Yɔn 15 - Ȧŋlemrȧnɛ Ȧfu

¹ Minɛ yi ralek rəgbeŋ, ɔwa ɔKas kȧmi kɔnɔ yi ɔbaf.

² Ara o ra ro mi aŋa mə te wur məkomi ɔ gbək ŋi; ɔwa ara o ra aŋa mə wur məkomi, ɔ wasər ŋi, kȧmȧ aŋ bȧr wur məkomi.

³ Naŋ nə po thɔ yi agbəraŋ salata ȧrim ara i po kanɛ nu.

⁴ Tia nu rokor kȧmi ɔwa minɛŋ rokor ka nu. Mɔ mə aŋra aŋ ba hɛ afɔsɔ tə kəwur məkomi, thambe aŋ tiyȧ ka ralek; ya pə yi sɔ naŋ nə gbəli hɛ, thambe nə tiyȧ ro mi.

⁵ Minɛ yi ralek, naŋ nə yi mara: wuni ɔwe mə tiyȧ ro mi, ɔwa minɛ sɔ ro ŋɔŋ-e, ɔwe ɔ tə wur məkomi məgbathi: Ȧtesoma-e nə gbəli hɛ yɔ koko bepi nə tiyȧ hɛ ro mi.

⁶ Bepi wuni ɔ tiyȧ hɛ ro mi-e, a tə fitha kɔ rokaŋ mɔ ara, ɔwa aŋ wos; ɔwa a thoŋkla ma, a fitha ma ro nȧnt ɔwa a thɔi ma.

⁷ Bepi nə tiyȧ rokor kȧmi, ɔwa ȧsim ta mi tə tiyȧ rokor ka nu-e, yif nu tȧy o tȧy ȧte nə yema, ɔwa a tə yɔna nu ti.

⁸ Ka ȧte a tə yikis ɔKas kȧmi, bepi nə wur məkomi məgbathi; ɔwa ya nə tə yi akarande a mi.

⁹ Mɔ mə ɔKas ɔ bɔthər mi, ya minɛ sɔ i bɔthər nu; tiyȧ nu ka mabɔthər ma mi.

¹⁰ Bepi nə wop aŋyamari a mi-e, nə tə tiyȧ ka mabɔthər ma mi: mɔ mə i po wop aŋyamari ŋa ɔKas kȧmi, ka i tiya ka mȧbɔthər mɔŋ.

¹¹ I po kanɛ nu mȧtȧy ame, kȧmȧ mabɔnɛ ma mi mə tiyȧ ro nu, ɔwa kȧmȧ mabɔnɛ ma nu mə gbenthis.

¹² Aŋyamari a mi ŋi aŋe, Kama nə bɔthərȧnɛ, mɔ mə minɛŋ i po bɔthər nu.

¹³ Wuni o wuni ɔ ba hɛ məbɔthər ama yi məbana məthasi ame, kəpa ɔ tə sɔnd aŋesəm ŋɔŋ ta aŋyathki ŋɔŋ.

¹⁴ Naŋ nə yi aŋyathki a mi, bepi nə yɔ ȧte i yamari nu.

¹⁵ I bont hɛ nu sɔ ɛbɔy, ȧtesoma-e ȧŋbɔy ɔ tɛ hɛ ȧte ɔmarki kɔŋ mɔ yɔ-e; kɛrɛ i po bont nu ayathki; ȧtesoma-e mȧtȧy bɛ ama i təl ka ɔKas kȧmi, i po tɔri nu.

¹⁶ Naŋ, na tha thith mi, kɛrɛ minɛ thith nu, ka i bot nu, kȧmȧ nə kɔnɛ nə wur məkomi, ɔwa kȧmȧ mȧkomi ma nu mə tiyȧ: kȧmȧ tȧy o tȧy ȧte mə nə tholir ɔKas ka ȧŋes a mi, ɔ tə sɔŋ nu ti.

¹⁷ Mȧtȧy ame i yamari nu kȧmȧ nə bɔthərȧnɛ.

¹⁸ Bepi ȧdȧru rə gbɛŋa nu-e, nə tȧrȧ kəpa rə gbɛŋa mi yeŋka rə gbɛŋa nu.

¹⁹ Bepi nə yi aŋa ȧdȧru, ȧdȧru rə tə bɔthər aŋɔŋ: kɛrɛ ma nə te yi aŋa ȧdȧru, kɛrɛ i po thith nu kəwur ka ȧdȧru-e tiyȧŋ ȧdȧru rə gbɛŋa nu.

²⁰ Kala ȧmerȧ ka ȧrim ara i kanɛ nu, Ȧŋbɔy ɔ thas hɛ ɔmarki kɔŋ. Bepi aŋ po sɔmpa mi-e, aŋ tə sɔmpa nu sɔ; bepi aŋ po wop ȧrim ra mi-e, aŋ tə wop sɔ ȧrim ra nu.

²¹ Kɛrɛ mȧtȧy ame bɛ aŋ tə yɔ nu salata ȧŋes a mi, pəkasifɛ aŋ tɛ hɛ ɔwe som mi.

²² Bepi naŋ i de hɛ ɔwa i fɔfȧnɛ ŋa-e, aŋ ba hɛ naŋ ahakɛ: kɛrɛ ka-ake aŋ ba hɛ kəkat kɛrɛ ta ɛhakɛ yaŋ.

²³ Wuni ɔwe gbɛŋa mi ɔ gbɛŋa sɔ ɔKas kȧmi.

²⁴ Bepi i tha yɔ hɛ kətɔŋ ka ŋaŋ mȧyɔs ama wuni lɔm ɔ te la yɔ-e, aŋ ba hɛ naŋ ahakɛ: kɛrɛ ka-ake aŋ po nənk ɔwa aŋ po gbɛŋa minɛŋ yi ɔKas kȧmi.

²⁵ Kɛrɛ ȧte tə yɔnɛ, kȧmȧ ȧrim rə lasər ara a gbal ka ȧŋthɔ ŋaŋ, kəpa, Aŋ gbɛŋa mi kəte yɔ tȧy.

²⁶ Kɛrɛ ma ɔBɛfəth ɔ der-e, ɔwe i ti somra nu kəwur ka ɔKas, ɔYina ka tȧteŋ, ɔwe wur ka ɔKas-e, ɔ tə gbaki ta ȧtȧ mi:

²⁷ ɔwa naŋ sɔ nə tə gbaki; pəkasifɛ nə po yi ro mi kȧbi ka katəp.