Yɔn 3 - Ȧŋlemrȧnɛ Ȧfu

¹ Ɔwa wuni ka aŋFarisi ɔ yi ri, ȧŋes ŋɔŋ ŋə yi Nikodimɔs ugbəka ka aŋYuda.

² Ɔwe ɔ der ka Yisɔs tȧtȧk, ɔ pa ro ŋɔŋ, Karmɔkɔ, sə tȧrȧ kəpa mə yi ukarmɔkɔ kəwur ka Kuru: ȧtesoma-e wuni o wuni ɔ gbəli hɛ yɔ ɛmisali ɛyɛ munɔ mə yɔ-e, thambe Kurɔŋ ɔ yi yi kɔn.

³ Yisɔs ɔ wosa, ɔ pa ro ŋɔŋ, I kanɛ mu tɛntɛnɛ, wuni ɔ gbəli hɛ nənk rȧbȧy ra Kuru, thambe a kȧl kom kɔ ɔfu.

⁴ Nikodimɔs ɔ pa ro ŋɔŋ, To a gbəli kom wuni bepi ɔ po bȧk-e? Ɔ gbəli sɔ wɔŋ ka akor ka ɔkara kɔŋ tə kəkal kom kɔ-i?

⁵ Yisɔs ɔ pa ro ŋɔŋ, Tɛntɛnɛ, i kanɛ mu, wuni ɔ gbəli hɛ wɔŋ ka rȧbȧy ra Kuru, thambe a kom kɔ rɛ mȧnt yi ɔYina.

⁶ Ara a kom ka madɛr mədɛr maŋ, ara a kom ka ɔYina uyina wɔŋ.

⁷ Te kabanɛ ȧte i kanɛ mu, Tha a kȧl kom mu ɔfu.

⁸ Aŋfef aŋ sɔŋ ro aŋ yema, ɔwa mə təlȧ ȧŋsɔnkɔ ŋati, kɛrɛ mə tɛ hɛ ro aŋ wur, mə tɛ hɛ ro mə aŋ kɔ-e; ya pə yi sɔ yi wuni o wuni ɔwe a kom ka ɔYina.

⁹ Nikodimɔs ɔ yif kɔ, To mȧtȧy ame mə gbəli yi-e?

¹⁰ Yisɔs ɔ pa ro ŋɔŋ, Munɔ mə yi ukarmɔkɔ ka aŋIsrɛl, ɔwa mə tɛ hɛ mȧtȧy ame-i?

¹¹ Tɛntɛnɛ i kanɛ mu, Sə fɔf ȧte sə tȧrȧ, ɔwa sə gbaki ta ȧte sə po nənk; kɛrɛ nə wop hɛ aŋgbaki a su.

¹² Bepi i kanɛ nu mȧtȧy ma ȧdȧru-e nə lanɛ hɛ, to mə nə gbəli lanɛ bepi i kanɛ nu mȧtȧy ma ro riana-e?

¹³ Wuni o wuni ɔ tha ŋat hɛ ro riyana, thambe kɔn ɔwe thor kəwur ro riyana, kɔnɔ yi ɔWan ka wuni ɔwe yi ro riyana.

¹⁴ Ɔwa mɔ mə Mosisȧŋ ɔ ŋata ȧŋbok ro wula, ya a ba sɔ tə kəŋata ɔWan ka wuni

¹⁵ kȧmȧ wuni o wuni ɔwe mə lanɛ kɔ ɔ te dinɛ, kɛrɛ ɔ sɔthɔ aŋesəm thəbana.

¹⁶ Ȧtesoma-e ya Kurɔŋ ɔ bɔthər ȧdȧru, haŋ ɔ sɔnd ɔWan kɔŋ ɔ kom gbo son, kȧmȧ wuni o wuni ɔwe lanɛ kɔ ɔ te dinɛ, kɛrɛ ɔ sɔthɔ aŋesəm thəbana.

¹⁷ kotȧy-e Kuru ɔ som hɛ ɔWan kɔŋ ka ȧdȧru tə kəthoŋkas ȧdȧru, ɔ som kɔ tə kəkisis ȧdȧru.

¹⁸ Ɔwe mə lanɛ kɔ-e ɔ sɔthɔ hɛ mətheri, kɛrɛ ɔwe te lanɛ kɔ-e, a po kɔ sɔŋ mətheri, pəkasifɛ ɔ tha lanɛ hɛ ka ȧŋes ŋa ɔWan ka Kuru ɔ kom gbo son.

¹⁹ Ɔwa matheri mi ame, kəpa amotha aŋ der ka ȧdȧru, kɛrɛ afəm aŋ bɔthər asum pəthasi amotha, ȧtesoma-e mȧyɔs maŋ mə yi mələs.

²⁰ kotȧy-e wuni o wuni ɔwe mə yɔ ɔləs ɔ gbɛŋa ȧŋmothȧ, ɔwa ɔ de hɛ ka ȧŋmothȧ ta thani mələs mɔŋ mə ŋaibɛ.

²¹ Kɛrɛ ɔwe mə yɔ tȧteŋ ɔ der ka ȧŋmothȧ, kȧmȧ mȧyɔs mɔŋ mə tɔrinɛ kəpa, ɔ yɔ ma ka aŋfɔsɔ ŋa Kuru.

²² Kədarəŋ ka mȧtȧy ame, Yisɔsȧŋ yi aŋkarande ŋɔŋ aŋ der ka ȧŋthɔf ŋa ro Yudia: kɔ yi ri yi ŋaŋ, ɔwa ɔ baftays aŋfəm.

²³ Yɔnȧŋ sɔ ɔ bɔ baftays ro Anɔn ro Salim rayɛr, ȧtesoma-e mȧnt məgbathi mə yi ri; ka aŋfəm aŋ der, a baftays ŋa.

²⁴ kotȧy-e a tha bot hɛ Yɔnȧŋ ka ȧŋseth ŋa tərəŋka.

²⁵ Ka ȧthonka aŋ təp kətɔŋ ka aŋkarande ŋa Yɔn yi uYuda ta kəgbili.

²⁶ kaŋ der ka Yɔn, aŋ pa ro ŋɔŋ, Karmɔkɔ, kɔn ɔwe yi yi munɔŋ ro Yɔrdan mɔri, ta ɔwe mə sɔŋ məseri-e, kɔnɔ sɔ ɔ baftays, ɔwa afəm agbȧthi aŋ der ro ŋɔŋ.

²⁷ Yɔnȧŋ ɔ wosa, ɔ pa, Wuni ɔ gbəli hɛ sɔthɔ koko thambe ɔ sɔthɔ ri kəwur ro riyana.

²⁸ Naŋ nə yi maseri ma mi, kəpa i pa, I yi hɛ ɔKrayst, kɛrɛ a som mi rodi kɔŋ.

²⁹ Kɔnɔ ɔwe ba ɔbɛra ufath-e kɔnɔ yi ɔruni ufath: kɛrɛ ɔyathki ka ɔruni ufath, ɔwe təmȧ kɔ rayɛr ɔwa ɔ təlȧ kɔ-e, ɔ ba məbɔnɛ məbana ta kətəl ȧrim ra ɔruni ufath: tiyȧŋ mabɔnɛ ma mi ame mə gbenthis.

³⁰ Kɔnɔ ɔ tə bȧr yi ubana, kɛrɛ minɛŋ i ti gbəŋkɛ.

³¹ Kɔnɔ ɔwe wur rokɔm ɔ yi rokɔm ka bɛ: kɔnɔ ɔwe yi ka ȧdȧru ɔ yi ka ȧdȧru, ɔwa ɔ fɔf ka ȧdȧru: kɔnɔ ɔwe wur ro riyana ɔ yi rokɔm ka bɛ.

³² Ta ȧte ɔ po nənk yi ta ȧte ɔ po təl, tə mɔ seri, kɛrɛ wuni o wuni ɔ wop hɛ maseri mɔŋ.

³³ Ɔwe mə wop maseri mɔŋ ɔ tɔri kəpa Kurɔŋ ɔ yi təteŋ.

³⁴ kotȧy-e, kɔnɔ ɔwe Kuru ɔ som ɔ tə fɔf ȧsim ta Kuru: ȧtesoma-e Kurɔŋ ɔ thuntha hɛ kɔ ɔYina.

³⁵ ƆKas ɔ bɔthər ɔWan, ɔwa ɔ po sɔŋ koko ka mȧta mɔŋ.

³⁶ Kɔnɔ ɔwe mə lanɛ ka ɔWan ɔ ba aŋesəm thəbana: kɛrɛ wuni ɔwe mə te lanɛ ka ɔWan-e, ɔ ba hɛ kənəŋk aŋesəm; kɛrɛ rabaŋ ra Kuru rə rensa kɔ.