Kȧŋȧibinɛ 1 - Ȧŋlemrȧnɛ Ȧfu

¹ Kaŋaibinɛ ka Yisɔs Krayst ȧke Kuru ɔ sɔŋ kɔ, tə kətɔri ɛbɔy yɔŋ mȧtȧy ama ba kəder ka ɔthan ɔwe; ɔwa ɔ som umȧleka kɔŋ tə kətɔri ti ka ȧŋbɔy ŋɔŋ Yɔnȧŋ.

² Ɔwe seri ta ȧrim ra Kuru, yi ta aŋkanɛ ŋa Yisɔs Krayst, yi ta mȧtȧy bɛ ama ɔ nənk.

³ Aruba aŋ yi ta ɔwe mə karaŋ ȧsim ta kanabi ake, dɛ yi ta ŋaŋ aŋa mə təl ti-e, rɛ aŋ kȧl bɛnɛ ȧtȧ a gbal ri, ȧtesoma-e ȧŋlɔkɔ aŋ fat tə kəlasər ti.

⁴ Yɔn, ka ɛchɔch tȧmthədɛrəŋ ya ro Asia. Ta aboŋa aŋ yi do rɔnu, yi məthɔfəl kəwur ka kɔn ɔwe yi, dɛ yi ɔwe la yi, dɛ yi ɔwe yi tə kəder; yi ka ɛyina tȧmthədɛrəŋ ɛyɛ yi rodi ka kawaŋ ka rȧbȧy rɔŋ;

⁵ dɛ yi kəwur ka Yisɔs Kraystȧŋ, ɔwe yi ɔSeri ubɔthi lanɛ, ɔWan utɔtɔkɔ kəwur kətɔŋ ka aŋfi; dɛ yi ɔGbəka ka aŋbȧy bɛ nɔru. Ta kɔn ɔwe bɔthər su-e, ɔwe po bani su ka ɛhakɛ ɛ su kətȧŋȧnɛ ka mȧtir mɔŋ gbeŋ-e,

⁶ ɔwe po səki su rəbȧy, pə yi mɔ-e, afode ŋa mapanth ma Kuru ɔKas kɔŋ. Ta ayiki dɛ yi afɔsɔ ɛ yi do rɔŋɔŋ thȧnkȧŋ thəbana. Amina.

⁷ Kəla, kɔnɔ mə derȧŋ yi turu təfera, ɔwa rəfɔr o rəfɔr rə tə nənk kɔ, dɛ yi ŋa sɔ aŋa raf kɔ; ɔwa tȧbona bɛ ta ȧdȧru tə tə bok ta atɔŋ. Ta pə yi ti yaŋ, Amina.

⁸ Minɛ yi Alfa yi Omeka, ɔMarki ɔ pa, ɔwe yi, dɛ yi ɔwe la yi, dɛ yi ɔwe yi tə kəder, ɔKuru ka afɔsɔ bɛ, kɔn kɔnɔnɛ.

⁹ Minɛŋ, Yɔn, ɔwɔnt yi ɔkas ka nu ka asɔmpanɛ, yi ka rȧbȧy dɛ yi kamuyu ka Yisɔs Kraystȧŋ, i yi ka aŋyel aŋa mə a bont Patmɔs salata ȧrim ra Kuru, yi ta maseri ma Yisɔs Kraystȧŋ.

¹⁰ Ɔwa i po lasǝrnɛ ɔYina ka ȧŋrey ŋa ɔMarki, ka i təl rodarəŋ kȧmi rim rəbana mɔ kəthɛma,

¹¹ rǝ pa hɔ, Minɛ yi Alfa yi Omeka, ɔTɔtɔkɔ yi ɔLəpsɔ; gbal ȧtȧ mə nənk ka areka, ɔwa somra ŋi ka ɛchɔch tȧmthədɛrəŋ, ka ro Ɛfisɔs, ro Smayna, ro Pakamɔm, ro Thayatira, ro Sadis, ro Filadɛlfiya, dɛ yi ro La-odishiya.

¹² Ka i lafthɛ tə kənəŋk ȧrim ara fɔfȧnɛ mi, ɔwa ma i po lafthɛ-e, i nənk təmulɛ ta məbɔŋɔ tȧmthədɛrəŋ;

¹³ ɔwa ukin ɔ yi kətɔŋ ka tamulɛ tȧmthədɛrəŋ ɔwe bȧlȧnɛ mɔ ɔWan ka wuni, kɔ lopra ruma rəbɔli ara bek ka ȧtȧtək tɔŋ, dɛ yi ɔ seknɛ ȧthɛbɛŋ ŋa mɔbɔŋɔ ka aŋkəpət ŋɔŋ.

¹⁴ Aŋfon dɛ yi rȧbomp rɔŋ ɛ yi ɛfera pər mɔ ɛpɔmpɔ; ɛfɔr yɔŋ ɛ yi mɔ nȧnt nəmara;

¹⁵ tatək tɔŋ tə yi mɔ akɛm akelkel, mɔ mə a po thaŋki ŋi rə nȧnt nəsaŋk; ɔwa ȧrim rɔŋ rə yi mɔ katɔŋa ka kəthəntha.

¹⁶ Ɔ wop atɔs tȧmthədɛrəŋ ka kȧta kɔŋ kədiyɔ, ka agbathɔ ŋa ran narəŋ nəwɔŋi nə wur ka kȧsəŋ kɔŋ; ɔwa ader rɔŋ rə yi mɔ mə aret rə gbɛntha rəyaŋ kenteŋ.

¹⁷ Ma i nənk kɔ-e, i fumpɔ ka tatək tɔŋ mɔ i po fi. Kɔ reŋ kȧta kɔŋ kədiɔ ka rȧbomp ra mi, ɔ pa, Te nesa, minɛ yi ɔTɔtɔkɔ yi ɔLəpsɔ.

¹⁸ Minɛ yi ɔKəli thȧbana; i po fi, kɛrɛ kəla i kȧl po ba aŋesəm haŋ thəbana, Amina. Minɛ i ba masapɔ ma ro kərəfi dɛ yi rȧfi.

¹⁹ Tiyȧŋ gbal ȧtȧ mə po nənk, yi ȧtȧ mə yɔnɛ ka-ake, yi mȧtȧy ȧma ba tə kəyɔnɛ rodi.

²⁰ Aŋgbundu ŋa atɔs tȧmthədɛrəŋ ȧtȧ mə po nənk ka kȧta kȧmi kədiyɔ, yi tamulɛ ta mabɔŋɔ tȧmthədɛrəŋ, ŋi aŋe. Atɔs tȧmthədɛrəŋ tə yi aŋkəlȧnɛ ŋa ɛchɔch tȧmthədɛrəŋ, yi tamulɛ tȧmthədɛrəŋ tə yi ɛchɔch tȧmthədɛrəŋ.