Yɔn 14 - Ȧŋlemrȧnɛ Ȧfu

¹ Ta ɛmerȧ ɛ nu ɛ te nu sɔmpa: nə lanɛ Kuru, lanɛ mi sɔ.

² Ka ȧŋseth ŋa ɔKas kȧmi məyira məgbathi me yi ri; bepi naŋ pə yi hɛ yi-e, i ti poŋ naŋ kanɛ nu. Minɛŋ i kɔ tə kəbɛnɛnɛ nu dɛr.

³ Ɔwa bepi i kɔ tə kəbɛnɛnɛ nu dɛr-e, i ti kȧl der sɔ, i ti ba nu ro mi: kȧmȧ ro minɛŋ i yi, nia sɔ nə tə yi.

⁴ Ɔwa ro mə i kɔ-e nə tȧrȧ ri, nə tȧrȧ sɔ aroŋ.

⁵ Thɔmɔsȧŋ ɔ pa ro ŋɔŋ, Pa, sə tɛ hɛ ro mȧ mə kɔ-e; to mə sə gbəli tȧrȧ aroŋ-e?

⁶ Yisɔsȧŋ ɔ pa ro ŋɔŋ, Minɛŋ yi aroŋ, yi tȧteŋ, yi aŋesəm: wuni o wuni ɔ gbəli hɛ der ka ɔKas thambe ɔ tȧŋ ka kȧta kȧmi.

⁷ Bepi nə po tȧrȧ mi naŋ-e, nə tə tȧrȧ sɔ ɔKas kȧmi: ɔwa kətəp ka-ake nə tȧrȧ kɔ, ɔwa nə po nənk kɔ.

⁸ Filipȧŋ ɔ pa ro ŋɔŋ, Pa, tɔri su ɔKas, ɔwa pə tə bek su.

⁹ Yisɔsȧŋ ɔ pa ro ŋɔŋ, Filip, ma i po yi alɔkɔ awoni ro nu, mə tha tɛ hɛ mi-i? Wuni o wuni ɔwe po nənk mi ɔ po nənk ɔKas sɔ: to munɔ mə pa-e, Tɔri su ɔKas-e?

¹⁰ Mə lanɛ hɛ kəpa minɛ yi rokor ka ɔKas-i, ɔwa ɔKas ɔ yi rokor ka mi-i? Ȧsim ȧte i kanɛ nu, i fɔf hɛ ti ka ȧŋmerȧ a mi, kɛrɛ ɔKas ɔwe yi yi minɛŋ, kɔnɔ mə yɔ mȧyɔs mɔŋ.

¹¹ Lanɛ mi kəpa i yi rokor ka ɔKas, ɔwa ɔKas ɔ yi rokor kȧmi, thalɔm lanɛ mi salata mȧyɔs ama i yɔ.

¹² I kanɛ nu tɛntɛnɛ, Wuni ɔwe mə lanɛ mi, mapanth ama minɛ i yɔ-e, kɔnɔ sɔ ɔ tə yɔ ma; ɔwa ɔ tə yɔ məyɔs məbana məthasi ame, pəkasifɛ i kɔ ka ɔKas kȧmi.

¹³ Ɔwa tȧy o tȧy ȧte mə nə yif ka ȧŋes a mi, i ti yɔ ti, kȧmȧ ɔKas ɔ sɔthɔ ayiki ka ɔWan.

¹⁴ Bepi nə yif tȧy o tȧy ka ȧŋes a mi, i ti yɔ ti.

¹⁵ Bepi nə bɔthər mi, wop nu ɛyamari ɛ mi.

¹⁶ Ɔwa i ti nɛmthɛnɛ ɔKas, ɔwa ɔ tə sɔŋ nu uBɛfəth ulɔm, kȧmȧ ɔ yi ro nu thəbana.

¹⁷ Hali ɔYina ka tȧteŋ; ɔwe ȧdȧru rə te gbəli sɔthɔ, pəkasifɛ rə nənk hɛ kɔ, thalɔm rə tɛ hɛ kɔ; kɛrɛ nia nə tȧrȧ kɔ, ȧtesoma-e ɔ tiyȧ ro nu, ɔwa ɔ tə yi rokor ka nu.

¹⁸ I tey hɛ nu son, i ti der ro nu.

¹⁹ Pə tiyȧ ras alɔkɔ agbut, ɔwa ȧdȧru rə nənk hɛ mi sɔ: kɛrɛ nia nə tə nənk mi: pəkasifɛ i kəli, nia nə tə kəli sɔ.

²⁰ Ka ȧŋrey ŋati nə tə tȧrȧ kəpa i yi rokor ka ɔKas, ɔwa nia nə yi rokor kȧmi, ɔwa minɛŋ i yi rokor ka nu.

²¹ Kɔnɔ ɔwe ba ɛyamari ɛ mi, ɔwa ɔ wop yi-e, kɔnɔ yi ɔwe mə bɔthər mi: ɔwa kɔnɔ ɔwe mə bɔthər mi ɔKas kȧmi ɔ tə bɔthər kɔ, ɔwa i ti bɔthər kɔ, ɔwa i ti tɔrinɛ gbafəth ro ŋɔŋ.

²² Yudasȧŋ, Iskariyɔt tha, ɔ pa ro ŋɔŋ, Pa, to mȧ mə tɔrinɛ gbafəth ro su, pə yi hɛ ka raru-e?

²³ Yisɔsȧŋ ɔ pa ro ŋɔŋ, Bepi wuni ɔ bɔthər mi-e, ɔ tə wop ȧrim ra mi: ɔwa ɔKas kȧmi ɔ tə bɔthər kɔ, ɔwa sə tə der ro ŋɔŋ, sə tə yianɛ ro ŋɔŋ.

²⁴ Kɛrɛ kɔnɔ ɔwe te bɔthər mi-e, ɔ wop hɛ ȧsim ta mi-e: ɔwa ȧrim ara nə təl, rə yi hɛ ara mi, rə yi ȧrim ra ɔKas ɔwe som mi.

²⁵ Mȧtȧy ame i pa ro nu, ma i yi ras ro nu.

²⁶ Kɛrɛ ɔBɛfəth, ɔYina məsəm, ɔwe ɔKas ɔ tə som ka ȧŋes a mi, ɔ tə thəksa nu mȧtȧy bɛ, ɔwa ɔ tə kala ɛnanɛ ɛ nu ka mȧtȧy bɛ ama i po kanɛ nu.

²⁷ Məthɔfəl i tiyȧ nu, mathɔfəl ma mi i sɔŋ nu: i sɔŋ hɛ nu mɔ mə ȧdȧru rə sɔŋ nu. Ta ɛmerȧ ɛ nu ɛ te nu sɔmpa, thalɔm ɛ te nesa.

²⁸ Nə po təl ma i pa ro nu, I kɔnɛ, kɛrɛ i ti kȧl der ro nu. Bepi nə bɔthər mi naŋ-e, nə tə ba ti məbɔnɛ, ȧtesoma-e i pa, i kɔ ka ɔKas; pəkasifɛ ɔKas ɔ thasi mi.

²⁹ I po kanɛ nu ka-ake yeŋka pə yɔnɛ, kȧmȧ bepi pə po yɔnɛ-e, nə tə lanɛ.

³⁰ I fɔfȧnɛ hɛ nu sɔ ɔgbȧthi: kotȧy-e rȧbomp ra ȧdȧru are ɔ der, kɛrɛ ɔ ba hɛ tȧy o tȧy ro mi.

³¹ Kɛrɛ kȧmȧ ȧdȧru rə tȧrȧ kəpa i bɔthər ɔKas, yi mɔ mə ɔKas ɔ yamari mi, ya mə i yɔ. Yokanɛ nu maŋ kɔnɛ.