Kȧŋȧibinɛ 15 - Ȧŋlemrȧnɛ Ȧfu

¹ Ka i nənk ɛmisali ɛbana ɛlɔm ro riyana, ɛmisali ɛkabanɛ yȧŋ, pə yi mɔ-e amaleka tȧmthədɛrəŋ aŋa ba ɛfithina ɛləpsɔ tȧmthədɛrəŋ; kotȧy-e ka ɛye rabȧŋ da Kuru rə lasər thɔŋ.

² Ɔwa i nənk ara bȧlȧnɛ mɔ kəbaŋ ka amɛmnɛ kə kulunɛ yi nȧnt; ka ŋaŋ aŋa po tham ɔsɛm-e, yi mȧbȧlȧnɛ mɔŋ-e, yi aŋlomar ŋɔŋ-e, dɛ yi aŋyirka ŋa ȧŋes ŋɔŋ-e, aŋ təmȧ ro bȧŋ dayɛr, kaŋ bət ɛgbulu ya Kuru.

³ kaŋ leŋ aŋleŋ ŋa Mosis ȧŋbɔy ŋa Kuru, dɛ yi aŋleŋ ŋa kaLɔmɛ kəfɛth, kaŋ pa, Mayɔs ma mu mə yi məbana dɛ yi məkabanɛ ɔMarki Kuru ka afɔsɔ bɛ; asoŋ ta mu tə yi təlompi yi təteŋ, munɔ ɔBȧy ka ɛyamana.

⁴ Kanɛ te ba kənesa dɛ yi kəyikis ȧŋes a mu-e, ɔMariki-e? Pəkasifɛ munɔ son mə yi ɔsəm; kotȧy-e tȧbona bɛ tə tə der kəbatho mu, pəkasifɛ mȧyɔs ma mu məlompi mə po ŋaibinɛ.

⁵ Rodarəŋ kati i kəli, ka a kanthi kadare ka ȧŋseth ŋa ɔdɛr ɔsəm wa maseri ro riyana.

⁶ Ka aŋmȧleka tȧmthədɛrəŋ aŋa ba ɛfithina tȧmthədɛrəŋ aŋ wur ri, kaŋ lopra kotha kənɔfthɔ kəfera pər, ɔwa aŋ seknɛ ɛthɛbɛŋ ya məbɔŋɔ.

⁷ Ɔwa ukin ka ɛwuka akəli ŋanlɛ ɔ sɔŋ aŋmȧleka tȧmthədɛrəŋ ɛbɔl ɛ məbɔŋɔ tȧmthədɛrəŋ ɛyɛ la pay yi rabaŋ da Kuru, ɔwe yi ta thȧnkȧŋ thəbana.

⁸ Ka ȧŋseth ŋa Kuru aŋ la yi kima kəwur ka aŋyiki yi aŋfɔsɔ ŋa Kuru; ɔwa wuni o wuni ɔ gbəli hɛ wɔŋ ka ȧŋseth ŋa Kuru haŋ ɛfithina tȧmthədɛrəŋ ya aŋmȧleka tȧmthədɛrəŋ ɛ po thas.