Yɔn 19 - Ȧŋlemrȧnɛ Ȧfu

¹ Tiyȧŋ Payletȧŋ ɔ gbasi Yisɔsȧŋ ɔ sapa kɔ rəkɛt.

² Ka antim aŋ ru ȧniyɔ ŋa təbaŋk, aŋ bot ŋi ka rȧbomp rɔŋ, kaŋ wɔns kɔ ruma rəyim.

³ Aŋ pa, Kori mu-o ɔBȧy ka aŋYuda! kaŋ gbantha kɔ.

⁴ Payletȧŋ ɔ kȧl wur rokaŋ, ɔ pa ro ŋaŋ, Kəlo i wurɔ nu kɔ, kȧmȧ nə tȧrȧ kəpa i fir hɛ ro ŋɔŋ tȧy o tȧy tələs.

⁵ Ka Yisɔsȧŋ ɔ wur rokaŋ, ɔ sara ȧŋniyɔ ŋa təbaŋk, ɔ wɔŋ ȧŋbila ayim. Payletȧŋ ɔ pa ro ŋaŋ, Kəlo ɔlaŋgba!

⁶ Ma aŋfode abana yi anturgba aŋ nənk kɔ-e, aŋ woŋa, aŋ pa, Tȧŋ kɔ ka akənt kəpəŋkinɛ, tȧŋ kɔ ka akənt kəpəŋkinɛ! Payletȧŋ ɔ pa ro ŋaŋ, Naŋ gbasi kɔ nu, nə tȧŋ kɔ ka akənt kəpəŋkinɛ, kotȧy-e minɛ i fir hɛ tȧy o tȧy ȧte yi tələs ro ŋɔŋ.

⁷ AŋYuda aŋ wosa, aŋ pa, Saŋ sə ba athɔ, ka ȧŋthɔ ŋati ɔ mar fi, pəkasifɛ ɔ pa ɔ yi ɔWan ka Kuru.

⁸ Ma Payletȧŋ ɔ təl ȧŋpa aŋe-e, ɔ bȧr gbo nesa.

⁹ Ɔ kȧl wɔŋ ro bare, ɔ pa ka Yisɔs, Reke mə wur-e? Kɛrɛ Yisɔsȧŋ ɔ wosa hɛ kɔ.

¹⁰ Ka Payletȧŋ ɔ pa ro ŋɔŋ, Mə wosa hɛ mi-i? Mə tɛ hɛ kəpa i ba afɔsɔ tə kəsəli mu, ɔwa i ba afɔsɔ tə kətaŋ mu ka akənt kəpəŋkinɛ-i?

¹¹ Yisɔsȧŋ ɔ pa, Mə ba hɛ afɔsɔ rokɔm kȧmi thambe a sɔŋ mu ŋi kəwur rokɔm: tiyȧŋ ɔwe sɔnd mi ro mu, ɔ ba mətheri pəthasi munɔ.

¹² Kəbi ka ȧŋlɔkɔ ŋati Payletȧŋ ɔ thɛns tə kəsəli kɔ; kɛrɛ aŋYuda aŋ woŋa, aŋ pa, Bepi mə səli ɔlaŋgba ɔwe-e, mə yi hɛ uyathki ka Sisar: wuni o wuni ɔwe səkinɛ ubai-e, ɔ pɛnsa Sisarȧŋ.

¹³ Tiyȧŋ ma Payletȧŋ ɔ təl ȧsim ȧte-e, ɔ wurɔ Yisɔs rokaŋ, ɔ yirȧ ka kawaŋ ka kəgbək ɛpa, ka ɔdɛr ro a bont ȧŋPefmɛnt, kɛrɛ ka kaHibru a bont Kabatha.

¹⁴ Kə pə re yi ȧŋrey ŋa kabɛnɛnɛ ta amet ma kapainɛ; pə yi mɔlɔ ma ȧŋlɔkɔ aŋa bekȧ tamthərukin: kɔ pa ka aŋYuda, Kəlo ɔBȧy ka nu!

¹⁵ Kɛrɛ aŋ woŋa, aŋ pa, Kera kɔ nu, kera kɔ nu, tȧŋ kɔ ka akənt kəpəŋkinɛ. Payletȧŋ ɔ pa ro ŋaŋ, Nə yema i tȧŋ ɔBȧy ka nu ka akənt kəpəŋkinɛ-i? Aŋfode abana aŋ pa, Sə ba hɛ ubȧy thambe Sisarȧŋ.

¹⁶ Ka ȧŋlɔkɔ ŋati ɔ lȧnki kɔ ro ŋaŋ kȧmȧ a tȧŋ kɔ ka akənt kəpəŋkinɛ. kaŋ gbasi Yisɔsȧŋ.

¹⁷ kɔ wur, ɔ gbanɛ akənt kɔŋ kəpəŋkinɛ kəkɔ ka ɔdɛr ro a bont, Ɔdɛr wa Kəgbɛŋkət, ro a bont ka kaHibru, Kɔlkɔtha:

¹⁸ ro aŋ tȧŋ kɔ ka akənt kəpəŋkinɛ, yi afəm ŋarəŋ yi kɔnɔŋ, ukin ka kȧdiyɔ, ɔwa ukin ka kȧmɛrɔ kɔŋ, ka Yisɔsȧŋ ɔ yi ratɔŋ.

¹⁹ Ka Payletȧŋ ɔ gbal məgbal, ɔ yɔ aŋ bot ma ka akənt kəpəŋkinɛ. Ɔ gbal, YISƆSȦŊ ƆWE RO NASARƐTH, ƆBȦY KA AŊYUDA.

²⁰ AŋYuda agbȧthi aŋ karaŋ mȧgbal ame: kotȧy-e, ɔdɛr ro a tȧŋ Yisɔs ka akənt kəpəŋkinɛ ɔ yi ɔfati ro pet: ɔwa a gbal ma ka kaHibru, kaRom, yi kaKrik.

²¹ Tiyȧŋ aŋfode abana ŋa aŋYuda aŋ pa ka Paylet, Te gbal, ɔBay ka aŋYuda; kɛrɛ kəpa, Ɔ pa, Minɛ yi ɔBȧy ka aŋYuda.

²² Payletȧŋ ɔ pa, Ȧtȧ i po gbal-e, i po gbal.

²³ Ma antim aŋ po tȧŋ Yisɔsȧŋ ka akənt kəpəŋkinɛ-e aŋ gbasi ȧsuma tɔŋ, aŋ yerəs ti ɛni yanlɛ, ani ŋin ta utim o tim; yi kafɔl sɔ; kafɔl a po ru ki kətəp rokɔm haŋ kəkɔ roratha kati.

²⁴ kaŋ fɔfȧnɛ kəpa, Maŋ te nu pim ki, maŋ fak nu təfant ta kafɔl kȧmȧ sə tȧrȧ ɔwe ba kəsɔthɔ ki; kȧmȧ mȧgbal mə lasər, ama pa, Aŋ yerəs ȧsuma ta mi kətɔŋ ka ŋaŋ, Ɔwa aŋ fak təfant ta kafɔl kȧmi. Tiyȧŋ mȧtȧy ame antim aŋ yɔ.

²⁵ Ka ɔkara ka Yisɔs ɔ təmȧ rayɛr ka akənt kəpəŋkinɛ, yi ɔwɔnt ka ɔkara kɔŋ, Merɛŋ ɔrani ka Klopas, yi Meri ɔwe ro Makdala sɔ.

²⁶ Ma Yisɔsȧŋ ɔ nənk ɔkara kɔŋ-e, yi ɔkarande ɔwe ɔ bɔthər aŋ təmȧ rayɛr-e, ɔ pa ka ɔkara kɔŋ, Wuni bom, kəli ɔwan ka mu!

²⁷ kɔ kȧl pa ka ɔkarande, Kəli ɔya ka mu! Ɔwa kȧbi ka ȧŋlɔkɔ ŋati ɔkarande ɔ kera ɔya ka ȧŋseth ŋɔŋ.

²⁸ Kədarəŋ kati, ma Yisɔsȧŋ ɔ tȧrȧ kəpa mȧtȧy bɛ mə poŋ-e, kȧmȧ mȧgbal mə lasər, ɔ pa, Rəmun rə bȧk mi.

²⁹ Ɔwa apɔthi aŋ təmȧ ri aŋ la afinika; kaŋ lasər asponge yi afinika, aŋ bot ŋi ka ȧŋsɛthɛ ŋa ahisɔp, a fata ŋi ka kȧsəŋ kɔŋ.

³⁰ Ɔwa ma Yisɔsȧŋ ɔ po nɔy aŋfinikar, ɔ pa, Tə poŋ: ɔ saŋ rȧbomp rɔŋ ɔ ternɛ.

³¹ Tiyȧŋ aŋYuda, ma pə yi ȧŋrey ŋa kabɛnɛnɛ ta amet ma kapainɛ, kȧmȧ tabel aŋ te tiyȧ ka atənt təpəŋkinɛ ka aŋsabath (kotȧy-e aŋsabath ŋati aŋ yi abana), aŋ nɛmthɛnɛ Payletȧŋ kȧmȧ a siməth ɛlənk yaŋ, ɔwa kȧmȧ a tɔŋa ŋa.

³² Ka antim aŋ der, kaŋ siməth ɛlənk ya ɔtɔtɔkɔ, ɔwa ɛya ɔlɔm ɔwe a tȧŋ ka akənt kəpəŋkinɛ yi kɔnɔ.

³³ Kɛrɛ maŋ bek ka Yisɔs-e, ɔwa aŋ nənk kəpa ɔ po fi-e, aŋ sim hɛ ɛlənk yɔŋ:

³⁴ kɛrɛ utim ukin ɔ raf aŋfuthəl ŋɔŋ yi asor, ka ɔlɛmp wati mȧtir yi mȧnt mə wur kɔ.

³⁵ Ɔwa ɔwe po nənk ti ɔ yi ti məseri, ɔwa maseri mɔŋ mə yi tȧteŋ: ɔ tȧrȧ kəpa ɔ fɔf tȧteŋ, kȧmȧ naŋ sɔ nə lanɛ.

³⁶ kotȧy-e mȧtȧy ame mə yɔnɛ, kȧmȧ mȧgbal mə lasər, ama pa, A ba hɛ kəsim kɔ kəbȧnth.

³⁷ Ka məgbal məlɔm mə pa, Aŋ tə kəli kɔ ɔwe aŋ po raf.

³⁸ Kədarəŋ ka mȧtȧy ame, Yosɛf-əŋ ɔwe ro Arimathia, ɔwe yi ukarande ka Yisɔs, kɛrɛ rə ɔmaŋknɛ, ta rənes ra aŋYuda, ɔ nɛmthɛnɛ Payletȧŋ kȧmȧ ɔ selɔ ɔ kera kabel ka Yisɔs; ɔwa Payletȧŋ ɔ malanɛ. Tiyȧŋ ɔ der, ɔ thora kabel kɔŋ.

³⁹ Ka Nikodimɔs sɔ ɔ der, kɔnɔ ɔwe der ka Yisɔs kətɔtɔkɔ ka tȧtȧk, ɔ kȧrȧ ama yi məalos mə kuluŋanɛ, mɔlɔ ma ɛwet kɛmɛ kin.

⁴⁰ kaŋ gbasi kabel ka Yisɔs, aŋ rapər ki totha yi məpos məfɔlfɔl, mɔ matanɛ ma aŋYuda mə yi ka kəmȧnk.

⁴¹ Ka ɔdɛr ro a tȧŋ kɔ ka akənt kəpəŋkinɛ ȧkunk aŋ yi ri; ɔwa ka katɛl ake kȧboma kəfu kə yi ri, ro a te tha bot wuni o wuni.

⁴² Rə aŋ bot Yisɔsȧŋ salata ȧŋrey ŋa kabɛnɛnɛ ka aŋYuda: ȧtesoma-e kȧboma kə yi ɔfati ri.