Yɔn 16 - Ȧŋlemrȧnɛ Ȧfu

¹ Mȧtȧy ame i po pa ro nu, kȧmȧ a te yɔ nu nə pənthbəla.

² Aŋ tə bȧl nu ka ɛseth ɛgbanɛ: aŋko, ȧŋlɔkɔ aŋ tə der, ma wuni o wuni ɔwe mə dif nu, ɔ tə nanɛ kəpa ɔ yɔ mapanth ma Kuru.

³ Mȧtȧy ame aŋ tə yɔ nu, pəkasifɛ aŋ tɛ hɛ ɔKas, thalɔm minɛŋ.

⁴ Kɛrɛ mȧtȧy ame i po kanɛ nu kȧmȧ ma ȧŋlɔkɔ aŋ bek-e, nə tə kȧl nanɛ kəpa i la po kanɛ nu ti. I kanɛ hɛ nu mȧtȧy ame bɛ ka katəp, pəkasifɛ i yi rɛ naŋ.

⁵ Kɛrɛ ka-ake i kɔ ka ɔwe som mi; ɔwa hali ukin ka nu ɔ yif hɛ mi, Re mə-əŋ kɔ-e?

⁶ Kɛrɛ ma i po fɔfȧnɛ nu mȧtȧy ame, ɔnɔsinɛ ɔ po la ka ɛmerȧ ɛ nu.

⁷ Ɔwa i kanɛ nu tȧteŋ, pə tə yi ɔfinɔ ta ȧtȧ nu bepi i kɔnɛ: ȧtesoma-e, bepi i kɔ hɛ-e, ɔBɛfəth ɔ ba hɛ kəder ro nu; kɛrɛ bepi i kɔ-e, i ti som kɔ ro nu.

⁸ Ɔwa ma ɔ po der-e, ɔ tə gbanthir ȧdȧru ta ahakɛ, ta məlompi, yi ta kəthoŋkas ɛpa:

⁹ ta ahakɛ, pəkasifɛ aŋ lanɛ hɛ mi;

¹⁰ ta məlompi, pəkasifɛ i kɔ ka ɔKas ɔwa nə nənk hɛ mi sɔ;

¹¹ ta kəthoŋkas ɛpa, pəkasifɛ a po thonkas ɔwe yi rȧbomp ra ȧdȧru are.

¹² I ba ras mȧtȧy məgbathi tə kəkanɛ nu, kɛrɛ nə gbəli hɛ wop ma ka-ake.

¹³ Kɛrɛ ma kɔnɔŋ, ɔYina ka təteŋ, ɔ der-e, ɔ tə kora nu ka tȧteŋ bɛ; kotȧy-e, ɔ fɔf hɛ ka ȧŋmerȧ ŋɔŋ; kɛrɛ mȧtȧy bɛ ama ɔ təl, ame ma mɔ fɔf: ɔwa ɔ tə tɔri nu mȧtȧy ama ba tə kəder.

¹⁴ Ɔ tə yikis mi; ȧtesoma-e, ɔ tə gbasi ma ro mi, ɔwa ɔ tə tɔri ma ro nu.

¹⁵ Mȧtȧy bɛ ama ɔKas ɔ ba-e, minɛ ba ma: tiyȧŋ i pa, ɔ tə gbasi ma ro mi, ɔwa ɔ tə tɔri ma ro nu.

¹⁶ Alɔkɔ agbut ɔwa nə nənk hɛ mi: ɔwa alɔkɔ agbut sɔ nə tə nənk mi pəkasifɛ i kɔ ka ɔKas.

¹⁷ Tiyȧŋ aŋkarande ŋɔŋ alɔm aŋ fɔflanɛ, aŋ pa, Ko tȧy ȧte ȧtȧ ɔ pa ro su-e? Alɔkɔ agbut ɔwa nə nənk hɛ mi; ɔwa alɔkɔ agbut sɔ nə tə nənk mi: ɔwa pəkasifɛ i kɔ ka ɔKas-i?

¹⁸ Tiyȧŋ aŋ pa, Ko tȧy ȧte ȧtȧ ɔ pa-e, Alɔkɔ agbut-e? Sə tɛ hɛ ȧte ɔ pa.

¹⁹ Yisɔsȧŋ ɔ tȧrȧ kəpa aŋ yema yif kɔ, kɔ pa ro ŋaŋ, Nə yifəthanɛ ta ȧte i pa, Alɔkɔ agbut, ɔwa nə nənk hɛ mi, ɔwa alɔkɔ agbut sɔ, nə tə nənk mi-i?

²⁰ Tɛntɛnɛ i kanɛ nu, nə tə bok ɔwa nə tə kulɔ, kɛrɛ ȧdȧru rə tə sel məbɔnɛ: naŋ nə tə ba ɔnɔsinɛ, kɛrɛ ɔnɔsinɛ ɔ nu ɔ tə səkɛ nu məbɔnɛ.

²¹ Ɔwuni bom bepi ɔ yi ka akənt ka kakom-e, ɔ ba asɔmpanɛ, pəkasifɛ ȧŋlɔkɔ ŋɔŋ aŋ bek: kɛrɛ bepi ɔ po kom ɔwath-e, ɔ nanɛ hɛ sɔ ȧŋsɔmpanɛŋ, salata mabɔnɛ ama ɔ ba kəpo kom wuni ka ȧdȧru.

²² Tiyȧŋ naŋ nə ba ɔnɔsinɛ ka-ake; kɛrɛ i ti kȧl sɔ nənk nu, ɔwa ɛmerȧ ɛ nu ɛ tə yasanɛ yi məbɔnɛ, ɔwa wuni o wuni ɔ gbəli hɛ nɔy mabɔnɛ ma nu.

²³ Ka ȧŋrey ŋati nə ba hɛ kəyif mi tȧy o tȧy. I kanɛ nu tɛntɛnɛ, tȧy o tȧy ȧte mə nə tholir ɔKas ka ȧŋes a mi, ɔ tə sɔŋ nu ti.

²⁴ Haŋ ka-ake nə tha thola hɛ koko ka ȧŋes a mi: ɔwa thola nu, nə tə sɔthɔ, kȧmȧ mabɔnɛ ma nu mə lasər.

²⁵ Mȧtȧy ame i po pa ro nu rə ɛlomɔ: kɛrɛ ȧŋlɔkɔ aŋ tə der, ma i te sɔ ba tə kəfɔf rə ɛlomɔ, kɛrɛ i ti kanɛ nu ta ɔKas gbəraŋ.

²⁶ Ka ȧŋrey ŋati nə tə thola ka ȧŋes a mi: ɔwa i pa hɛ ro nu, i ti nɛmthɛnɛ ɔKas ta ȧtȧ nu:

²⁷ ȧtesoma-e ɔKas kɔn kɔnɔnɛ ɔ bɔthər nu, pəkasifɛ naŋ nə po bɔthər mi, ɔwa nə lanɛ kəpa i wur ka ɔKas.

²⁸ I wur ka ɔKas, ka i der nɔru: ɔwa i kȧl tey ȧdȧru, ka i kɔnɛ ka ɔKas.

²⁹ Aŋkarande ŋɔŋ aŋ pa ro ŋɔŋ, Kəla, ka-ake mə fɔf gbəraŋ, mə fɔf hɛ sɔ rə alomɔ.

³⁰ Ka-ake sə tȧrȧ kəpa mə tȧrȧ mȧtȧy bɛ, tə ba hɛ mu tȧy kȧmȧ wuni kəpet ɔ yifəth mu: ka ȧte sə lanɛ kəpa mə wur ka Kuru.

³¹ Yisɔsȧŋ ɔ lasianɛ ŋa, ɔ pa, Nə lanɛ thɔŋ-i?

³² Kəla, ȧŋlɔkɔ aŋ tə der, aŋko, an po bek-e, kȧmȧ nə sakanɛ, wuni o wuni ka ȧŋseth ŋɔŋ, nə tə tey mi min son, kɛrɛ i yi hɛ min son, pəkasifɛ ɔKas ɔ yi yi minɛŋ.

³³ I po fɔfȧnɛ nu mȧtȧy ame bɛ, kȧmȧ nə ba məthɔfəl ro mi. Ka ȧdȧru nə tə ba asɔmpanɛ: kɛrɛ bȧk nu təbuth, i po tham ȧdȧru.