Kȧŋȧibinɛ 18 - Ȧŋlemrȧnɛ Ȧfu

¹ Kədarəŋ ka mȧtȧy ame. i nənk umȧleka ulɔm ɔ thor kəwur ro riyana, kɔ ba afɔsɔ abana; ɔwa kawalɛ ka aŋyiki ŋɔŋ kə gbɛnthar ȧdȧru.

² kɔ lak dim rəbana gbaŋkəlo, ɔ pa, Babilɔn kȧpet kəbana kə po simtha, kə po simtha, ɔwa kə po səkɛ mayira ma akərəfi dɛ yi ɔdɛr ɔmaŋknɛ wa aronsoŋ o ronsoŋ, yi ȧbȧmp o bȧmp unɔkɔ,

³ pəkasifɛ tȧbona bɛ tə po mun maber ma rabaŋ da karəp kɔŋ, ka aŋbȧy ŋa ȧdȧru aŋ po yɔ kərəp dɛ yi kɔn, ɔwa anthila ŋa ȧdȧru aŋ po munaŋfa kətȧŋȧnɛ ka rayola ra katayanɛ kɔŋ.

⁴ Ka i təlȧ rim rəlɔm rə wur ro riyana, ara pa, Aŋfəm a mi, wur nu ri kȧmȧ nə te yi ayeranɛ ka ɛhakɛ yɔŋ, ɔwa kȧmȧ nə te ba ȧgbȧp ka ɛfithina yɔŋ.

⁵ kotȧy-e ɛhakɛ yɔŋ ɛ po gbompanɛ ȧmap haŋ ɛ bek ka kȧriyana-e, ɔwa Kuru ɔ po kȧlȧ ȧmerȧ ka mȧkənȧ mɔŋ.

⁶ Rȧm kɔ nu mɔ mɔ la ram nu, ɔwa kala kɔ mɔlɔ mȧrəŋ mɔ mə mȧyɔs mɔŋ mə yi. Ka ampɔthi aŋa kɔnɔ ɔ po mun-e, kȧl lasər ŋi nu kalo kalo.

⁷ Ka ɔgbȧthi ɔ la kori korinɛ rə kətayanɛ-e, kala kɔ nu anthunth ŋin ŋati ŋa athalər rɛ kəbok; kotȧy-e ɔ pa ka ȧŋmerȧ ŋɔŋ, Minɛŋ i yi ubȧy ubɛra, i yi hɛ ubora, i gbəli hɛ nənk kəbok.

⁸ Tiyȧŋ ɛnambara yɔŋ ɛ tə bəp kɔ rə ȧrey ŋin-e, rəfi-o, kəbok-o, yi dor rəbana; ɔwa a tə thɔy kɔ mər rə nȧnt, kotȧy-e ɔMarki Kuru ɔwe thonkas kɔ ɔ yi ɔbaki mədɛr.

⁹ Ɔwa aŋbȧy ŋa ȧdȧru aŋa po yɔ kərəp yi kɔn, dɛ yi aŋa po yi atayanɛ yi kɔn-e, aŋ tə bok-o, aŋ tə kulɔ ta atɔŋ, maŋ nənk akimɔ ka kathɔy kɔŋ.

¹⁰ Maŋ təmȧ ɔbɔli poŋ ta ranes ra anthalər ŋɔŋ-e, aŋ təpa, Mɔnɛ-o, mɔnɛ-o, mɔnɛ-o, kȧpet kəbana, Babilɔn kəninis; kotȧy-e kathoŋkas ka mu kə po bek ka alɔkɔ agbut.

¹¹ Ɔwa anthila ŋa ȧdȧru aŋ tə bok dɛ yi aŋ tə bosinɛ ta atɔŋ, pəkasifɛ wuni o wuni ɔ way hɛ sɔ ɛyɛt yaŋ,

¹² mɔ-e tothe ta məbɔŋɔ yi akala ȧferȧ-o, mȧsar məbaki mɔlɔ-o, mȧlulu-o, ȧtotha tənɔfthɔ-o, ȧtotha təkulɛr-o, tȧsəlik-o, ȧtotha təyim-o, ȧtənt tətuy sɔthɔ-o, ɛyɛt bɛ ya rȧtəŋka-o, ɛyɛt bɛ ya ȧtənt təbaki mɔlɔ-o, aŋkɛm-o, rafat-o, dɛ yi mȧsar məmɔrmɔr;

¹³ mȧpos yi ɛyɛt ɛfɔlfɔl tətəp tətəp-o, ȧmȧro məsopa-o, ɛgboŋgbo ta kȧthɔy-o, mȧber-o, ȧmaro-o, ɛtariyɔt-o, atar-o, dɛ yi sɔ ɛŋesəm ya afəm.

¹⁴ Mȧkomi məfinɔ ama ɛmerȧ ɛ nu ɛ milɛ, ɛ po nɔynɛ nu, ɔwa ɛyɛt ɛ nu ɛbɔthi dɛ yi ɛthasərnɛ ɛ kɔnɛ haŋ nə gbəli hɛ sɔthɔ yi sɔ thȧnkȧŋ.

¹⁵ Anthila ŋa ɛyɛt ɛye aŋa po munaŋfa kətaŋ do rɔŋɔŋ-e, aŋ tə təmȧ ɔbɔli ta ranes ra anthalər ŋɔŋ, ɔwa aŋ tə bok, aŋ tə kȧl kulɔ,

¹⁶ kəpa, Mɔnɛ-o, mɔnɛ-o, kȧpet kəbana kati ȧke po lopra kotha kənɔfthɔ yi kotha kəyim tɛrɛŋ-e, ȧke sa yesinɛ rə məbɔŋɔ yi məsar məbaki mɔlɔ-e, dɛ yi məlulu.

¹⁷ kotȧy-e rə alɔkɔ agbut rayola rəninis are rə po dinɛ. Ka ŋa bɛ aŋa ba təbil, yi aŋfəm bɛ aŋa yɔ mapanth ma təbil məgbaskɛ gbaskɛ, aŋ təmȧ ɔbɔli poŋ,

¹⁸ kaŋ sel ɛrɔŋ maŋ nənk akimɔ ka kafey kɔŋ, kaŋ pa, kȧpet kəreke kə yi mɔ kȧpet kəbana ake-e?

¹⁹ kaŋ lond kəbof ka tabomp taŋ, aŋ sel ɛrɔŋ rə kəkulɔ, dɛ yi kəbok, kaŋ pa, Mɔnɛ-o, mɔnɛ-o, kȧpet kəbana kati, ro pə yi ŋaŋ bɛ aŋa ba təbil ro bȧŋ aŋ munaŋfa salata rayola rɔŋ; rə alɔkɔ agbut kə tiyȧ kəfoth fo.

²⁰ Sel məbɔnɛ ta ti, munɔ kȧriyana rɛ na asəm, yi na asom, dɛ yi anȧbi; pəkasifɛ Kuru ɔ po thonkas kəŋamnɛ kɔ ta ȧtȧ nu.

²¹ Ka umȧleka ubaki mədɛr ɔ gbasi ȧsar mɔ ȧsar ȧgbɔlȧ abana, kɔ ləm ŋi ro bȧŋ, ɔ pa, Ya a ba kǝ fitha kȧBabilɔn kȧpet kəbana kati yi ȧfɔsɔ, ɔwa a ba hɛ sɔ kənəŋk ki thȧnkȧŋ.

²² Ka a təlȧ hɛ sɔ do rɔmu mȧleŋ ma aŋyeli, thalɔm ŋaŋ aŋa fer ɛgbulu, ta a pa ras ŋaŋ aŋa fɛŋ tuleŋ dɛ yi təthɛma thȧnkȧŋ thəbana; ɔwa a ba hɛ sɔ kəfir wuni o wuni ɔwe tȧrȧ rətol o rətol do rɔmu. A ba hɛ sɔ kətəlȧ ri mȧkil ma kadir hali.

²³ ȧŋmothȧ ŋa amulɛ aŋ ba hɛ sɔ kəgbɛntha do rɔmu, ɔwa a ba hɛ sɔ kətəla ri ȧrim ra ɔruni ufath dɛ yi ɔbɛra ufath hali. Kotȧy-e anthila a mu aŋ la yi afəm abana ŋa ȧdȧru; ɔwa ramɛn ra mu rə po tɔns təbona bɛ.

²⁴ Ka a fir do rɔŋɔŋ mȧtir ma anȧbi-e, yi ȧma aŋfəm asəm, dɛ yi ŋa bɛ aŋa a po dif ka ȧdȧru.