Kȧŋȧibinɛ 10 - Ȧŋlemrȧnɛ Ȧfu

¹ Ka i nənk umȧleka ulɔm ubaki mədɛr ɔ thor kəwur ro riyana, kɔ lopra kuru kəfera; abənta afarma aŋ rensa rȧbomp rɔŋ, ka ader rɔŋ rə yi mɔ aret, ɔwa ȧtȧtək tɔŋ tə yi mɔ məkər ma nȧnt.

² Ɔ ba kafa kəlɔl kəkanthɛ ka kȧta kɔŋ, ɔwa ɔ təmər kȧtək kɔŋ kədiyɔ ka kabaŋ-e, yi kȧtək kɔŋ kəmɛrɔ ka aŋgbaŋ,

³ kɔ tela rə rim rəninis, mɔ mȧ ȧŋsɔyila mɔ ŋəra, ɔwa ma ɔ gbelegbele-e, sɛŋ tȧmthədɛrəŋ tə gbɛŋ.

⁴ Ɔwa ma asɛŋ tȧmthədɛrəŋ tə po gbɛŋ-e, i bun gbal, kɛrɛ i təl rim rə wur ro riyana rə pa do rɔmi, Mȧthlɛ tȧpa ȧtȧ asɛŋ tȧmtədɛrəŋ tə po lɔm-e, te gbal ti.

⁵ Ka ɔmaleka ɔwe i nənk ɔ təmȧ ka kȧbȧŋ yi ka aŋgbaŋ-e, ɔ ŋata kȧta kɔŋ kədiɔ ka kȧriyana,

⁶ kɔ gbiŋ ka kɔn ɔwe yi thȧnkȧŋ thəbana, ɔwe təpi ȧkȧriyana yi ɛyɛt bɛ ɛyɛ yi ri, dɛ yi ȧdȧru yi ɛyɛt bɛ ɛyɛ yi ri, dɛ yi kȧbȧŋ yi ɛyɛt bɛ ɛyɛ yi ri, kəpa hɔ, kəkar kə ba hɛ sɔ kə yi.

⁷ Kɛrɛ ka marey mati ma ɔmaleka ɔwe bekȧ tȧmthədɛrəŋ ɔ təp kəfɛŋ-e, aŋgbundu ŋa Kuru aŋ tə lasər mɔlɔ ma ɔ po tɔri ɛbɔy yɔŋ Aŋnȧbi thəpaŋ.

⁸ Ka ȧrim ara i la təl kəwur ro riyana rə kȧl sɔ fɔfȧnɛ mi, rə pa, Kɔ gbasi ȧkȧfȧ kəlɔl kəkanthɛ ȧke yi ka kȧta ka ɔmaleka ɔwe təmȧ ka kȧbȧŋ dɛ yi ka aŋgbaŋ.

⁹ Tiyȧŋ i kɔnɛ ka ɔmaleka, ka i kanɛ kɔ kǝpa, Sɔŋ mi ȧkȧfȧ kəlɔl. Ɔ kanɛ mi, Gbasi ki, ɔwa di ki bɛ; kə tə yɔ akor ka mu kə yi kəroŋkəth, kɛrɛ ka kȧsəŋ ka mu kə tə yi kəbɔthi mɔ rəmay.

¹⁰ Ka i gbasi ȧkȧfȧ kəlɔl ka kȧta ka ɔmaleka, ka i di ki tɛf; ɔwa kə yi ka kəsəŋ kȧmi mɔ rəmay, kɛrɛ ma i po mer ki-e, kə yi kəroŋkəth rokor kȧmi.

¹¹ Ɔwa ɔ kanɛ mi, Munɔ mə ba tə kənabi salata afəm agbȧthi, yi ta tabona-e, ta tənt-e, yi ta abȧy agbȧthi.