Yɔn 8 - Ȧŋlemrȧnɛ Ȧfu

¹ Kɛrɛ Yisɔs ɔ kɔnɛ ka kateŋ ka Ɔlif.

² Ɔwa ka ȧŋrey alɔm-e ɔ der ka ȧŋseth ŋa Kuru bəth bəth, ka aŋfəm bɛ aŋ der ro ŋɔŋ: kɔ yirȧ ɔ thəksa ŋa.

³ Ɔwa aŋkarmɔkɔ yi aŋFarisi aŋ kȧrȧ wuni bom ro ŋɔŋ ɔwe a wop ka kəyɔ kərəp; ma a po təmər kɔ ratɔŋ-e,

⁴ aŋ pa ro ŋɔŋ, Karmɔkɔ, a gbipanɛ ɔwuni bom ɔwe ka aŋfəl ŋa kərəp.

⁵ Ɔwa Mosisȧŋ ɔ yamari su ka ȧŋthɔ, kəpa wuni wunɔŋ a ba tə kədif kɔ məsar: munɔŋ-a to mə pa-e?

⁶ Aŋ pa ȧte tə kəgbɔns kɔ, kȧmȧ aŋ ba tȧy tə kəgbanthir kɔ. Kɛrɛ Yisɔsȧŋ ɔ sanɛ, ɔ gbal yi aŋsəl ŋɔŋ ka ȧŋthɔf.

⁷ Maŋ bȧsər kəyif kɔ-e, ɔ yokanɛ, ɔ pa ro ŋaŋ, Wuni ɔwe te ba ahakɛ kətɔŋ ka nu-e, ta ɔ mɔtha ləmər kɔ ȧsar.

⁸ Ɔwa ɔ kȧl sanɛ, ɔ gbal yi aŋsəl ŋɔŋ ka ȧŋthɔf.

⁹ Maŋ təl ti-e, ɛmerȧ yaŋ ɛ ŋap ŋa, kaŋ wur ukin kin, kətəp ka ɔbaki haŋ ka ɔləpsɔ; aŋ tey Yisɔsȧŋ kɔn son, yi ɔwuni bom ro ɔ təmȧ ratɔŋ.

¹⁰ Ma Yisɔsȧŋ ɔ kȧl yokanɛ-e, ɔ pa ka ɔwuni bom, Reke yi aŋa gbanthir mu-a, wuni kin ɔ sɔŋ hɛ mu mətheri-i?

¹¹ kɔ pa, Hali wuni, Pa. Ka Yisɔsȧŋ ɔ pa ro ŋɔŋ, Minɛ sɔ i sɔŋ hɛ mu mətheri; kɔnɛ, ɔwa te sɔ yɔ ahakɛ.

¹² Ɔwa Yisɔsȧŋ ɔ kȧl fɔfȧnɛ aŋfəm, ɔ pa, Minɛ yi ȧŋmothȧ ŋa ȧdȧru; wuni ɔwe mə tȧŋ mi-e ɔ ba hɛ kəkɔth ka ȧŋsum, kɛrɛ ɔ tə ba ȧŋmothȧ ŋa aŋesəm.

¹³ Tiyȧŋ aŋFarisi aŋ pa ro ŋɔŋ, Munɔ mə gbakiɛnɛ; aŋgbaki a mu aŋ yi hɛ tȧteŋ.

¹⁴ Yisɔs ɔ wosa ɔ pa, Hali i gbakiɛnɛ, aŋgbaki a mi aŋ yi tȧteŋ: ȧtesoma-e, i tȧrȧ ro i wur, ɔwa i tȧrȧ ro mə i kɔ-e; kɛrɛ naŋ nə tɛ hɛ ro i wur, thalɔm ro mə i kɔ-e.

¹⁵ Naŋ nə thonkas mɔ mə nə nənk; minɛ i thonkas hɛ wuni o wuni.

¹⁶ Hali i thonkas wuni, mathoŋkas ma mi mə yi tȧteŋ; kotȧy-e i yi hɛ min son, kɛrɛ ɔKas ɔwe som mi ɔ yi yi minɛ.

¹⁷ Aŋko, ka ȧŋthɔ a nu sɔ a gbal kəpa aŋgbaki ŋa afəm ŋarəŋ aŋ yi tȧteŋ.

¹⁸ Minɛŋ ɔwe gbakiɛnɛ, ɔwa ɔKas ɔwe som mi ɔ gbaki ta ȧtȧ mi.

¹⁹ kaŋ pa ro ŋɔŋ, Reke ɔKas ka mu ɔ yi-e? Yisɔsȧŋ ɔ wosa, Naŋ nə tɛ hɛ mi, nə tɛ hɛ ɔKas kȧmi: bepi nə tȧrȧ mi naŋ-e, nə tə tȧrȧ sɔ ɔKas kȧmi.

²⁰ Yisɔsȧŋ ɔ fɔf ȧsim ȧte ka ɔdɛr ɔbɛnɛ, mɔ mɔ thəksa ka ȧŋseth ŋa Kuru: ɔwa wuni o wuni ɔ wop hɛ kɔ; ȧtesoma-e ȧŋlɔkɔ ŋɔŋ aŋ tha bek hɛ.

²¹ Yisɔsȧŋ ɔ pa ro ŋaŋ, Minɛŋ i ti kɔnɛ, nə tə thɛns mi, ɔwa nə tə fi ka ɛhakɛ ɛ nu; ro mə i kɔ-e, nə gbəli hɛ der ri.

²² Tiyȧŋ aŋYuda aŋ pa, Ɔ tə difnɛ-i, ma ɔ pa, Ro mə i kɔ-e, nə gbəli hɛ der ri-i?

²³ Ɔ pa ro ŋaŋ, Nia nə wur roratha, minɛŋ i wur rokɔm: nia nə yi ka ȧdȧru are; minɛŋ i yi hɛ ka ȧdȧru are.

²⁴ Tiyȧŋ i pa ro nu, nə tə fi ka ɛhakɛ ɛ nu: kotȧy-e bepi nə lanɛ hɛ kəpa minɛ yi kɔn-e, nə tə fi ka ɛhakɛ ɛ nu

²⁵ kaŋ pa ro ŋɔŋ, Mun kanɛ-i? Ka Yisɔsȧŋ ɔ pa ro ŋaŋ, Hali kɔnɔŋ ɔwe i kanɛ nu ka katəp.

²⁶ I ba mȧtȧy məgbathi tə kəpa yi tə kəthoŋkas ta ȧtȧ nu: kɛrɛ ɔwe som mi-e ɔ yi tȧteŋ; ɔwa mȧtȧy ama i təl ro ŋɔŋ mȧ mə i pa ka ȧdȧru.

²⁷ Kɛrɛ pə sɔk hɛ ŋa kəpa ɔ fɔf ta ɔKas.

²⁸ Ka Yisɔsȧŋ ɔ pa ro ŋaŋ, Ma nə po ŋata ɔWan ka wuni, nə tə tȧrȧ kəpa i yɔ hɛ tȧy o tȧy ka ȧŋmerȧ a mi son: kɛrɛ i fɔf mȧtȧy ame mɔ mə ɔKas ɔ thəksa mi.

²⁹ Ɔwa ɔwe som mi ɔ yi yi minɛŋ: ɔKas ɔ tey hɛ mi min son; ȧtesoma-e i yɔ mȧtȧy ama mə bɔnɛs kɔ alɔkɔ bɛ.

³⁰ Ma ɔ fɔf ȧsim ȧte-e, afəm agbȧthi aŋ lanɛ kɔ.

³¹ Tiyȧŋ Yisɔsȧŋ ɔ pa ka aŋYuda aŋa po lanɛ kɔ, Bepi nə po bȧkər ka ȧrim ra mi, nə yi aŋkarande a mi tɛntɛnɛ;

³² ɔwa nə tə tȧrȧ tȧteŋ, ɔwa tȧteŋ tə tə yɔ nu nə yi awuth akom.

³³ Aŋ pa ro ŋɔŋ, Sə yi awuth ŋa Ebraham, sə la hɛ yi atar ka wuni o wuni: to pə som mə pa, A tə yɔ nu awuth akom-e?

³⁴ Yisɔsȧŋ ɔ pa ro ŋaŋ, I kanɛ nu tɛntɛnɛ, wuni o wuni ɔwe mə yɔ ahakɛ ɔ yi utar ka ahakɛ.

³⁵ Kɛrɛ ɔtar ɔ tiyȧ hɛ ka ȧŋseth ŋa ɔmarki kɔŋ thəbana; kɛrɛ ɔwan ɔ tə tiyȧ ri thəbana.

³⁶ Tiyȧŋ bepi ɔWan ɔ səki nu awuth akom-e, nə tə yi awuth akom tɛntɛnɛ.

³⁷ I tȧrȧ kəpa nə yi awuth ŋa Ebraham: kɛrɛ nə thɛns tə kədif mi, ȧtesoma-e ȧrim ra mi rə yirȧ hɛ ka ɛmerȧ ɛ nu.

³⁸ I fɔf ȧte i təl ka ɔKas kȧmi: kɛrɛ naŋ nə yɔ ȧte nə təl ka ɔkas ka nu.

³⁹ Aŋ pa ro ŋɔŋ, Ebraham-əŋ kɔnɔ yi ɔkas kȧsu. Yisɔsȧŋ ɔ pa ro ŋaŋ, Bepi nə yi awuth ŋa Ebraham-e, nə tə yɔ mȧyɔs ma Ebraham.

⁴⁰ Kɛrɛ nə thɛns tə kədif mi, wuni ɔwe po kanɛ nu tȧteŋ, ȧte i po təl ka Kuru: Ebraham-əŋ ɔ la hɛ yɔ ȧte.

⁴¹ Naŋ nə yɔ mȧyɔs ma ɔkas ka nu. Kaŋ pa ro ŋɔŋ, A kom hɛ su rə kərəp, sə ba uKas ukin, Kurɔŋ kɔnɔŋ.

⁴² Yisɔsȧŋ ɔ pa ro ŋaŋ, Bepi Kurɔŋ ɔ yi ɔKas ka nu-e, nə tə bɔthər mi: ȧtesoma-e, i wur kəwur ka Kuru; i der hɛ ka ȧŋmerȧ a mi gbeŋ, kɛrɛ kɔnɔ som mi.

⁴³ To som nə te tȧrȧ kafɔf ka mi-e? Hali ma nə te gbəli wop ȧrim ra mi.

⁴⁴ Nia nə yi ka ɔkas ka nu Sethani, ɔwa ɛfela ya ɔkas ka nu yɛ nə yema yɔ. Ɔ yi udif kȧbi ka katəp, ɔ təmȧ hɛ ka tȧteŋ, pəkasifɛ tȧteŋ tə yi hɛ ro ŋɔŋ. Ma ɔ fɔf rəyem-e, ɔ fɔf ta atɔŋ: ȧtesoma-e uyem wɔŋ, yi ɔkas kati.

⁴⁵ Kɛrɛ ma i kanɛ nu tȧteŋ, nə lanɛ hɛ mi.

⁴⁶ Wuni reke kətɔŋ ka nu ɔ gbəli sɔŋ mi mətheri ta ahakɛ-e? Ɔwa bepi i kanɛ nu tȧteŋ, kɔyɛŋ nə te mi lanɛ-e?

⁴⁷ Wuni ɔwe yi ka Kuru ɔ təl ȧsim ta Kuru: tesom nə təl hɛ ti, pəkasifɛ nə yi hɛ ka Kuru.

⁴⁸ AŋYuda aŋ pa ro ŋɔŋ, Sə fɔf hɛ ɔlompi ma sə pa mə yi uSamariya-i, ɔwa mə ba ukərəfi-i?

⁴⁹ Yisɔsȧŋ ɔ pa, I ba hɛ ukərəfi: i yikis gbo ɔKas kȧmi, ɔwa nia nə sambos mi.

⁵⁰ Minɛŋ i thɛns hɛ aŋyiki a mi gbeŋ: ukin ɔ yi ri ɔwe mə thɛns aŋyiki a mi, yi ɔwe mə gbəka ŋi.

⁵¹ I kanɛ nu tɛntɛnɛ, Bepi wuni ɔ wop ȧrim ra mi, ɔ nənk hɛ rafi thəbana.

⁵² AŋYuda aŋ pa, Ka-ake sə tȧrȧ kəpa mə ba ukərəfi. Ebraham-əŋ ɔ po fi, yi Aŋnȧbi: kɛrɛ munɔ mə pa, Bepi wuni ɔ wop ȧrim ra mi, rəfi rə wop hɛ kɔ thəbana.

⁵³ Munɔ mə thasi Ebraham ɔkas kȧsu ɔwe fi, ɔwa Aŋnȧbi aŋ po fi: kanɛ mə thunthəranɛ-e?

⁵⁴ Yisɔsȧŋ ɔ pa, Bepi i yikisnɛ-e, aŋyiki a mi aŋ yi kətiŋ; ɔKas kȧmi kɔnɔ mə yikis mi; ta ɔwe nə pa ɔ yi ɔKuru ka nu.

⁵⁵ Ɔwa nia nə tɛ hɛ kɔ, kɛrɛ minɛ i tȧrȧ kɔ: ɔwa bepi i pa i tɛ hɛ kɔ-e, i ti yi uyem mɔ niaŋ: kɛrɛ i tȧrȧ kɔ, ɔwa i wop ȧrim rɔŋ.

⁵⁶ Ebraham-əŋ ɔkas ka nu, pə bɔnɛ kɔ tə kənəŋk ȧŋrey a mi, ɔwa ɔ nənk ŋi, ka pə bɔnɛ kɔ.

⁵⁷ AŋYuda aŋ pa ro ŋɔŋ, Munɔ mə ba hɛ ras təren təgba tərəŋ tɔfɔt, ɔwa mə po nənk Ebrahamȧŋ-i?

⁵⁸ Yisɔsȧŋ ɔ pa ro ŋaŋ, I kanɛ nu tɛntɛnɛ, Yeŋka a kom Ebraham-əŋ, I yi.

⁵⁹ kaŋ gbasi məsar tə kələməs kɔ: kɛrɛ Yisɔsȧŋ ɔ maŋknɛ, kɔ wur ka ȧŋseth ŋa Kuru, ɔ thas kətɔŋ ka ŋaŋ, ɔ kɔnɛ.