AŋKɔlɔsi 4 - Ȧŋlemrȧnɛ Ȧfu

¹ Nia amarki, sɔŋ ɛbɔy ɛ nu ara yi rəlompi dɛ yi rəbeki, ma nə tȧrȧ kəpa naŋ sɔ nə ba uMarki ro riyana.

² Bȧsər nu ka kəramnɛ, ɔwa bumnɛ nu rə kəmuti mɔmɔ.

³ Ramnɛ nu sɔ ta ȧtȧ su, kȧmȧ Kuru ɔ kanthɛ su roŋ ta ȧrim, kȧmȧ sə gbəli taməs aŋgbundu ŋa Kraystȧŋ, ta aŋa minɛ i yi ka tɔrɛntha.

⁴ Kama i tɔri ti gbafəth mɔ mɛ yi tə kəyɔ.

⁵ Kɔth nu rə kətemp rodi ka ŋaŋ aŋa te lanɛ, ɔwa botnɛ nu to mə nə kianɛ ȧŋlɔkɔ.

⁶ Yɔ kȧmȧ mafɔf ma nu mə yi rə aboŋa mɔ mə a bɔthəs rəka rɛ mɛr lɔkɔ o lɔkɔ, kȧmȧ nə tȧrȧ to mə nə yi tə kəgbaki wuni o wuni.

⁷ Tikikɔs ɔwe yi ɔwɔnt ubɔthər yi ɔkawandi ubɔthi lanɛ, dɛ yi ɔkos a su ubɔy ka ɔMarki, kɔnɔ mə ba tə kətɔri nu mȧtȧy ma mi bɛ,

⁸ ȧtesoma-e i po som kɔ ro rɔnu ta ȧŋsabu ŋati gbeŋ, kȧmȧ nə gbəli tȧrȧ to pə yi do rɔsu, dɛ yi kȧmȧ ɔ bɛfəth ɛmerȧ ɛ nu.

⁹ Ɔwa i som sɔ Onesimus yi kɔn, ɔwe yi ɔwɔnt ubɔthi lanɛ, ubɔthər, ɔwa ukin ka nu sɔ. Aŋ tə tɔri nu to pə yi anɔ.

¹⁰ Aristarkɔs ɔkas kȧmi ka tɔrɛntha ɔ kori nu, dɛ yi Mak-əŋ, ɔwan ka ɔwɔnt bɛra ka Banabasȧŋ, kɔnɔ kori nu sɔ. (Nə po sɔthɔ akanɛ ta atɔŋ, ɔwa bepi ɔ der do rɔnu-e, malanɛ kɔ nu).

¹¹ Yisɔs ɔwe a bont Yustɔs, ɔ kori nu sɔ; aŋe, ŋa yi ka ȧŋbirons. Ŋaŋ sɔ aŋ yi amar a mi ka mapanth ma rȧbȧy ra Kuru, afəm ŋaŋ aŋa poŋ mi bɛfəth.

¹² Ɛpafras ɔwe yi ukin ka nu-e, ȧbɔy ŋa Yisɔs Krayst, ɔ kori nu; lɔkɔ o lɔkɔ ɔ sulnɛ ka taramnɛ tɔŋ ta ȧtȧ nu, kȧmȧ nə təmȧ agbenthis dɛ yi apələnɛ ka mȧselɔ ma Kuru.

¹³ Minɛ i gbəli seri kəpa ɔ yɔ məpanth məbaki mədɛr ta ȧtȧ nu, dɛ yi ta ȧtȧ ŋaŋ ro Lawodishya, dɛ yi ro Hirapɔlis.

¹⁴ Luk, ɔbolomba ubɔthər, yi Dimas, aŋ kori nu.

¹⁵ Kori nu aŋwɔnt aŋa yi ro Lawodishya, yi Nimfas, dɛ yi aŋchɔch aŋa gbanɛ ro seth kɔŋ.

¹⁶ Ma nə po karaŋ ȧŋreka aŋe-e, yɔ kȧmȧ aŋchɔch ro Lawodishya aŋ karaŋ ŋi sɔ; ɔwa naŋ, nə yi sɔ tə kəkaraŋ ȧŋreka ŋa Lawodishya.

¹⁷ Kanɛ Arkipɔs kȧmȧ ɔ bot ȧmerȧ tə kəlasər mapanth ama ɔ sɔthɔ ka ɔMarki.

¹⁸ Aŋkori ŋa minɛ Pɔl, ŋiyȧŋ, ka kȧta kȧmi gbeŋ. Nanɛ atɔrɛntha ta mi. Aboŋa aŋ yi do rɔnu. Amina.