Kȧŋȧibinɛ 22 - Ȧŋlemrȧnɛ Ȧfu

¹ Kɔ tɔri mi kȧbȧŋ ka ȧmȧnt ma aŋesəm, mətempi yereŋ, mə wur ka kawaŋ ka rȧbȧy ra Kuru yi ka kaLɔmɛ kəfɛth;

² ɔwa kə thas ka aroŋ dəbana ra kȧpet, ka i nənk sɔ ka tamɔri tərəŋ ta kabaŋ-e, aŋənt ŋa aŋesəm ŋə yi, aŋa kom məkomi tətəp tɔfɔt tərəŋ, pə yi mɔ-e, aŋ kom ɔfu ŋof o ŋof. Ɔwa ɛbɔpər yati ɛ yi ta kadamər ka tȧbona.

³ Ɔwa ȧranka o raŋka aŋ yi hɛ ri sɔ; kɛrɛ kawaŋ ka rȧbȧy ra Kuru dɛ yi ka kaLɔmɛ kəfɛth kə yi ka kȧpet, ɔwa ɛbɔy yɔŋ aŋ tə yɔna kɔ.

⁴ Ɔwa aŋ tə nənk ader rɔŋ, dɛ yi ȧŋes ŋɔŋ aŋ tə yi ka mabuŋ maŋ.

⁵ Ɔwa rȧtȧtȧk rə ba hɛ kəyi ri sɔ; aŋ fela hɛ amotha thalɔm aret tə kəgbɛntha-e, kotȧy-e ɔMarki Kuru ɔ tə gbɛnthar ŋa; ɔwa aŋ tə gbəka haŋ thȧnkȧŋ thəbana.

⁶ Kɔ pa do rɔmi, Ȧsim ȧte tə yi təbɔthi lanɛ yi təteŋ. Ɔwa ɔMarki ɔKuru ka Aŋnȧbi asəm, ɔ somra ɔmaleka kɔŋ tə kətɔri ɛbɔy yɔŋ mȧtȧy ama ba tə kəyeŋk der.

⁷ Ɔwa kəla, i ti der lɛmp. Ɔwe mə wop ȧsim ta kanabi ka ȧkȧfȧ ake, kɔn ɔ ba aruba.

⁸ Minɛŋ Yɔn, i təl, ka i nənk mȧtȧy ame. Ɔwa ma i po təl, dɛ yi i po nənk ma-e, i fumpɔ ka tatək ta ɔmaleka ɔwe po tɔri mi mȧtȧy ame tə kəbatho kɔ.

⁹ Kɛrɛ ɔ pa do rɔmi, Tə yɔ ti pəkasifɛ minɛ i yi ɔkos mu ubɔy, yi ɔkos ka aŋwɔnt a mu Aŋnȧbi dɛ yi ka ŋa bɛ aŋa wop ȧsim ta ȧkȧfȧ ake; bȧtho gbo Kuru Məsaba.

¹⁰ Kɔ pa do rɔmi, Te mathlɛ mapa ma kaŋaibinɛ ka ȧkȧfȧ ake; kotȧy-e ȧŋlɔkɔ aŋ po fat tə kəlasər ma.

¹¹ Kɔn ɔwe yi ukənȧ-e, ta ɔ tiya ka mȧkənɛ mɔŋ thuŋ; ɔwa kɔn ɔwe yi unɔkɔ, ta ɔ tiyȧ unɔkɔ thuŋ; kɔn ɔwe yi ulompi, ta ɔ yi ulompi thuŋ; ɔwa kɔn ɔwe yi usəm-e, ta o yi usəm thuŋ.

¹² Kəla, minɛ i ti der lɛmp; ɔwa ȧŋrȧm a mi aŋ yi yi minɛŋ tə kəram wuni o wuni mɔ mə mȧyɔs mɔŋ mə yi.

¹³ Minɛ yi Alfa dɛ yi Omeka, ɔTɔtɔkɔ yi ɔLəpsɔ, ɔTəpi yi ɔGbanthir.

¹⁴ Afəm aruba ŋaŋ aŋa po yak ȧsuma taŋ kȧmȧ aŋ gbəli ba mamari tə kəder ka aŋənt ŋa aŋesəm, dɛ yi kȧmȧ aŋ gbəli wɔŋ ka tadare ta kȧpet.

¹⁵ Ȧtesoma-e, maȧən-o, aŋmɛn-o, aŋfəm arəpi-o, aŋfəm adif-o, ŋaŋ aŋa ramnɛ ɛyɛt ɛbumərnɛ-o, dɛ yi wuni o wuni ɔwe bɔthər rəyem-o, ama ɔwe fɔf rəyem, ŋa bɛ aŋ yi rokaŋ ka kȧpet.

¹⁶ Minɛ Yisɔs, i po som ɔmaleka kȧmi tə kəlɔma mu mȧtȧy ame salata ɛchɔch. Minɛ yi aŋThəŋk dɛ yi ɔWan ka Debid, dɛ yi ɔKɔs kəgbɛntha kelkel ka rabəth.

¹⁷ ƆYina məsəm yi ɔbɛra ufath aŋ pa, Der. Ɔwa ta kɔn ɔwe təl ɔ pa, Der. Dɛ yi kɔn ɔwe ba rəmun-e, ta ɔ der. Wuni o wuni ɔwe selɔ, ta ɔ gbasi ȧmȧnt ma aŋesəm kəyaŋkaŋ.

¹⁸ Tə tɛntɛnɛ i maŋ wuni o wuni ɔwe təlȧ ȧsim ta kanabi ka ȧkȧfȧ ake, Bepi wuni o wuni ɔ bȧr ka ȧkɛra ake-e, Kuru ɔ tə bȧrȧ kɔ ɛnakasi ɛyɛ a po gbal ka ȧkȧfȧ ake;

¹⁹ ɔwa bepi wuni o wuni ɔ gbəŋki ȧsim ta ȧkɛra ka ȧkȧfȧ ake-e, Kuru ɔ tə nɔy ȧŋni ŋɔŋ ka aŋənt ŋa aŋesəm, dɛ yi ka kȧpet kəsəm, yi ka mȧtȧy ama a po gbal ka ȧkȧfȧ ake.

²⁰ Kɔn ɔwe sɔŋ məseri ta mȧtȧy ame, ɔ pa, Tə tɛntɛnɛ i ti der lɛmp. Yao, der ɔMarki Yisɔs.

²¹ Aŋboŋa ŋa ɔMarki kȧsu Yisɔs Krayst aŋ yi yi aŋsəm bɛ. Amina.