Kȧŋȧibinɛ 2 - Ȧŋlemrȧnɛ Ȧfu

¹ Gbal ka ɔkəlianɛ ka aŋchɔch ŋa ro Ɛfisɔs kəpa ye, Kɔn ɔwe wop atɔs tȧmthədɛrəŋ ka kȧta kɔŋ kədiyɔ, ɔwe kɔth kətɔŋ ka tamulɛ ta məbɔŋɔ tamthədɛrəŋ-e, ɔ pa hɔ,

² I tȧrȧ mȧyɔs yi mapanth dɛ yi kamuyu ka mu. I kȧl tȧrȧ kəpa mə gbəli hɛ selɔ afəm akənȧ, dɛ yi mə po mɛm ŋaŋ aŋa pa aŋ yi asom, maŋ te yi asom, ɔwa mə po fir kəpa aŋ yi afəm ayem;

³ mə po muyu, mə po sara ɔlel salata ȧŋes a mi, ɔwa pə bȧk hɛ mu,

⁴ kɛrɛ i ba ȧtȧy ȧte tə kəthɛkɛ mu, kotȧy-e mə po gbapɛ mabɔthər ma mu mətɔtɔkɔ.

⁵ Tiyȧŋ kala ȧmerȧ ka ɔdɛr ro mə wur, mə fumpɔ-e, ɔwa thupi, yɔ thɔŋ mɔ mə la yɔ ka ɔtɔtɔkɔ. Bepi pə yi hɛ ti-e, i ti der do rɔmu lɛmp, ɔwa i ti tɔŋa kamulɛ ka mu, thambe mə thupi.

⁶ Kɛrɛ mə ba ȧtȧy təfinɔ ȧte-e, tə kəyi mə gbɛŋa mȧyɔs ma aŋNikɔletan, ama minɛ sɔ i gbɛŋa.

⁷ Ɔwe ba ɛləns ta ɔ təl ȧtȧ ɔYina ɔ pa ka ɛchɔch. Ɔwe mə tham-e, i ti sɔŋ kɔ tə kədi ka aŋənt ŋa aŋesəm aŋa yi ka ȧŋParadays ŋa Kuru Məsaba.

⁸ Gbal ka ɔkəlianɛ ka aŋchɔch ŋa ro Smayna kəpa ye, Ȧsim ta ɔTɔtɔkɔ yi ɔLəpsɔ-e, kɔn ɔwe po fi kɛrɛ ɔ kȧl po ba aŋesəm, ti ȧte.

⁹ I tȧrȧ ansɔmpanɛ yi ȧŋmɔnɛ ma mu, (kɛrɛ mun yola). I tȧrȧ sɔ kafɔf kələs ka ŋaŋ aŋa pa hɔ aŋ yi aYuda, kɛrɛ aŋ yi hɛ, aŋ yi gbo ka ȧŋseth agbanɛ ŋa Sethani.

¹⁰ Te nesa tȧy o tȧy ȧtȧ mȧ mə ba kənakasi. Sethani ɔ tə fak alɔm kətɔŋ ka mu ka ȧŋseth ȧtərənkȧ kȧmȧ a mɛm mu, ɔwa mə tə sompanɛ mərey tɔfɔt. Ta mə yi ubɔthi lanɛ haŋ ka rȧfi, ɔwa minɛ i ti sɔŋ mu ȧniyɔ ŋa aŋesəm.

¹¹ Ɔwe ba ɛləns ta ɔ təl ȧtȧ ɔYina ɔ pa ka ɛchɔch. Ɔwe mə tham ɔ ba hɛ tə kəsɔmpanɛ ka rafi ara bekȧ mȧrəŋ.

¹² Gbal ka ɔkəlianɛ ka aŋchɔch ŋa ro Pakamɔm kəpa ye, Kon ɔwe ba aŋgbathɔ awɔŋi aŋa ba ran narəŋ ɔ pa hɔ.

¹³ I tȧrȧ ro mə yirȧ, hali ro kawaŋ ka rȧbȧy ra Sethani kə yi. Ɔwa mə wop ȧŋes a mi gbaŋ-e, mə pɛnsa hɛ kȧlanɛ ka mu do rɔmi, hali ka marey ma Antipas, ɔseri kȧmi ubɔthi lanɛ, ɔwe aŋ dif kətɔŋ ka mu, ro Sethani ɔ yirȧ.

¹⁴ Kɛrɛ i ba kəthɛkɛ mu ta tȧy təlɔm, pəkasifɛ mə ba ŋaŋ kətɔŋ ka mu aŋa wop mathəksa ma Belam, ɔwe thəksa Belak tə kəgbɔns aŋwuth ŋa Isrɛl kȧmȧ aŋ di ɛyɛt ɛyɛ a po wurɔ sathka ka ɛrɔŋ-e, dɛ yi tə kəyɔ kərəp.

¹⁵ Mɔlɔ min sɔ-e, ŋaŋ aŋa wop mathəksa ma aŋNikɔletɔn.

¹⁶ Thupi thɔŋ, bepi pə yi hɛ ti-e, i ti der ro rɔmu lɛmp, ɔwa i ti tim aŋfəm ŋati yi aŋgbathɔ ŋa kȧsəŋ kȧmi.

¹⁷ Ɔwe ba ɛləns ta ɔ təl ȧtȧ ɔYina ɔ pa ka ɛchɔch. Ɔwe mə tham-e, i ti sɔŋ kɔ ȧŋmana ȧmȧnknɛ, dɛ yi i ti sɔŋ kɔ ȧsar ȧferȧ; ɔwa ka aŋsar a tə gbal ȧŋes afu aŋa wuni o wuni ɔ te gbəli tȧrȧ thambe kɔn ɔwe sɔthɔ ŋi.

¹⁸ Gbal ka ɔkəlianɛ ka aŋchɔch ŋa ro Thayatira kəpa ye, Ȧsim ta ɔWan ka Kuru ɔwe ba ɛfɔr mɔ nȧnt nəmara, yi tatək mɔ akɛm akelkel, ti ȧte,

¹⁹ I tȧrȧ mȧyɔs, yi mabɔthər, yi kȧlanɛ, yi mapanth, dɛ yi kamuyu ka mu; ɔwa i tȧrȧ sɔ kəpa mȧyɔs ma mu mələpsɔ mə thasi mətɔtɔkɔ.

²⁰ Kɛrɛ i ba kəthɛkɛ mu ta tȧy təlɔm, pəkasifɛ mə malanɛ ɔwuni bom kati Yɛsibɛl, ɔwe telanɛ unȧbi ubɛra. Ɔwa ɔ thəksa, kɔ kȧl yɛthas ɛbɔy ɛ mi tə kəyɔ kərəp, dɛ yi tə kədi ɛyɛt ɛyɛ a po wurɔ sathka ka ɛrɔŋ.

²¹ I po sɔŋ kɔ afɛrɛ tə kəthupi, kɛrɛ ɔ thupi hɛ ka kȧrəp kɔŋ.

²² Tiyȧŋ i ti fȧk kɔ ka aŋgbatha ŋa rətu, ɔwa ŋaŋ sɔ aŋa mə yɔ kərəp rɛ kɔnɔŋȧŋ, i ti sɔmpar ŋa rə kəsɔmpa kəbana, thambe aŋ thupi ka mȧyɔs maŋ.

²³ Ɔwa i ti dif aŋwuth ŋɔŋ, kȧmȧ ɛchɔch bɛ aŋ tȧrȧ kəpa minɛŋ, minɛ mə thekthek ɛnanɛ dɛ yi ɛmerȧ ya afəm; ɔwa i ti sɔŋ kin o kin kətɔŋ ka mu mɔlɔ ma mapanth mɔŋ mɔ yi.

²⁴ Kɛrɛ i pa do rɔmu, yi ka aŋlɔm ro Thayatira aŋa te malanɛ mathəksa ame-e, pə yi mɔ-e ka ŋaŋ aŋa te tha thəkəs mȧtȧy ama mə a tela ɛgbundu ya Sethani. I ba hɛ sɔ kəreŋ mu kothe kəlɔm.

²⁵ Kɛrɛ ara mə po thɔ ba-e, wop ri ɔbaksər haŋ i der.

²⁶ Ɔwe mə tham-e, ɔwe mə wop ɛyamari ɛ mi haŋ ka ɔthalnɛ, i ti sɔŋ kɔ afɔsɔ rokɔm ka tȧbona bɛ.

²⁷ Ɔwa ɔ tə gbəka ŋa ɔbaki mədɛr rə kətək ka rəfat, mɔ ma gbȧyis ɛbɔl rə məbeŋkila; hali mɔ mə aŋfɔsɔ a mi aŋ yi aŋa i po sɔthɔ kəwur ka ɔKas kȧmi.

²⁸ Ɔwa i ti sɔŋ kɔ akɔs ka rəbəth.

²⁹ Ɔwe ba ɛləns ta ɔ təl ȧtȧ ɔYina ɔ pa ka ɛchɔch.