Yɔn 17 - Ȧŋlemrȧnɛ Ȧfu

¹ Ma Yisɔsȧŋ ɔ po fɔf mȧtȧy ame, ɔ lakthɛ ro riyana, ɔ pa, Pa, ȧŋlɔkɔ aŋ bek; yikis ɔWan ka mu, kȧmȧ ɔWan ka mu ɔ yikis mu:

² mɔ mȧ mə sɔŋ kɔ afɔsɔ ka afəm bɛ, kȧmȧ ɔ sɔŋ aŋesəm thəbana ka ŋaŋ aŋa mə sɔŋ kɔ.

³ Ɔwa aŋesəm thəbana ŋi aŋe kȧmȧ aŋ tȧrȧ mu ɔKuru utəteŋ son, yi Yisɔs Krayst ɔwe mə po som.

⁴ I po yikis mu nɔru, ma i pons mapanth ama mə sɔŋ mi tə kəyɔ.

⁵ Ka-ake, O Pa, yikis mi yi mun munɔnɛ yi aŋyiki aŋa i ba ro mu yeŋka ȧdȧru rə təpɛ.

⁶ I po tɔri ȧŋes a mu ka aŋfəm aŋa mə sɔŋ mi kəwur ka ȧdȧru: munɔ ba ŋa, ɔwa mə sɔŋ mi ŋa; kaŋ po wop ȧrim ra mu.

⁷ Aŋ tȧrȧ thɔŋ kəpa tȧy o tȧy ȧte mə sɔŋ mi tə wur ro mu;

⁸ ȧtesoma-e, i po sɔŋ ŋa ȧsim ȧte mə po sɔŋ mi; ɔwa aŋ malanɛ ti, ɔwa aŋ tȧrȧ tȧteŋ kəpa i wur ro mu, ɔwa aŋ lanɛ kəpa munɔ som mi.

⁹ I ramnɛ taŋ, i ramnɛ hɛ ta ȧdȧru, kɛrɛ ta ŋaŋ aŋa mə po sɔŋ mi; pəkasifɛ munɔ ba ŋa:

¹⁰ ɔwa ŋaŋ bɛ aŋa minɛŋ i ba munɔ ba ŋa, yi aŋa munɔ mə ba minɛ ba ŋa: ɔwa i ba ayiki ro ŋaŋ.

¹¹ Ɔwa ka-ake i yi hɛ sɔ nɔru, kɛrɛ aŋe aŋ yi nɔru, ka minɛ i der ro mu. ƆKas usəm, bɛnɛ ŋa ka ȧŋes a mu, aŋa mə po sɔŋ mi, kȧmȧ aŋ ba ȧmerȧ ŋin mɔ mə saŋ sə ba.

¹² Ma i yi yi ŋaŋ ka ȧdȧru, minɛ bɛnɛ ŋa ka ȧŋes a mu, aŋa mə po sɔŋ mi: ɔwa i bumər ŋa, ukin ka ŋaŋ ɔ dinɛ hɛ, thambe ɔwan ka kədinɛ; kȧmȧ mȧgbal mə lasər.

¹³ Kɛrɛ ka-ake i der ro mu; ɔwa mȧtȧy ame i fɔf nɔru-e, kȧmȧ aŋ ba mabɔnɛ ma mi məgbenthis rokor ka ŋaŋ.

¹⁴ I po sɔŋ ŋa ȧrim ra mu, ka ȧdȧru rə gbɛŋa ŋa, pəkasifɛ aŋ yi hɛ ta ȧdȧru, mɔ minɛ i te yi ta ȧdȧru.

¹⁵ I ramnɛ hɛ kȧmȧ mə wurɔ ŋa ka ȧdȧru, kɛrɛ kȧmȧ mə bumər ŋa ka maləs.

¹⁶ Aŋ yi hɛ ta ȧdȧru, mɔ minɛŋ i te yi ta ȧdȧru.

¹⁷ Səməs ŋa ka tȧteŋ, ȧrim ra mu rə yi tȧteŋ.

¹⁸ Mɔ mə po som mi ka ȧdȧru, yɛ minɛŋ sɔ i po som ŋa ka ȧdȧru.

¹⁹ Ɔwa ta ȧtȧŋ tə mə i səməsnɛ, kȧmȧ a səməs ŋa ka tȧteŋ.

²⁰ Salata aŋe son tha mə i ramnɛ, kɛrɛ ta ŋaŋ sɔ aŋa mə lanɛ mi salata ȧrim ra ŋaŋ;

²¹ kȧmȧ ŋaŋ bɛ aŋ ba ȧmerȧ ŋin; mɔ munɔŋ, Pa, mə yi rokor kȧmi, yi minɛŋ i yi rokor ka mu, kȧmȧ ŋaŋ sɔ aŋ yi rokor kȧsu: kȧmȧ ȧdȧru rə lanɛ kəpa munɔ som mi.

²² Aŋyiki aŋa mə po sɔŋ mi, i po sɔŋ ŋa ŋi, kȧmȧ aŋ ba ȧmerȧ ŋin, mɔ mə saŋ sə ba ȧmerȧ ŋin;

²³ minɛŋ rokor ka ŋaŋ, yi munɔŋ rokor kȧmi, kȧmȧ aŋ ba ȧmerȧ ŋin agbenthis; kȧmȧ ȧdȧru rə tȧrȧ kəpa munɔ som mi, ɔwa mə bɔthər ŋa mɔ mȧ mə bɔthər mi.

²⁴ Pa, aŋfəm aŋa mə po sɔŋ mi, i yema kȧmȧ ŋaŋ sɔ aŋ yi ro minɛŋ i yi; kȧmȧ aŋ nənk aŋyiki a mi aŋa mə po sɔŋ mi: ȧtesoma-e mə bɔthər mi yeŋka a bot ɔtəmər wa ȧdȧru.

²⁵ O, Pa ulompi, ȧdȧru rə tɛ hɛ mu, kɛrɛ i po tȧrȧ mu, ɔwa aŋe aŋ tȧrȧ kəpa munɔ som mi.

²⁶ Ka i po tɔri ŋa ȧŋes a mu ɔwa i ti tɔri ŋi sɔ: kȧmȧ mabɔthər ama mə bɔthər mi mə yi rokor ka ŋaŋ, ɔwa minɛŋ sɔ i yi rokor ka ŋaŋ.