Yɔn 11 - Ȧŋlemrȧnɛ Ȧfu

¹ Ka wuni lɔm ɔ tu, ȧŋes ŋɔŋ ŋə yi Lasarɔs, ɔwe ro Bɛthani, kagbɔm ka Meri yi Martha-əŋ ɔwɔnt kɔŋ ubɛra.

² Meri kɔnɔŋ, ɔwe sop ɔMarki masopa məfɔlfɔl ɔwa ɔ nasi ȧtȧtək tɔŋ yi aŋfon ŋɔŋ, ɔwe ɔwɔnt kɔŋ Lasarɔs ɔ tu.

³ Tiyȧŋ aŋwɔnt ŋɔŋ abɛra aŋ som ka Yisɔs, aŋ pa, ƆMariki, kəla kɔn ɔwe mə bɔthər ɔ tu.

⁴ Ma Yisɔsȧŋ ɔ təl ti-e, ɔ pa, Ratu are rə yi hɛ ta kəfi, kɛrɛ ta aŋyiki ŋa Kuru kȧmȧ ɔWan ka Kuru ɔ sɔthɔ ayiki ta ti.

⁵ Ɔwa, Yisɔsȧŋ ɔ bɔthər Martha-əŋ, yi ɔwɔnt kɔŋ ubɛra, yi Lasarɔs.

⁶ Kɛrɛ ma ɔ təl kəpa Lasarɔs ɔ tu-e, ɔ yirȧ ras mərey mȧrəŋ ka ɔdɛr ro ɔ yi.

⁷ Kədarəŋ kati ɔ pa ka aŋkarande ŋɔŋ, Maŋ kȧl nu sɔ kɔ ro Yudia.

⁸ Aŋkarande ŋɔŋ aŋ pa ro ŋɔŋ, Karmɔkɔ, ka ɔthan ɔwe aŋYuda aŋ thɛns tə kələməs mu məsar; ɔwa mə tə kɔ ri sɔ-i?

⁹ Yisɔsȧŋ ɔ pa, Ȧŋrey aŋ ba hɛ ɛlɔkɔ tɔfɔt yɛrəŋ-i? Bepi wuni ɔ kɔth rəyaŋ-e, ɔ pəth hɛ, ȧtesoma-e ɔ nənk ȧŋmothȧ ŋa ȧdȧru are.

¹⁰ Kɛrɛ bepi wuni ɔ kɔth tatak-e, ɔ tə pəth; ȧtesoma-e ȧŋmothȧ aŋ yi hɛ rokor kɔŋ.

¹¹ Yisɔsȧŋ ɔ pa mȧtȧy ame, kədarəŋ kati ɔ pa, Lasarɔs ɔyathki kȧsu ɔ dirȧ, kɛrɛ i kɔ kȧmȧ i thəmi kɔ.

¹² Aŋkarande ŋɔŋ aŋ pa, Mariki, bepi ɔ dirȧ-e, pə tə fisa kɔ.

¹³ Kɛrɛ Yisɔsȧŋ ɔ fɔf ta rafi rɔŋ; aŋ nanɛ kəpa ɔ fɔf ta kafothanɛ ka mərey.

¹⁴ Ka Yisɔsȧŋ ɔ kanɛ ŋa gbəraŋ kəpa, Lasarɔs ɔ po fi.

¹⁵ Ɔwa salata nu pə bɔnɛ mi mə i te bəpər, kȧmȧ nə lanɛ mi; kɛrɛ maŋ kɔnɛ nu thɔŋ ro ŋɔŋ.

¹⁶ Ka Thɔmɔs ɔwe a bont kȧbȧri, ɔ pa ka aŋkarande alɔm, Maŋ kɔnɛ nu sɔ, kȧmȧ sə fi yi kɔnɔ.

¹⁷ Ma Yisɔsȧŋ ɔ bek-e, ɔ bəp Lasarɔsȧŋ ɔ po thɔ yi ka kȧboma mərey manlɛ.

¹⁸ Ɔwa Bɛthani kə yi ɔfati yi ro Yerusalɛm, mɔlɔ ma ɛmail yɛrəŋ:

¹⁹ ka aŋYuda agbȧthi aŋ der ka Matha yi Merɛŋ, tə kəbɛfəth ŋa ta ɔwɔnt ka ŋaŋ uruni.

²⁰ Ɔwa ma Marthaŋ ɔ təl kəpa Yisɔsȧŋ ɔ tə der-e, ɔ kɔnɛ tə kəgbans kɔ: kɛrɛ Merɛŋ ɔ yirȧ ras ro seth.

²¹ Ka Mathaŋ ɔ pa ka Yisɔs, Pa bepi munɔ mə bəpər naŋ-e, ɔwɔnt mi ɔ fi hɛ naŋ.

²² Kɛrɛ hali ka-ake, i tȧrȧ kəpa tȧy o tȧy ȧte mə yif Kuru-e, Kurɔŋ ɔ tə sɔŋ mu ti.

²³ Yisɔs ɔ pa ro ŋɔŋ, Ɔwɔnt mu ɔ tə yokanɛ sɔ.

²⁴ Mathaŋ ɔ pa ro ŋɔŋ, I tȧrȧ kəpa ɔ tə yokanɛ sɔ ka kȧyokanɛ ka ȧŋrey aləpsɔ.

²⁵ Yisɔsȧŋ ɔ pa ro ŋɔŋ, Minɛ yi kȧyokanɛ, yi aŋesəm: kɔn ɔwe mə lanɛ mi, hali ɔ po fi, ɔ tə kȧl kəli:

²⁶ ɔwa wuni o wuni ɔwe kəli ɔwa ɔ lanɛ mi-e, ɔ ba hɛ kəfi thəbana. Mə lanɛ ȧte-i?

²⁷ Ɔ lasi ɔ pa, Aŋko, Pa; i lanɛ kəpa munɔ mə yi ɔKrayst, ɔWan ka Kuru, ɔwe yi tə kəder ka ȧdȧru.

²⁸ Ɔwa ma ɔ po pa ȧte, ɔ kɔnɛ, ɔ tela Merɛŋ ɔwɔnt kɔŋ ubɛra sɔy, ɔ pa, ƆKarmɔkɔ ɔ po der, ɔ tela mu.

²⁹ Ma ɔ təl ȧte, ɔ yokanɛ lɛmp, ɔ kɔnɛ ro ŋɔŋ.

³⁰ Ɔwa Yisɔsȧŋ ɔ tha bek hɛ ro pet, ɔ yi ras ka ɔdɛr ro Mathaŋ ɔ bəp kɔ.

³¹ AŋYuda aŋa yi yi Merɛŋ ro seth aŋa bɛfəth kɔ-e, maŋ nənk ɔ yokanɛ lɛmp ɔ wur-e, aŋ tȧŋ kɔ, aŋ nanɛ kəpa ɔ kɔnɛ ka kȧboma tə kəbok ri.

³² Ma Merɛŋ ɔ bek ro Yisɔs ɔ yi-e, ɔwa ɔ nənk kɔ, ɔ gbəpsa ro thɔf ka ȧtȧtək tɔŋ, ɔ pa ro ŋɔŋ, Pa, bepi munɔ mə bəpər naŋ-e, ɔwɔnt mi ɔ fi hɛ naŋ.

³³ Ma Yisɔsȧŋ ɔ nənk kɔ ɔ bok-e, yi aŋYuda aŋa der yi kɔnɔ, ɔ laŋ rə ȧmerȧ, ɔwa pə kɛtha kɔ,

³⁴ kɔ pa, Reke nə bot kɔ-e? Aŋ pa ro ŋɔŋ, Pa, der mə kəli.

³⁵ Yisɔsȧŋ ɔ bok.

³⁶ Tiyȧŋ aŋYuda aŋ pa, Kəla ma ɔ bɔthər kɔ!

³⁷ Kɛrɛ alɔm aŋ pa, Ɔlaŋgba ɔwe, ɔwe kanthi ɛfɔr ya aŋfith, ɔ gbəli hɛ naŋ yɔ kȧmȧ ɔwuni ɔwe ɔ te fi-i?

³⁸ Tiyȧŋ Yisɔsȧŋ ɔ laŋ sɔ rə ȧmerȧ, ɔ der ka kȧboma. Kəyaŋka kaŋ ɔwa ȧsar aŋ yi ka ɔwɔnd wati.

³⁹ Ka Yisɔsȧŋ ɔ pa, Səka nu aŋsar. Mathaŋ, ɔwɔnt ubɛra ka ɔwe po fi, ɔ pa ro ŋɔŋ, Pa ɔ tə bup thɔŋ: kotȧy-e mərey manlɛ thɔŋ ma ɔ po fi.

⁴⁰ Yisɔsȧŋ ɔ pa ro ŋɔŋ, I kanɛ hɛ mu naŋ kəpa, bepi mə lanɛ mə tə nənk aŋyiki ŋa Kuru-i?

⁴¹ kaŋ səka aŋsar. Ka Yisɔsȧŋ ɔ lakthɛ, ɔ pa, Pa i muti mu mɔmɔ ma mə po təlȧ mi.

⁴² Ɔwa i tȧrȧ mə təlȧ mi lɔkɔ o lɔkɔ: kɛrɛ salata aŋfəm aŋa təmȧ təmȧ nɔ i pa ti, kȧmȧ aŋ lanɛ kəpa munɔ som mi.

⁴³ Ma ɔ po pa ȧte, ɔ pa rə rim rəbana, Lasarɔs, wur!

⁴⁴ Ɔwa kɔnɔ ɔwe fi naŋ-e, ɔ wur, ȧtȧtək tɔŋ yi mȧta mɔŋ mə yi məsek yi kasaŋke, ɔwa a rapər ader rɔŋ yi agbasa ȧferȧ. Yisɔsȧŋ ɔ pa ro ŋaŋ, Səli kɔ nu, kȧmȧ ɔ kɔnɛ.

⁴⁵ Tiyȧŋ aŋYuda agbȧthi aŋa der ka Meri, maŋ nənk ȧte Yisɔsȧŋ ɔ yɔ-e, aŋ lanɛ kɔ.

⁴⁶ Kɛrɛ alɔm aŋ kɔnɛ ka aŋFarisi, kaŋ kanɛ ŋa mȧtȧy ama Yisɔsȧŋ ɔ po yɔ.

⁴⁷ Ka aŋfode abana yi aŋFarisi aŋ thoŋkla aŋSanhedrin, kaŋ pa, To mə sə yɔ-e? kotȧy-e ɔwuni ɔwe ɔ yɔ ɛmisali ɛgbathi,

⁴⁸ bepi sə ter kɔ gbo yaŋ-e, afəm bɛ aŋ tə lanɛ kɔ: ɔwa aŋRom aŋ tə der aŋ tə nɔy mayira ma su yi ȧŋbona a su.

⁴⁹ Kɛrɛ ukin ka ŋaŋ, Kayafas, mɔ ɔ yi ɔfode ubana karen kati, ɔ pa ro ŋaŋ, Nə tɛ hɛ koko,

⁵⁰ nə nanɛ hɛ kəpa pə fisa su kȧmȧ wuni kin ɔ fi ta aŋfəm, kȧmȧ ȧŋbona bɛ aŋ te dinɛ-i?

⁵¹ Ɔ pa hɛ ȧte ka ȧŋmerȧ ŋɔŋ: kɛrɛ mɔ ɔ yi ɔfode ubana ka karen kati, ɔ nȧbi kəpa Yisɔsȧŋ ɔ tə fi ta ȧŋbona;

⁵² ɔwa pə yi hɛ ta ȧŋbona ŋati son, kɛrɛ kȧmȧ ɔ thoŋkla dɛr ɔkin aŋwuth ŋa Kuru sɔ aŋa po sakanɛ.

⁵³ Tiyȧŋ kətəp ka ȧŋrey ŋati aŋ nəŋkanɛ kȧmȧ aŋ dif Yisɔsȧŋ.

⁵⁴ Tiyȧŋ Yisɔsȧŋ ɔ kɔth hɛ sɔ gbafəth kətɔŋ ka aŋYuda; ɔ wur ri ɔ kɔnɛ ka ȧŋthɔf aŋa fatər ro wula, ka kȧpet ȧke a bont Ifrem, ɔ yirȧ ri yi aŋkarande ŋɔŋ.

⁵⁵ Ka amet ma kapainɛ ma aŋYuda mə fat: ka afəm agbȧthi aŋ kɔnɛ ro Yerusalɛm, kəwur ka ȧŋgbȧp ŋati yeŋka amet mə bek, kȧmȧ aŋ gbilinɛ.

⁵⁶ kaŋ thɛns Yisɔsȧŋ, kaŋ fɔflanɛ maŋ təmȧ ka ȧŋseth ŋa Kuru, aŋ pa, To nə nanɛ ɔ der hɛ ka amet-e?

⁵⁷ Aŋfode abana yi aŋFarisi aŋ po yamari kəpa, bepi wuni o wuni ɔ tȧrȧ ro ɔ yi-e, ɔ ba kətɔri ti, kȧmȧ aŋ wop kɔ.