Kȧŋȧibinɛ 17 - Ȧŋlemrȧnɛ Ȧfu

¹ Ka ȧŋlɔkɔ ŋati ukin ka aŋmȧleka tȧmthədɛrəŋ aŋa ba ɛbɔl tȧmthədɛrəŋ ɔ der ro rɔmi, kɔ pa, Der, ɔwa i ti tɔri mu aŋthoŋkas ŋa ɔbɛra urəpi ubana ɔwe yirȧ rokɔm ka ȧmȧnt məgbathi-e,

² ɔwe aŋbȧy ŋa ȧdȧru aŋ tȧŋ rə kəyɔ kərəp, ɔwe yɔ sɔ kȧmȧ aŋfəm ŋa ȧdȧru aŋ tis maber ma karəp kɔŋ.

³ Kɔ kera mi ro Yina ka aŋwula; ka i nənk wuni bom ɔ rensa ka ɔsɛm ubaŋ uyim tɛrɛŋ, ɔwe la yi ames mələs kəŋamnɛ Kuru Məsaba, ɔ ba təbomp tamthǝdɛrəŋ dɛ yi ɛlɛn tɔfɔt.

⁴ Ɔwuni bom ɔwe ɔ lopra kotha kəkulər, dɛ yi kəyim tɛrɛŋ, kɔ yesinɛ məbɔŋɔ yi məsar məbaki mɔlɔ dɛ yi məlulu, ɔwa ɔ bət apɔthi ŋa məbɔŋɔ ka kȧta kɔŋ, aŋa la yi mȧpulkɛ, dɛ yi aŋnɔkɔ ŋa karəp kɔŋ.

⁵ Ɔwa a po gbal ŋes ka ȧŋbuŋ ŋɔŋ aŋa yi, MURARI, pə yi mɔ-e, KȦBABILƆN KƏBANA ƆKARA KA AŊBƐRA ARƏPI YI MȦPULKƐ MA ȦDȦRU.

⁶ Ɔwa i nənk ɔwuni bom ɔwe ɔ tis yi mȧtir ma aŋfəm ŋa Yisɔs dɛ yi mȧtir ma maseri ma Yisɔs. Ma i nənk kɔ i kabanɛ sɔbɛ,

⁷ ka ɔmaleka ɔ pa do rɔmi, To pə som mə kabanɛ-e? ti tɔri mu ȧŋmurari ŋa ɔwuni bom ɔwe-e, dɛ yi ŋa ɔsɛm ubaŋ ɔwe ɔ rensa, ɔwe ba təbomp tȧmthədɛrəŋ dɛ yi ɛlɛn tɔfɔt.

⁸ Ɔsɛm ubaŋ ɔwe mə po nənk ɔ la yi, kɛrɛ ɔ yi hɛ sɔ, kɛrɛ pə tiyȧ gbo ɔthan ɔ tə kȧl wur ka ȧŋbi aŋa te ba ɔthalnɛ, kəkɔnɛ ka kadinɛ; ɔwa aŋfəm ŋa ȧdȧru aŋ tə kabanɛ, ŋa bɛ aŋa te la ba ames maŋ ka ȧkȧfȧ ka aŋesəm kȧbi ka ɔtəpɛr wa ȧdȧru, maŋ nənk ɔsɛm ubaŋ ɔwe la yi, ɔwa ɔ yi hɛ sɔ, kɛrɛ ɔ yi tə kəder.

⁹ Ta sə ba nu ɛmerȧ ɛtempi ka ȧŋpa aŋe. Tabomp tȧmthədɛrəŋ tə yi təteŋ tȧmthədɛrəŋ, ro ɔwuni bom ɔwe ɔ yirȧ.

¹⁰ Tə yi sɔ abȧy tȧmthədɛrəŋ; tamath aŋ po thas, ɔwa ukin ɔ yi ras-e, kɛrɛ ɔlɔm ɔ tha der hɛ. Ma ɔ po der-e, ɔ tə won ta alɔkɔ agbut.

¹¹ Ɔsɛm ubaŋ ɔwe la yi kɛrɛ ɔ yi hɛ ka-ake, kɔnɔ beka tamthərɛsas, kɛrɛ ɔ yi ukasa ka antamthədɛrəŋ, ɔwa kɔnɔ sɔ ɔ tə kɔnɛ ka kadinɛ.

¹² Ɔwa ɛlɛn tɔfɔt ɛyɛ mə po nənk ɛ yi abȧy tɔfɔt aŋa te tha ba tabȧy taŋ, kɛrɛ aŋ tə sɔthɔ aŋfɔsɔ ŋati ta ahawa ŋin rɛ ɔsɛm ubaŋ.

¹³ Ɔwa aŋe bɛ aŋ bɔ ba ȧmerȧ ŋin, ɔwa aŋ lȧnkəli ɛfɔsɔ yi mȧmari maŋ ka ɔsɛm ubaŋ.

¹⁴ Aŋ tə tim kaLɔmɛ kəfɛth, kɛrɛ kaLɔmɛ kəfɛth ɔ tə tham ŋa; kotȧy-e kɔnɔ yi ɔMarki ka amarki, dɛ yi ɔBȧy ka abȧy; ɔwa ŋaŋ sɔ aŋa tȧŋ kɔ, aŋ tə tham dɛ yi kɔn, ȧtesoma-e aŋ yi atela, yi athith, dɛ yi abɔthi lanɛ.

¹⁵ Kɔ pa do rɔmi sɔ, Ȧmȧnt ama mə po nənk ro ɔbɛra urəpi ɔ yirȧ-e, mə tǝmȧ ta aŋfəm, yi ta tȧbona, dɛ yi tənt.

¹⁶ Ɔwa ɛlɛn tɔfɔt ɛyɛ mə po nənk, dɛ yi ɔsɛm ubaŋ, aŋ tə gbɛŋa ɔbɛra urəpi, ɔwa aŋ tə ləsər kɔ kȧmȧ ɔ yi kətiŋ tal, ɔwa aŋ tə sɔm ȧŋdɛr ŋɔŋ tɛf, aŋ tə thɔy kɔ mər rə nȧnt.

¹⁷ Pəkasifɛ Kuru ɔ po bot ti ka ɛmerȧ yaŋ tə kəyɔ mȧselɔ mɔŋ, maŋ ba ȧmerȧ ŋin tə kəsɔŋ tabȧy taŋ ka ɔsɛm ubaŋ haŋ ȧsim ta Kuru tə po lasər.

¹⁸ Ɔwa ɔwuni bom ɔwe mə po nənk ɔ yi kȧpet kəbana ȧke gbəka aŋbȧy ŋa ȧdȧru.