Kȧŋȧibinɛ 21 - Ȧŋlemrȧnɛ Ȧfu

¹ Ka i nənk kȧriyana kəfu dɛ yi ȧdȧru rəfu; kotȧy-e ȧkȧriyana dɛ yi ȧdȧru rətɔtɔkɔ rə po thas. Ɔwa kȧbȧŋ kəbana kə yi hɛ sɔ.

² Ka i nənk kȧpet kəsəm ȧke yi mɔ-e Yerusalɛm kəfu, kə thor kəwur ro riyana ka Kuru, kəbɛnɛnɛ mɔ ubɛra ufath ɔwe yesinɛ ta ɔwos kɔŋ.

³ Ka i təlȧ sɔ rim rəbana ara wur ka kawaŋ ka rȧbȧy, rə pa, Kəla, ɔyirȧ wa Kuru ɔ yi rɛ afəm a kəpet, ɔwa ɔ tə yirȧ kətɔŋ ka ŋaŋ-e, ɔwa aŋ tə yi aŋfəm ŋɔŋ, ka Kuru kɔn kɔnɔnɛ ɔ tə yi rɛ ŋaŋ, ɔwa ɔ tə yi ɔKuru ka ŋaŋ gbeŋ.

⁴ Ɔwa Kuru ɔ tə nasi ȧmȧntər bɛ ka ɛfɔr yaŋ. Rəfi rə ba hɛ sɔ kəyi. Ɔwa ɔnɔsinɛ-o, kəbok-o, ta a pa ras ɔbaŋ-o, ɛ ba hɛ sɔ kəyi hali. Kotȧy-e mȧtȧy mətɔtɔkɔ mə po thas.

⁵ Ɔwa kɔn ɔwe yirȧ ka kawaŋ ka rȧbȧy ɔ pa, Kəla, i təpi mȧtȧy bɛ ɔfu. Kɔ pa do rɔmi, Gbal ȧsim ȧte, kotȧy-e tə yi təteŋ dɛ yi təbɔthi lanɛ.

⁶ kɔ kanɛ mi, Tə poŋ thɔŋ lasər. Minɛ i yi Alfa dɛ yi Omeka, ɔTəpi dɛ yi ɔGbanthir; ɔwa i ti sɔŋ ka ɔwe ba rəmun-e, ȧmȧnt ma kabath kəsəm kəyaŋkaŋ.

⁷ Ɔwe tham ɔ tə sɔthɔ mȧtȧy ame bɛ kəŋ. Ɔwa minɛŋ i ti yi ɔKuru kɔŋ-e, ɔwa kɔnɔ ɔ tə yi ɔwan kȧmi.

⁸ Kɛrɛ ŋaŋ aŋa ba rənes yi ante lanɛ, dɛ yi aŋləs-e, yi ŋaŋ aŋa dif kəsias-e, yi aŋfəm arəpi, dɛ yi anthupəs-e, yi ŋaŋ aŋa ramnɛ ɛyɛt ɛbumərnɛ, dɛ yi afəm ayem bɛ-e, aŋ tə ba ɛgbap yaŋ ka ȧŋbonka ŋa nȧnt dɛ yi salfər. Rafi ara bekȧ mȧrəŋ, riyȧŋ.

⁹ Ka ukin ka aŋmȧleka tȧmthədɛrəŋ aŋa ba ɛbɔl tȧmthədɛrəŋ ya ɛfithina tȧmthədɛrəŋ ɛləpsɔ-e, ɔ kanɛ mi hɔ, Der anɔ kȧmȧ i tɔri mu ɔbɛra ufath ɔwe yi mɔ-e ɔrani ka kaLɔmɛ kəfɛth.

¹⁰ kɔ kerȧ mi poŋ ro Yina ka kəteŋ kəbana kəbɔli rəkɔm, kɔ tɔri mi kȧpet kəbana kati; Yerusalɛm kəsəm, kə thor kəwur ro riyana ka Kuru,

¹¹ kə ba aŋyiki ŋa Kuru; ɔwa kawalɛ kɔŋ kə gbɛntha mɔ ȧsar abȧki mɔlɔ sɔbɛ-e, ȧsar mɔ ayaspa, agbəraŋ weŋkweŋk.

¹² Ɔwa kə ba athatha abana abɔli rəkɔm, dɛ yi tədare tɔfɔt tərəŋ, ka amaleka tɔfɔt ŋarəŋ aŋ bum ri, ka a gbal ames ma ɛbɔnsɔŋ tɔfɔt yɛrəŋ ya aŋwuth ŋa Isrɛl rokɔm ka tadare.

¹³ Rothɔrɔŋ kə ba tədare təsas-e, ka kȧmɛrɔ təsas-e, ka kȧdiyɔ təsas-e, dɛ yi təsas ropil.

¹⁴ Ka anthatha ŋa kȧpet aŋ ba mətəmər tɔfɔt mȧrəŋ ro a gbal ames ma aŋsom tɔfɔt ŋarəŋ ŋa kaLɔmɛ kəfɛth ka Kuru.

¹⁵ Ka ɔwe fɔfȧnɛ mi ɔ ba kənt kəthuntha ka məbɔŋɔ tə kəthunth kȧpet, yi tadare, dɛ yi ɛthatha yati.

¹⁶ Ɔwa kȧpet kə ba ɛkoŋ yanlɛ ɛthənȧnɛ; kabɔl-o, ɔwarɛ-o, mɔlɔ min. Kɔ thunth kȧpet rɛ akənt kəthunthȧ-e, ɔwa kə yi mɔ-e ɛmayl awul ŋin tɛmɛ tamath. Ka kȧbɔl yi ɔwarɛ kati ɔ yi ɔthənȧnɛ bɛ.

¹⁷ kɔ thunth anthatha ŋati, ɔwa aŋyirka ŋati aŋ yi ɛthuntha kɛmɛ kin təgba tərəŋ yanlɛ, kətȧŋȧnɛ ka kathuntha ka wuni kəpet ɔwe yi mɔ umȧleka.

¹⁸ Ka a bɛmpa anthatha ŋati rə məsar məbaki mɔlɔ mə a tela ayaspa; ɔwa kȧpet kə yi ka məbɔŋɔ, məgbəraŋ mɔ amɛmnɛ akelkel.

¹⁹ Ka a yesi mȧtəmər ma anthatha yi məsar məbaki mɔlɔ məgbaskɛ gbaskɛ; antɔtɔkɔ aŋ yi ayaspa; aŋa bekȧ marəŋ-e, asafayir; aŋa bekȧ məsas-e, akalsedoni; aŋa bekȧ manlɛ, ɛmɛrald;

²⁰ aŋa bekȧ tamath-e, sardɔniks; aŋa bekȧ tamthərukin-e, asardis; aŋa bekȧ tamthədɛrəŋ-e, akrisolit; aŋa bekȧ tamthərɛsas-e, abɛril; aŋa bekȧ tamthərɛŋanlɛ-e, atopas; aŋa bekȧ tɔfɔt-e, akrisopras; aŋa bekȧ tɔfɔt ŋin-e, ayasinth; aŋa bekȧ tɔfɔt marəŋ-e, amethist.

²¹ Ɔwa tadare tɔfɔt tərəŋ tə yi məlulu tɔfɔt mȧrəŋ; kədare o kədare alulu ŋin. Ɔwa aroŋ dəbana rə kȧpet rə yi məbɔŋɔ rəmaŋ, mɔ amɛmnɛ akelkel.

²² Kɛrɛ i nənk hɛ aseth abȧtho ri-e, kotȧy-e ɔMarki ɔKuru ka aŋfɔsɔ bɛ dɛ yi kaLɔmɛ kəfɛth aŋ yi ȧŋseth abȧtho ŋati.

²³ Ka kȧpet kə yema hɛ aret, thalɔm aŋof tə kəgbɛntha ri, pəkasifɛ aŋyiki ŋa Kuru aŋ gbɛnthar ki, ɔwa kaLɔmɛ kəfɛth kɔnɔ yi ȧŋmothȧ ŋati.

²⁴ Ɔwa tȧbona ta aŋkisi tə kɔth ka kawalɛ kati; ka aŋbȧy ŋa ȧdȧru aŋ kȧrȧ ri ɛyiki yaŋ, dɛ yi ɛkori kori yaŋ.

²⁵ A ba hɛ kəkantha tadare ta kȧpet pali; ɔwa rətatak rə ba hɛ kəyi ri sɔ.

²⁶ Ɔwa aŋ tə kȧrȧ ri aŋyiki dɛ yi ɛkori kori ya tȧbona.

²⁷ Kɛrɛ tȧy tələs tə gbəli hɛ wɔŋ di thəbana, thalɔm ɔwe yi unɔkɔ, thalɔm uyem; kɛrɛ ŋaŋ gbo son aŋa ba ames maŋ ka ȧkȧfȧ ka aŋesəm ka kaLɔmɛ kəfɛth.