəŋ ɔ pa, I tȧrȧ mȧyɔs ma mu tə kəyi mə ba ŋes kəpa mə yi ukəli, kɛrɛ mə yi ufi.

² Bumnɛ, ɔwa bȧksər mȧtȧy ama tiyȧ, ama yema tə kəfi; kotȧy-e i fir hɛ mapanth ma mu məgbenthis rodi ka ɔKuru kȧmi.

³ Tiyȧŋ nanɛ to mə po sɔthɔ dɛ yi to mə po təl. Ba ti ro mera, ɔwa thupi thɔŋ. Bepi mə bumnɛ hɛ-e, i ti der do rɔmu mɔ ukey, ɔwa mə gbəli hɛ tȧrȧ ȧŋlɔkɔ mə i der tə kəthoŋkas mu.

⁴ Kɛrɛ mə ba afəm athȧn hali ro Sadis aŋa te tha nɔkɔs ȧsuma taŋ; ɔwa aŋ tə kɔth yi minɛŋ rə suma təfera, kotȧy-e aŋ yi abeki.

⁵ Ɔwe mə tham-e a tə lonsir kɔ suma təfera, ɔwa i ba hɛ kənasi ȧŋes ŋɔŋ kəwur ka ȧkȧfȧ ka aŋesəm, kɛrɛ i ti gbithanɛ ȧŋes ŋɔŋ rodi ka ɔKas kȧmi dɛ yi ka aŋmȧleka ŋɔŋ.

⁶ Ɔwe ba ɛləns ta ɔ təl ȧtȧ ɔYina ɔ pa ka ɛchɔch.

⁷ Gbal ka ɔkəlianɛ ka aŋchɔch ŋa ro Filadɛlfiya kəpa ye, Ɔwe yi usəm yi utəteŋ, ɔwe ba masapɔ ma Debid, ɔwe mə kanthi, ɔwa wuni o wuni ɔ gbəli hɛ kantha, kɔ kȧl kantha, ɔwa wuni o wuni ɔ gbəli hɛ kanthi; ɔkati ɔ pa,

⁸ I tȧrȧ mȧyɔs ma mu. Kəla i po təmər kədare kəkanthɛ rodi ka mu, ȧke wuni o wuni ɔ gbəli hɛ kantha; kotȧy-e mə ba afɔsɔ athȧn, ɔwa mə po thɔŋ wop ȧrim ra mi, mə pɛnsa hɛ ȧŋes a mi.

⁹ I ti yɔ ŋaŋ aŋa yi ka ȧŋseth agbanɛ ŋa Sethani, aŋa telanɛ a Yuda, kɛrɛ aŋ yi hɛ, aŋ yema gbo; i ti yɔ kȧmȧ aŋ der sanɛ ka ȧtatək ta mu, kȧmȧ aŋ tȧrȧ kəpa i po bɔthər mu.

¹⁰ Kȧbi munɔ mə po bɛnɛ ȧrim ra mi-e, tȧsom minɛ sɔ i ti bɛnɛ mu ka ȧŋlɔkɔ ŋa kamɛmər aŋa mə der ka ȧdȧru bɛ tə kəmɛm aŋfəm nɔru.

¹¹ Ɔwa i ti der lɛmp; wop ɔbaksər ara mə ba, kȧmȧ wuni o wuni ɔ te nɔy ȧŋniyɔ a mu.

¹² Kɔn ɔwe mə tham-e, i ti yɔ kȧmȧ ɔ yi akər ka ȧŋseth ŋa ɔKuru kȧmi, ɔ ba hɛ sɔ tə kəwur ri. Ɔwa i ti gbal ȧŋes ŋa ɔKuru kȧmi rokɔm kɔŋ, dɛ yi ȧŋes ŋa kȧpet ka ɔKuru kȧmi, ȧke yi mɔ Yerusalɛm kəfu, ȧke thor kəwur ro riyana kəwur ka ɔKuru kȧmi; ɔwa i ti kȧl gbal ȧŋes a mi afu ri.

¹³ Ɔwe ba ɛləns ta ɔ təl ȧtȧ ɔYina ɔ pa ka ɛchɔch.

¹⁴ Gbal ka ɔkəlianɛ ka aŋchɔch ŋa ro La-odishiya kəpa ye, Ȧsim ta ɔwe yi ɔSeri utəteŋ, ɔTəpi ka ɛyɛt ɛbɛmpa ya Kuru, ti ȧte.

¹⁵ I tȧrȧ mȧyɔs ma mu kəpa ye, mə yi hɛ utaŋk, mə yi hɛ ufey. I yema naŋ mə yi utaŋk yel thalɔm ufey tuk.

¹⁶ Tiyȧŋ pəkasifɛ mə yi gbo mun pəmla-e, mə yi hɛ ufey thalɔm utȧŋk-e, i ti thuf mu kəwur ka kȧsəŋ kȧmi.

¹⁷ kotȧy-e mə pa, Min yola, i ba ɛmunafa-e, ɔwa i paŋ hɛ rəka o rəka; kɛrɛ mə tɛ hɛ ti kəpa mun mɔnɛ-o, mun fith-o, mun nɔsinɛ-o, mun tiŋ tal.

¹⁸ Tiyȧŋ i maŋ mu tə kəwair mi mȧbɔŋɔ ama a po mɛm ka anant kȧmȧ mə yi uyola, dɛ yi suma təfera tə kəwɔŋ, kȧmȧ mȧlap ma ratiŋ ra mu rə te tɔrinɛ; ɔwa sop sɔ ɛfɔr ɛ mu yi atɔl asop, kȧmȧ mə gbəli nənk.

¹⁹ I ŋal ŋa bɛ aŋa i bɔthər, ɔwa i sirans ŋa sɔ; tiyȧŋ ta mə yi uyasyas, ɔwa thupi thɔŋ.

²⁰ Kəla i təmȧ ka kadare, i gbȧtgbȧt. Bepi wuni o wuni ɔ təl ȧrim ra mi, ɔwa ɔ kanthi kadare, i ti wɔŋ, i ti di yi kɔn, dɛ yi kɔn ɔ tə di yi minɛŋ.

²¹ Ɔwe mə tham i ti sɔŋ kɔ mamari tə kəyira yi minɛŋ ka kawaŋ ka rȧbȧy ra mi, mɔ mə minɛ sɔ i po tham, ka i yirȧ yi ɔKas kȧmi ka kawaŋ ka rȧbȧy rɔŋ.

²² Kɔn ɔwe ba ɛləns ta ɔ təl ȧtȧ ɔYina ɔ pa ka ɛchɔch.