AŋƐfisɔs 2 - Ȧŋlemrȧnɛ Ȧfu

¹ Ɔwa naŋ sɔ, Kuru ɔ po kəlis nu ma nə la yi ras afi ka ɛhakɛ yi mȧyɔs ma nu mələs;

² ro pə yi nə la kɔth ka matanɛ ma ȧdȧru are, kətȧŋȧnɛ ka ɔbȧy ka ɛfɔsɔ ya aŋfena, pə yi mɔ-e aŋyina aŋa mə korakora ɛmerȧ ya aŋwuth ȧthȧnthonɛ.

³ Saŋ sɔ sə la yirȧ kətɔŋ ka ŋaŋ ka maləs ma madɛr ma su, rə kətaŋ gbo mafela ma madɛr dɛ yi ɛnanɛ yati; pəkasifɛ kətȧŋȧnɛ ka kakom kȧsu sə yi saŋ aŋwuth ŋa rəbaŋ, mɔ afəm alɔm bɛ.

⁴ Kɛrɛ Kuru ɔwe ba ȧney abana-e, kəwur ka mabɔthər mɔŋ məbana ama ɔ po bɔthər su-e,

⁵ hali ma sə yi saŋ afi ka ɛhakɛ-e, ɔ kȧl sɔŋ su aŋesəm dɛ yi Kraystȧŋ, (a kisis nu ka aboŋa);

⁶ kɔ yokas su dɛ yi kɔn, kɔ yɔ su sə yirȧ dɛ yi kɔn ka riyana rokor ka Krayst Yisɔs;

⁷ kama-e, ka ɛlɔkɔ ɛyɛ ba kəder-e, ɔ gbəli tɔri rayola ra ȧŋboŋa ŋɔŋ abana kətȧŋȧnɛ ka mathɔth mɔŋ ta ȧtȧ su rokor ka Yisɔs Kraystȧŋ.

⁸ kotȧy-e rȧ aboŋa a kisis nu asabu ŋa kəlanɛ; pə yi hɛ ka aŋfɔsɔ a nu, pə yi ȧŋboya ŋa Kuru Məsaba.

⁹ Ka mȧyɔs thahɔ ta thani wuni o wuni ɔ kori korinɛ.

¹⁰ kotȧy-e saŋ sə yi mapanth ma mȧta mɔŋ-e, kɔ bɛmpa su rokor ka Yisɔs Krayst ta məyɔs məfinɔ ama Kuru ɔ bot thəpaŋ kȧmȧ sə kɔth rə kəyɔ ma.

¹¹ Tiyȧŋ kala nu ȧmerȧ kəpa naŋ nə la yi təbona təlɔm ka rawuni kəpet-e, aŋa ȧŋbirons aŋ tela ante birons kabirons ȧke ma yɔ rɛ məta maŋ ley.

¹² Ȧŋlɔkɔ ŋati nə tɛ hɛ Krayst, ka a gbaski nu ka andure ŋa Isrɛl, pə yi mɔ-e, nə yi gbo atik ka aŋlemranɛ ŋa aŋlahiri, ɔwa nə ba hɛ kəgbak ȧmerȧ thalɔm Kuru Məsaba ka ȧdȧru.

¹³ Kɛrɛ ka-ake ka Yisɔs Kraystȧŋ ŋaŋ aŋa la yi abɔlanɛ-e, a yɔ nu nə fatər gbɛpti asabu ŋa mȧtir ma Kraystȧŋ.

¹⁴ Ȧtesoma-e kɔnɔ yi mathɔfəl ma su, ɔwe poŋ səki aŋYuda dɛ yi tȧbona təlɔm afəm ŋin, ɔwa sɔ-e, ɔ yɛksi aŋgbiŋgbiŋ aŋa yi kətɔŋ kȧsu;

¹⁵ ma ɔ po nɔy ka ȧŋdɛr ŋɔŋ magbɛŋanɛ, pə yi mɔ-e ȧŋthɔ ŋa ɛyamari ɛyɛ a po gbal, kȧmȧ pə re yi rokor ka aŋyɛthɛ ŋɔŋ-e, afəm ŋarəŋ aŋe aŋ səkɛ wuni kin ufu, ɔwa yaŋ ɔ bɛmpa məthɔfəl.

¹⁶ Kama ɔ yɔ aŋYuda dɛ yi tȧbona təlɔm saŋ ŋarəŋ sə kȧl manɛ dɛ yi Kurɔŋ mɔ adɛr ŋin asabu ŋa akənt kəpəŋkinɛ-e, ro pə yi magbɛŋanɛ mati mə poŋ.

¹⁷ Tiyȧŋ Yisɔs ɔ der ɔ kawandi məthɔfəl do rɔnu aŋa yi abɔli dɛ yi sɔ rɔŋaŋ aŋa yi afati.

¹⁸ Ȧtesoma-e kətaŋ do rɔŋɔŋ-e, saŋ bɛ sə sɔthɔ roŋ ra kəwɔŋ ka ɔKas kətȧŋȧnɛ ka ɔYina ukin.

¹⁹ Te ba ti nə yi hɛ sɔ atik dɛ yi afəm ȧtel, kɛrɛ nə yi aŋkos ŋa aŋfəm ŋa Kuru, nə yi ka kabɔr ka Kuru.

²⁰ Ka a təmər nu rokɔm ka ɔtəmər wa aŋsom dɛ yi Aŋnȧbi, ɔwa Yisɔs Krayst kɔn kɔnɔnɛ ɔ yi aŋsar ȧtɔtɔkɔ ŋa ȧŋkoŋ;

²¹ ro pə yi ȧŋseth alolok bɛ aŋ gbɛptanɛ dɛ yi aŋ bȧrnɛ haŋ aŋ səkɛ aseth asəm ta Kuru rokor ka ɔMarki.

²² Kətȧŋ do rɔŋɔŋ naŋ sɔ a kȧl seth nu dɛr ɔkin kȧmȧ nə yi dɛr ɔyiya wa ȧŋyina ŋa Kuru.