Yɔn 4 - Ȧŋlemrȧnɛ Ȧfu

¹ Ma ɔMarki ɔ tȧrȧ kəpa aŋFarisi aŋ təl kəpa Yisɔsȧŋ ɔ sɔthɔ ɔwa ɔ baftays akarande agbȧthi pəthasi Yɔnȧŋ,

² hali ma Yisɔsȧŋ kɔn kɔnɔnɛ ɔ baftays hɛ ŋa, kɛrɛ aŋkarande ŋɔŋ gbo ŋa mə baftays aŋfəm,

³ Yisɔsȧŋ ɔ wur ro Yudia, ɔ kȧl kɔ ro Kalili.

⁴ Ɔwa tha gbo ɔ thas ro Samaria.

⁵ kɔ bek ka kȧpet ka ro Samaria ȧke a bont Sikar, kə fat ȧŋthɔf aŋa Yekɔb-əŋ ɔ sɔŋ Yosɛf-əŋ ɔwan kɔŋ.

⁶ Kȧləmp ka Yekɔb kə yi ri. Ma ȧŋbiyas aŋ lela Yisɔsȧŋ, ɔ yirȧ ka kȧləmp rayɛr: pə yi ka ȧŋlɔkɔ ŋa aret kəgbep.

⁷ Ka wuni bom ka ro Samaria ɔ der tə kəkuth: ɔwa Yisɔsȧŋ ɔ pa ro ŋɔŋ, Yer mi i mun.

⁸ kotȧy-e aŋkarande ŋɔŋ aŋ po kɔnɛ ro pet tə kəway yɛt ɛdi.

⁹ Ka ɔwuni bom ka ro Samaria ɔ pa ro ŋɔŋ, To som munɔ mun Yuda mȧ mə tholir mi kəmun, minɛ yi ubɛra ka ro Samaria-e? (kotȧy-e aŋYuda aŋ ba hɛ məmanɛ yi aŋSameriya).

¹⁰ Yisɔsȧŋ ɔ pa ro ŋɔŋ, Bepi mə tȧrȧ ȧŋboya ŋa Kuru, yi ɔwe pa ro mu, Yer mi i mun, mə tə yif kɔ naŋ, ɔwa ɔ tə sɔŋ mu ȧmȧnt ma aŋesəm.

¹¹ Ɔbɛra ɔ pa ro ŋɔŋ, Pa, mə ba hɛ rəka rəkuthȧ, ɔwa kȧləmp kə bɔlɔŋ: reke mȧ mə sɔthɔ ȧmȧnt ma aŋesəm mati-e?

¹² Munɔ mə yi uthasi Yekɔb ɔkas ka su-i, ɔwe sɔŋ su kȧləmp, kɔn kɔnɔnɛ ɔ mun ri, yi aŋwuth ŋɔŋ, yi tasɛm tɔŋ-i?

¹³ Ka Yisɔs ɔ pa ro ŋɔŋ, Wuni o wuni ɔwe mə mun ȧmȧnt ame-e, rəmun rə tə kȧl wop kɔ:

¹⁴ kɛrɛ wuni o wuni ɔwe mə mun ȧmȧnt ama i ti sɔŋ kɔ-e, rəmun rə wop hɛ kɔ sɔ thəbana; kɛrɛ ȧmȧnt ama i ti sɔŋ kɔ mə tə səkɛ rəfɔr ra mȧnt rokor kɔŋ, ara mə gbuthɛ ka aŋesəm thəbana.

¹⁵ Ɔbɛra ɔ pa ro ŋɔŋ, Pa, sɔŋ mi ȧmȧnt ame, kȧmȧ rəmun rə te sɔ bȧk mi, ɔwa kȧmȧ i te sɔ der ɔbɔli anɔ tə kəkuth.

¹⁶ Yisɔsȧŋ ɔ pa ro ŋɔŋ, Kɔnɛ, tela ɔwos mu, kȧmȧ mə kȧl der.

¹⁷ Ɔbɛra ɔ pa, I ba hɛ wos. Yisɔsȧŋ ɔ pa ro ŋɔŋ, Mə pa ɔlompi, I ba hɛ wos:

¹⁸ ȧtesoma-e mə po ba awos tamath: ɔwa ɔwuni ɔwe mə ba ka-ake ɔ yi hɛ ɔwos mu: ka ȧte mə fɔf tȧteŋ.

¹⁹ Ɔbɛra ɔ pa ro ŋɔŋ, Pa, i nənk kəpa mə yi unabi.

²⁰ Aŋkas a su aŋ bȧtho ka kateŋ ake; kɛrɛ naŋ nə pa afəm aŋ mar bȧtho ro Yerusalɛm.

²¹ Yisɔsȧŋ ɔ pa ro ŋɔŋ, Bithaŋ, lanɛ mi, ȧŋlɔkɔ aŋ tə der, ka aŋa mə nə te bȧtho ɔKas ka kateŋ ake, thalɔm ro Yerusalɛm.

²² Naŋ nə bȧtho ara nə te tȧrȧ: saŋ sə bȧtho ara sə tȧrȧ, ȧtesoma-e kəkisi kə wur ka aŋYuda.

²³ Kɛrɛ ȧŋlɔkɔ aŋ tə der, ɔwa aŋ yi thɔŋ ka-ake, ma afəm aŋa mə bȧtho tȧteŋ aŋ tə bȧtho ɔKas rə ȧmerȧ yi rə tȧteŋ: kotȧy-e ɔKas ɔ fela ȧŋbȧtho awunɔŋ.

²⁴ Kurɔŋ ɔ yi ɔYina: ɔwa aŋfəm aŋa mə bȧtho kɔ aŋ ba kəbatho kɔ rə ȧmerȧ yi rə təteŋ.

²⁵ Ɔbɛra ɔ pa ro ŋɔŋ, I tȧrȧ kəpa Mɛsayaŋ ɔ tə der, ɔwe a bont Krayst; bepi ɔ po der ɔ tə kanɛ su mȧtȧy bɛ.

²⁶ Yisɔsȧŋ ɔ pa ro ŋɔŋ, Minɛ mə fɔfȧnɛ mu, minɛŋ.

²⁷ Ȧŋlɔkɔ ŋati aŋkarande ŋɔŋ aŋ der, kaŋ kabanɛ mɔ mɔ fɔfȧnɛ ɔwuni bom: kɛrɛ wuni o wuni ɔ yif hɛ, Ko mȧ mə thɛns-e, thalɔm, kɔyɛŋ mȧ mə fɔfȧnɛ kɔ-e?

²⁸ Ka ɔbɛra ɔ tey ȧŋbɔl akutha ŋɔŋ, ɔ kɔnɛ ro pet, ɔ pa ka aŋfəm,

²⁹ Der nu kəli wan duni ɔwe kanɛ mi mȧtȧy bɛ ama i po yɔ-e, ɔKrayst kɔn tha ɔwe-i?

³⁰ Aŋfəm aŋ wur ro pet, aŋ der ro ŋɔŋ.

³¹ Ka kətɔŋ kati, aŋkarande ŋɔŋ aŋ nɛmthɛnɛ kɔ, aŋ pa, Karmɔkɔ di.

³² Kɛrɛ ɔ pa ro ŋaŋ, I ba ra rədi tə kədi ara nə te tȧrȧ.

³³ Ka aŋkarande aŋ yifəthanɛ, Wuni ɔ kȧrȧ kɔ rəka tə kədi ba?

³⁴ Yisɔsȧŋ ɔ pa ro ŋaŋ, Ɛdi ɛ mi ɛ yi tə kəyɔ mȧselɔ ma ɔwe som mi, yi tə kəpons mapanth mɔŋ.

³⁵ Nə pa hɛ, Pə tiyȧ ras yof yanlɛ yeŋka karɔk kə bek-i? Kəla, i kanɛ nu, Lȧkthi ɛfɔr ɛ nu, ɔwa kəli atɔr; kotȧy-e tə po thɔ lɔl tə kərɔk.

³⁶ Kɔnɔ ɔwe mə rɔk-e ɔ sɔthɔ ȧŋrȧm, ɔwa ɔ thoŋkla məkomi ta aŋesəm thəbana: kȧmȧ kɔnɔ ɔwe mə sak yi kɔnɔ ɔwe mə rɔk aŋ ba məbɔnɛ kətəma win.

³⁷ Di kati aŋ fɔf tȧteŋ aŋa pa, Wuni kin ɔ sak, kɛrɛ ulɔm ɔ rɔk.

³⁸ I som nu tə kərɔk ro nə te yɔ məpanth: afəm alɔm aŋ yɔ məpanth ɔwa naŋ nə wɔŋ ka mapanth ma ŋaŋ.

³⁹ Ka aSamariya agbȧthi ka kȧpet kati aŋ lanɛ Yisɔsȧŋ salata tapa ta ɔbɛra, ma ɔ pa, Ɔ kanɛ mi mȧtȧy bɛ ama i la yɔ.

⁴⁰ Ɔwa ma aŋSameriya aŋ der ro ŋɔŋ, aŋ nɛmthɛnɛ kɔ tə kəyira ro ŋaŋ, kɔ yirȧ ri mərey mȧrəŋ.

⁴¹ Ɔwa afəm alɔm agbȧthi aŋ lanɛ salata ȧsim tɔŋ gbeŋ;

⁴² aŋ pa ka ɔbɛra, Ka ake sə lanɛ, pə yi hɛ salata tapa ta mu; kotȧy-e saŋ sə po təlȧ kɔ, ɔwa sə tȧrȧ kəpa təteŋ ɔwe ɔ yi ɔKrayst ɔKisis ka ȧdȧru.

⁴³ Kədarəŋ ka mərey mȧrəŋ Yisɔsȧŋ ɔ wur ri ɔ kɔnɛ ro Kalili.

⁴⁴ kotȧy-e Yisɔsȧŋ kɔn kɔnɔnɛ ɔ gbaki kəpa unabi ɔ ba hɛ yiki ka ȧŋthɔf ŋɔŋ.

⁴⁵ Ɔwa ma ɔ bek ro Kalili-e, aŋKalili aŋ selənɛ kɔ, maŋ po nənk mȧtȧy bɛ ama ɔ yɔ ro Yerusalɛm ka amet, kotȧy-e ŋa sɔ aŋ kɔ ka amet.

⁴⁶ Ka Yisɔsȧŋ ɔ der ro Kena ake ro Kalili, ro ɔ po səki ȧmȧnt məwain. Ɔwa wan uruni ka uyola ulɔm, ɔ tu ro Kepaniyɔm.

⁴⁷ Ma ɔ təl kəpa Yisɔsȧŋ ɔ wur ro Yudia ɔ der ro Kalili, ɔ kɔ ro ŋɔŋ, ɔ nɛmthɛnɛ kȧmȧ ɔ kɔ yenkəs ɔwan kɔŋ uruni: ȧtesoma-e ɔ təmȧ tə kəfi.

⁴⁸ Yisɔsȧŋ ɔ pa ro ŋɔŋ, Thambe mə nənk ɛmisali yi mȧtȧy məkabanɛ, mə selɔ hɛ tə kəlanɛ.

⁴⁹ Ɔyola ɔ pa ro ŋɔŋ, Pa, der yeŋka ɔwan kȧmi ɔ fi.

⁵⁰ Yisɔsȧŋ ɔ pa ro ŋɔŋ, Kɔnɛ, ɔwan ka mu ɔ kəli. Ɔwa ɔ lanɛ ȧrim ara Yisɔs ɔ kanɛ kɔ, kɔ kɔnɛ.

⁵¹ Ma ɔ bɔ kɔnɛ ɛbɔy yɔŋ aŋ gbanɛ kɔ, aŋ kanɛ kɔ, Ɔwan ka mu ɔ kəli.

⁵² kɔ yif ŋa ta ȧŋlɔkɔ pə təp kəfisa kɔ. Aŋ pa ro ŋɔŋ, Dis ka ȧŋlɔkɔ aŋa bekȧ tȧmthədɛrəŋ ka kagbat ka aŋgbeleŋ, madɛr məgbipanɛ mə ter kɔ.

⁵³ Ka ɔkas ɔ tȧrȧ kəpa ŋiəŋ gbeŋ ȧŋlɔkɔ aŋa Yisɔsȧŋ ɔ pa ro ŋɔŋ, Ɔwan ka mu ɔ kəli; ɔwa kɔnɔŋ yi kabɔr kɔŋ bɛ aŋ lanɛ.

⁵⁴ Aŋe ŋa bekȧ yɛrəŋ ka ɛmisali ɛyɛ Yisɔsȧŋ ɔ yɔ, ma ɔ wur ro Yudia tə kəkɔ ro Kalili.