Yɔn 5 - Ȧŋlemrȧnɛ Ȧfu

¹ Kədarəŋ ka mȧtȧy ame met ma aŋYuda mə fumpɔ: ka Yisɔs ɔ kɔnɛ ro Yerusalɛm.

² Ɔwa abunth aŋ yi ro Yerusalɛm aŋa mə a bont Bɛthɛsda ka kaHibru, aŋ ba ɛgbənthəŋ tamath. Ambunth aŋe aŋ fȧtȧnɛ ka ɔdɛr ro ma thila təlɔmɛ.

³ Ka ɛgbənthəŋ ɛye-e, afəm agbȧthi aŋa yi atuy aŋ fənthȧ ri, afith-o, atətkɛ-o, agbɛba-o, aŋ kar kȧborȧ borȧ ka ȧmȧnt.

⁴ kotȧy-e alɔkɔ alɔm wurɔ ɔ tə thor ka ȧŋbunth ɔ bora bora ȧmȧnt: ɔwa wuni o wuni ɔwe mə mɔtha wɔŋ ka ȧmȧnt-e kədarəŋ ka a po bora bora ma-e, ɔ sɔthɔ kəyeŋk mədɛr.

⁵ Ka ulaŋgba ulɔm ɔ yi ri ɔwe ba ratu ta təren kəgba tɔfɔt tamthərɛsas.

⁶ Ma Yisɔsȧŋ ɔ nənk kɔ ɔ fənthȧ ri-e, ɔwa ɔ tȧrȧ kəpa ɔwoni thɔŋ ɔ yi yaŋ-e, ɔ pa ro ŋɔŋ, Mə yema a yenkəs mu-i?

⁷ Ka ɔboma ɔ pa, Pa, i ba hɛ wuni ɔwe mə bot mi ka ȧŋbunth bepi a bora bora ȧmȧnt: kɛrɛ ma i yi ka kader-e, ulɔm ɔ mɔtha mi ri thor.

⁸ Yisɔsȧŋ ɔ pa ro ŋɔŋ, Yokanɛ, gbasi kafənt ka mu mə kɔth.

⁹ Ka ɔlɛmp wati ɔlaŋgba ɔ sɔthɔ kəyeŋk mədɛr, ɔ gbasi kafənt kɔŋ, ɔ kɔth. Aŋrey ŋati aŋ yi aŋsabath.

¹⁰ Tiyȧŋ aŋYuda aŋ pa ka ɔlaŋgba ɔwe a yenkəs, Pə lomp hɛ kȧmȧ mə kera kafənt ka mu ka aŋsabath.

¹¹ Ɔ pa ro ŋaŋ, Kɔnɔ ɔwe yenkəs mi-e, ɔ pa ro mi, Gbasi kafənt ka mu, mə kɔth.

¹² kaŋ yif kɔ, Kanɛ yi ɔwuni ɔwe pa ro mu, Gbasi kafənt ka mu, mə kɔth-e?

¹³ Kɛrɛ ɔlaŋgba ɔwe a yenkəs ɔ tɛ hɛ kɔ; kotȧy-e Yisɔsȧŋ ɔ wur ri, ȧtesoma-e afəm agbȧthi aŋ yi ka ɔdɛr wati.

¹⁴ Kədarəŋ kati ma Yisɔsȧŋ ɔ bəp ɔlaŋgba ka ȧŋseth ŋa Kuru, ɔ pa ro ŋɔŋ, Kəla a po mu yenkəs: te sɔ yɔ ahakɛ, thani tȧy tələs təthasi ȧte tə tə wop mu.

¹⁵ Ɔlaŋgba ɔ kɔnɛ, ɔ kanɛ aŋYuda kəpa Yisɔsȧŋ kɔnɔ po yenkəs kɔ.

¹⁶ Ta ȧtȧy ȧte aŋYuda aŋ sɔmpa Yisɔsȧŋ, pəkasifɛ ɔ po yɔ mȧtȧy ame ka aŋsabath.

¹⁷ Kɛrɛ Yisɔsȧŋ ɔ pa ro ŋaŋ, ƆKas kȧmi ɔ yɔ məpanth haŋ ka-ake, ɔwa minɛ sɔ i yɔ məpanth.

¹⁸ Tiyȧŋ aŋYuda aŋ bȧr gbo thɛns tə kədif kɔ, pəkasifɛ pə yi hɛ gbo ɔ ləsər aŋsabath, kɛrɛ ma ɔ pa sɔ Kurɔŋ ɔ yi ɔKas kɔŋ gbeŋ-e, pə yi mɔ ɔ thunthəranɛ Kuru.

¹⁹ Yisɔsȧŋ ɔ pa ro ŋaŋ, Tɛntɛnɛ i kanɛ nu, ɔWan ɔ gbəli hɛ yɔ tȧy o tȧy ka aŋfɔsɔ ŋɔŋ, ɔ gbəli gbo yɔ ȧte ɔ nənk ɔKas ɔ yɔ: kotȧy-e mȧtȧy ama ɔ yɔ-e, ma ɔWan mɔ yɔ sɔ,

²⁰ Ȧtesoma-e ɔKas ɔ bɔthər ɔWan, ɔ tɔri kɔ mȧtȧy bɛ ama kɔnɔ ɔ yɔ: ɔwa ɔ tə tɔri kɔ məpanth məbana məthasi ame, kȧmȧ nə kabanɛ.

²¹ Mɔ mə ɔKas ɔ yokas aŋfi, dɛ ɔ kəlis ŋa-e, yaŋ sɔ ɔWan ɔ kəlis ɔwe ɔ yema.

²² ƆKas ɔ thonkas hɛ wuni o wuni, kɛrɛ ɔ po sɔŋ kathoŋkas bɛ ka ɔWan:

²³ kȧmȧ afəm bɛ aŋ yikis ɔWan mɔ mə aŋ yikis ɔKas. Kɔnɔ ɔwe mə te yikis ɔWan, ɔ yikis hɛ ɔKas ɔwe som kɔ.

²⁴ Tɛntɛnɛ i kanɛ nu, Kɔnɔ ɔwe mə təl ȧrim ra mi, ɔwa ɔ lanɛ ɔwe som mi-e, ɔ ba aŋesəm thəbana, ɔ ba hɛ tə kəsɔthɔ mətheri; kɛrɛ ɔ po thas rəfi kəkɔ ka aŋesəm.

²⁵ I kanɛ nu tɛntɛnɛ, Ȧŋlɔkɔ aŋ tə der, ɔwa aŋ yi thɔŋ ka-ake, ma aŋfi aŋ tə təl ȧrim ra ɔWan ka Kuru; ɔwa ŋaŋ aŋa mə təl aŋ tə kəli.

²⁶ kotȧy-e mɔ mə ɔKas ɔ ba aŋesəm ka kɔn kɔnɔnɛ, yaŋ sɔ ɔ po sɔŋ ɔWan kȧmȧ kɔnɔ sɔ ɔ ba aŋesəm ka kɔn kɔnɔnɛ;

²⁷ kɔ po sɔŋ kɔ afɔsɔ tə kəthoŋkas afəm sɔ, pəkasifɛ ɔ yi ɔWan ka wuni.

²⁸ Te nu kabanɛ ta ȧte; kotȧy-e ȧŋlɔkɔ aŋ tə der, ma aŋfi sɛŋk aŋa yi ka taboma aŋ tə təl ȧrim rɔŋ,

²⁹ ɔwa aŋ tə wur ri, ŋaŋ aŋa po yɔ ɔfinɔ, aŋ tə yokanɛ ka aŋesəm, ɔwa ŋaŋ aŋa po yɔ ɔləs, aŋ tə yokanɛ ka mətheri.

³⁰ Minɛŋ, i gbəli hɛ yɔ tȧy o tȧy ka aŋfɔsɔ a mi; mɔ mə i təl, ya mə i thonkas; ɔwa mathoŋkas ma mi mə yi məlompi; pəkasifɛ i thɛns hɛ mȧselɔ ma mi, kɛrɛ i thɛns gbo mȧselɔ ma ɔKas ɔwe som mi.

³¹ Bepi i gbaki ta min minɛnɛ, aŋgbaki a mi aŋ yi hɛ tȧteŋ.

³² Ulɔm ɔ yi ɔwe mə gbaki ta ȧtȧ mi, ɔwa i tȧrȧ kəpa aŋgbaki aŋa mɔ gbaki ta ȧtȧ mi aŋ yi tȧteŋ.

³³ Nə som ka Yɔn, ɔwa ɔ seri ta tȧteŋ.

³⁴ Kɛrɛ aŋgbaki aŋa i wop aŋ wur hɛ ka wuni kəpet; kɛrɛ i fɔf mȧtȧy ame kȧmȧ nə gbəli kisi.

³⁵ Kɔnɔ yi amotha aŋa gbɛntha finɔ, ɔwa ta alɔkɔ agbut nə selɔ tə kəyasanɛ yi məbɔnɛ ka ȧŋmothȧ ŋɔŋ.

³⁶ Kɛrɛ i ba agbaki aŋa yi abana pəthas, aŋgbaki ŋa Yɔn; kotȧy-e mapanth ama ɔKas ɔ sɔŋ mi kȧmȧ i pons ma, mapanth mati gbeŋ ama i yɔ, mə seri ta ȧtȧ mi, kəpa ɔKas ɔ po som mi.

³⁷ Ka ɔKas kɔn kɔnɔnɛ, ɔwe som mi ɔ po gbaki ta ȧtȧ mi. Naŋ nə tha təlȧ hɛ ȧrim rɔŋ hali, nə tha nənk hɛ mȧbȧlȧnɛ mɔŋ.

³⁸ Ɔwa ȧrim rɔŋ rə tiyȧ hɛ ka ɛmerȧ ɛ nu, kotȧy-e nə selɔ hɛ tə kəlanɛ kɔnɔ ɔwe ɔ po som.

³⁹ Nə thɛns ka mȧgbal, pəkasifɛ nə nanɛ nə tə sɔthɔ ri aŋesəm thəbana; ɔwa mȧgbal ame mȧ mə sɔŋ məseri ta ȧtȧ mi.

⁴⁰ Kɛrɛ nə selɔ hɛ der ro mi, kȧmȧ nə sɔthɔ aŋesəm.

⁴¹ I wop hɛ yiki kəwur ka wuni kəpet.

⁴² Kɛrɛ i tȧrȧ nu, kəpa nə ba hɛ mabɔthər ma Kuru ka ɛmerȧ ɛ nu.

⁴³ I der ka ȧŋes ŋa ɔKas kȧmi, kɛrɛ nə malanɛ hɛ mi; bepi wuni lɔm ɔ der ka ȧŋes ŋa kɔn kɔnɔnɛ, nə tə malanɛ kɔ.

⁴⁴ To mə nə gbəli lanɛ-e, ma mə nə sɔthɔ ayiki wuni kin ka ulɔm-e, kɛrɛ nə thɛns hɛ aŋyiki aŋa wur ka Kuru son-e?

⁴⁵ Te nu nanɛ kəpa i ti gbanthir nu ka ɔKas; ukin ɔ yi ri ɔwe mə gbanthir nu, Mosisȧŋ kɔnɔŋ, ɔwe nə po sɛlinɛ.

⁴⁶ kotȧy-e bepi nə po lanɛ Mosisȧŋ-e, nə tə lanɛ mi; ȧtesoma-e ɔ gbal ta ȧtȧ mi.

⁴⁷ Kɛrɛ bepi nə lanɛ hɛ mȧgbal mɔŋ-e, to mə nə gbəli lanɛ ȧsim ta mi-e?