Yɔn 21 - Ȧŋlemrȧnɛ Ȧfu

¹ Kədarəŋ ka mȧtȧy ame Yisɔsȧŋ ɔ kȧl tɔrinɛ ka aŋkarande ka kȧbȧŋ ka Tiberias; ya ɔ tɔrinɛ yaŋ.

² Saymɔn Pitaŋ, yi Thɔmɔsȧŋ ɔwe a bont Didimɔs, yi Nathaneɛl ɔwe ro Kena ake ro Kalili, yi aŋwuth aruni ŋa Sɛbidi, yi aŋkarande ŋɔŋ alɔm ŋarəŋ, aŋ yi dɛr ɔkin.

³ Saymɔn Pitaŋ ɔ pa ro ŋaŋ, I kɔnɛ ləm. Aŋ pa ro ŋɔŋ, Saŋ sɔ sə tə paya mu. Kaŋ kɔnɛ, aŋ bȧkȧ ka ȧŋbil; kɛrɛ ka rȧtȧtȧk rati aŋ gbip hɛ koko.

⁴ Kɛrɛ ma rasɔk rə bek-e, Yisɔsȧŋ ɔ təmȧ ro gbaŋ; kɛrɛ aŋkarande aŋ tɛ ti kəpa Yisɔsȧŋ kɔnɔŋ.

⁵ Tiyȧŋ Yisɔs ɔ pa ro ŋaŋ, Aŋfɛth a mi, nə ba da rədi-i? Aŋ pa ro ŋɔŋ, Sə ba hɛ.

⁶ Ɔ pa ro ŋaŋ, Fitha kapɛl ka kȧdiyɔ ka ȧŋbil, ɔwa nə tə gbip. Aŋ fitha ki, ɔwa aŋ gbəli hɛ tə kəliŋ ki salata kagbath ka ɛlop.

⁷ Tiyȧŋ ɔkarande ɔwe Yisɔsȧŋ ɔ bɔthər ɔ pa ka Pita, ƆMariki kɔnɔŋ. Ma Saymɔn Pitaŋ ɔ təl kəpa ɔMarki kɔnɔŋ-e, ɔ senɛ aruma rɔŋ ratɔŋ (ȧtesoma-e ɔ yi utiŋ), kɔ fithanɛ ro baŋ.

⁸ Kɛrɛ aŋkarande alɔm aŋ der ka ȧŋbil alɔl; (kotȧy-e aŋ bɔlȧnɛ hɛ ro gbaŋ, pə yi gbo mɔ məloŋk tɛmɛ tərəŋ), aŋ liŋ kapɛl kəla ɛlop.

⁹ Maŋ bek ro gbaŋ-e, aŋ nənk ri nȧnt na tont nə mara, yi ɛlop a rɛns ŋa ri, yi kəbo.

¹⁰ Yisɔsȧŋ ɔ pa ro ŋaŋ, Kara nu ɛlop alɔm aŋa nə po gbip.

¹¹ Saymɔn Pitaŋ ɔ bȧkȧ ro bil, ɔ liŋ kapɛl ro gbaŋ kəla ɛlop abana, aŋ yi kɛmɛ kin təgba tərəŋ tɔfɔt asas: ɔwa hali ma ɛlop aŋ yi agbȧthi-e, kapɛl kə pima hɛ.

¹² Yisɔsȧŋ ɔ pa ro ŋaŋ, Der nu nə di. Ɔwa ukarande o karande ɔ mintha hɛ tə kəyif kɔ, Mun kanɛ-e? mɔ aŋ tȧrȧ kəpa ɔMarki kɔnɔŋ.

¹³ Ka Yisɔsȧŋ ɔ der, ɔ gbasi kəbo, ɔ sɔŋ ŋa ki, yi ɛlop sɔ.

¹⁴ Ȧŋlɔkɔ aŋe aŋ bekȧ məsas ma Yisɔsȧŋ ɔ tɔrinɛ ka aŋkarande, kədarəŋ ka kȧyokanɛ kɔŋ ka rafi.

¹⁵ Maŋ po di-e, Yisɔsȧŋ ɔ pa ka Saymɔn Pita, Saymɔn ɔwan ka Yɔnas, mə bɔthər mi pəthasi aŋe-i? Ɔ pa ro ŋɔŋ, Aŋko, Pa, mə tȧrȧ kəpa i bɔthər mu. Yisɔsȧŋ ɔ pa ro ŋɔŋ, Wɔnthər talɔmɛ ta mi afɛth.

¹⁶ Yisɔsȧŋ ɔ kȧl sɔ pa ro ŋɔŋ kəbeka mȧrəŋ, Saymɔn, ɔwan ka Yɔnas, mə bɔthər mi-i? Ɔ pa ro ŋɔŋ, Aŋko, Pa, mə tȧrȧ kəpa i bɔthər mu. Yisɔsȧŋ ɔ pa ro ŋɔŋ, Wɔnthər talɔmɛ ta mi.

¹⁷ Yisɔsȧŋ ɔ kȧl pa ro ŋɔŋ kəbeka məsas, Saymɔn, ɔwan ka Yɔnas, mə bɔthər mi-i? Ɔwa Pita ɔ saŋ amɔl ta ma Yisɔs ɔ pa ro ŋɔŋ kəbeka məsas, Mə bɔthər mi-i? kɔ pa ro ŋɔŋ, Pa, mə tȧrȧ mȧtȧy bɛ; mə tȧrȧ kəpa i bɔthər mu. Yisɔsȧŋ ɔ pa ro ŋɔŋ, Wɔnthər talɔmɛ ta mi.

¹⁸ I kanɛ mu tɛntɛnɛ, ma mə yi ufɛth-e, mun munɔnɛ mə senɛ ratɔŋ, mə kɔth ro mə yema-e: kɛrɛ ma mə po bȧk-e, mə tə thanthi mȧta ma mu, ɔwa wuni lɔm kɔnɔ mə sek mu ratɔŋ, ɔ tə kera mu ro mə te yema kɔ-e.

¹⁹ Yisɔsȧŋ ɔ pa ȧte, kȧmȧ ɔ tɔri ko rəfi ɔkarande ɔwe mɔ yikis Kuru. Ma ɔ po pa ȧte, ɔ pa ro ŋɔŋ, Tȧŋ mi.

²⁰ Pitaŋ ɔ fəlɛ, ɔ nənk ɔkarande ɔwe Yisɔs ɔ bɔthər ɔ tȧŋ ŋa; kɔnɔŋ ɔwe sɛlinɛ ka aŋkəpət ŋɔŋ ka kadi, ɔwa ɔwe pa, Pa, kanɛ yi ɔwe mə sɔnd mu-e?

²¹ Pitaŋ ma ɔ nənk kɔ-e, ɔ pa ka Yisɔs, Pa, ɔlaŋgba ɔwe, ko mɔ yɔ-e?

²² Yisɔsȧŋ ɔ pa ro ŋɔŋ, To mə pə yi mu-e, bepi i selɔ ɔ tiyȧ haŋ i der-e? Munɔ tȧŋ mi.

²³ Tiyȧŋ ȧŋpa aŋe aŋ gbanthɛnɛ kətɔŋ ka aŋwɔnt bɛ, kəpa ɔkarande kati ɔ ba hɛ tə kəfi: kɛrɛ Yisɔsȧŋ ɔ pa hɛ ɔ ba hɛ kəfi; ɔ pa gbo, Bepi i selɔ ɔ tiyȧ haŋ i der-e, to mə pə yi mu-e?

²⁴ Ɔkarande ɔwe kɔnɔ gbaki ta mȧtȧy ame, kɔ gbal mȧtȧy ame: ɔwa sə tȧrȧ kəpa aŋgbaki ŋɔŋ aŋ yi tȧteŋ.

²⁵ Ɔwa mȧtȧy məlɔm məgbathi mə yi ama Yisɔsȧŋ ɔ yɔ, ama, bepi a po gbal ma bɛ-e, i nanɛ kəpa ȧtȧfȧ ta mȧgbal mati tə gbəli hɛ thənɔ ka ȧdȧru bɛ. Amina.