AŋƐfisɔs 6 - Ȧŋlemrȧnɛ Ȧfu

¹ Afɛth, wop nu ȧrim ra aŋa kom nu rokor ka ɔMarki, pəkasifɛ tȧy təlompi tȧŋ.

² Yikis ɔkas dɛ yi ɔkara ka mu, (aŋe ŋə yi ȧŋthɔ ȧtɔtɔkɔ aŋa ba alahiri),

³ kȧmȧ pə yi nu ɔfinɔ dɛ yi kȧmȧ nə bɔl ŋesəm ka ȧdȧru.

⁴ Ɔwa naŋ akas, te nu bansəs aŋwuth a nu, kɛrɛ rusəm ŋa ka kathəksa dɛ yi ɛmaŋ ya ɔMarki.

⁵ Naŋ ɛbɔy, wop nu ȧrim ra ŋaŋ aŋa yi amarki a nu ka rawuni kəpet, rə rənes yi kəyɛr, dɛ yi rə ȧmerȧ ȧferȧ, mɔ ka Krayst.

⁶ Ta pə te yi rə kəyɔna gbo ro der ka ŋaŋ kəri, mɔ ŋaŋ aŋa mə yɔr tə kəbɔnɛs afəm. Kɛrɛ ta pə yi mɔ ɛbɔy ya Krayst aŋa mə yɔ mȧselɔ ma Kuru ka ɛmerȧ yaŋ.

⁷ Yɔ nu mapanth ma nu rə kəselɔ kəfinɔ mɔ ta ɔMarki, pə yi hɛ ta afəm.

⁸ Nə tȧrȧ kəpa tȧy o tȧy təfinɔ ȧtȧ wuni o wuni ɔ yɔ, ɔ tə sɔthɔ ȧŋrȧm ŋati ka ɔMarki, bepi pə yi utar thalɔm uwaŋkom.

⁹ Ɔwa naŋ amarki, yɔ nu yaŋ sɔ do rɔŋaŋ, ɔwa te gbind ŋa; fɔtha nə tȧrȧ kəpa ɔMarki ɔka nu dɛ yi ɔka ŋaŋ ɔ yi ro riyana, ɔwa kɔnɔ ɔ ba hɛ agbȧy.

¹⁰ Ka kaləpsɔ, aŋwɔnt a mi, yi nu abȧki mədɛr ka ɔMarki, dɛ yi ka aŋfɔsɔ ŋa kagbəli tȧy kɔŋ.

¹¹ Wɔŋ nu ɛyɛt ɛtima bɛ ya Kuru, kȧmȧ nə gbəli təmȧ tə kətham masɔth ma Sethani.

¹² kotȧy-e katim kȧsu kə yi hɛ kəŋamnɛ mədɛr yi mətir, kɛrɛ kəŋamnɛ ŋatəbomp-e, təbay-e, aŋgbəka ŋa ȧŋsum ŋa ȧdȧru are-e, dɛ yi kəŋamnɛ ɛyina ɛləs ya aŋfena.

¹³ Tiyȧŋ gbasi nu ɛyɛt ɛtima ɛlolok bɛ ya Kuru, kȧmȧ nə gbəli təmȧ ka ȧŋrey aləs, ɔwa kədarəŋ ka ma nə poŋ yɔ bɛ-e, nə kȧl təmȧ ɔbaksər.

¹⁴ Tiyȧŋ, təmȧ nu, ma nə po senɛ ɛfi ɛ nu rə təteŋ, dɛ yi nə po wɔŋ rafat ra aŋkəpət ra mȧlompi.

¹⁵ Ɔwa sɔ-e, wɔŋ nu ɛkɔftha ya ɛgbatɛnɛ ya ȧkɛra kəfinɔ ka mȧthɔfəl.

¹⁶ Pə thas ri sɔ-e, gbasi nu ȧŋbintha ŋa kȧlanɛ, ɔwa di kati nə tə gbəli dimsi mȧsenɔ məmara bɛ ma ɔkərəfi uləs.

¹⁷ Ɔwa gbasi nu sɔ aŋsənder ŋa kəkisi, dɛ yi aŋgbathɔ ŋa ɔYina, aŋa yi ȧrim ra Kuru.

¹⁸ Lɔkɔ o lɔkɔ ramnɛ nu rə kənɛmthɛnɛ bɛ ro Yina, ɔwa bum nu rə kəmuyu bɛ dɛ yi təramnɛ salata aŋfəm asəm bɛ.

¹⁹ Dɛ yi ta ȧtȧ mi sɔ, kȧmȧ a sɔŋ mi sim dɛ yi kəmintha kȧmȧ i gbəli tɔri aŋgbundu ŋa ȧkɛra kəfinɔ ka Kuru Məsaba kəte ba rənes.

²⁰ Ɔwa ka ȧŋsabu aŋe i yi usom ka tɔrɛntha, kȧmȧ i gbəli fɔf rə kəmintha mɔ mə i yi tə kəfɔf.

²¹ Kɛrɛ kȧmȧ naŋ sɔ nə gbəli tȧrȧ mȧtȧy ma mi dɛ yi ȧtȧ i yɔ-e, Tikikɔs ɔwɔnt ubɔthər dɛ yi ubɔthi lanɛ ka ɔMarki, ɔ tə tɔri nu mȧtȧy bɛ.

²² I poŋ som kɔ do rɔnu kȧmȧ nə tȧrȧ ta ȧtȧ su, dɛ yi kȧmȧ ɔ bɛfəth ɛmerȧ ɛ nu.

²³ Ta məthɔfəl mə yi ka aŋwɔnt dɛ yi məbɔthər rə kəlanɛ, kəwur ka Kuru ɔKas dɛ yi ɔMarki Yisɔs Kraystȧŋ.

²⁴ Ta aboŋa aŋ yi dɛ yi ŋa bɛ aŋa bɔthər ɔMarki kȧsu Yisɔs Kraystȧŋ rə ȧmerȧ ȧferȧ. Amina.