AŋKɔlɔsi 2 - Ȧŋlemrȧnɛ Ȧfu

¹ I yema kȧmȧ nə tȧrȧ ko kətim kəbana i ba ta ȧtȧ nu, yi ta ȧtȧ ŋaŋ aŋa yi ro Lawodishya, dɛ yi ta ȧtȧ ŋaŋ bɛ aŋa te tha nəŋka mi rəfɔr.

² Kama ɛmerȧ yaŋ ɛ gbəli ba kəbɛfəth, maŋ yi asekəranɛ yi məbɔthər, tə kətara rayola ra kasɔthnɛ aŋgbundu ŋa Kuru, hali Kraystȧŋ,

³ ma pə yi a maŋk do rɔŋɔŋ atɛŋ ta kȧtemp dɛ yi kȧtara tȧy bɛ.

⁴ Ɔwa i pa ȧte, kȧmȧ wuni o wuni ɔ te tons nu yi təfɔf təbɔthi təl.

⁵ kotȧy-e hali ma i te bəpər ka madɛr-e, i yi dɛ yi naŋ ka ȧŋmerȧ a mi, ka pə bɔnɛ mi ma i nənk mabotəs dɛ yi kabotərnɛ ka nu ȧmerȧ ka kȧlanɛ ka Krayst.

⁶ Tiyȧŋ mɔ mə nə po malanɛ Krayst Yisɔs ɔMarki, yaŋ nə yi tə kəkɔth sɔ do rɔŋɔŋ.

⁷ Ta a təmər nu rə kəba ɛthəŋk ɛ nu do rɔŋɔŋ, ɔwa ta nə yi sɔ ȧbȧksər ka kȧlanɛ ka nu, mɔlɔ ma a po thəksa nu rɛ mɔmɔ məgbathi.

⁸ Bumnɛ nu kȧmȧ wuni o wuni ɔ te ləsər nu rə mətamtamnɛ yi ayaŋfa ayay yay, kətaŋ ka ɛnanɛ ya afəm a kəpet dɛ yi ka mayi ma ȧdȧru are-e, pə yi hɛ kətaŋ ka Krayst.

⁹ kotȧy-e do rɔŋɔŋ ɔlasər wa Kuru Məsaba bɛ ɔ bȧkər.

¹⁰ Ɔwa naŋ nə yi agbenthis do rɔŋɔŋ, ɔwe yi ɔgbəka ka agbəka dɛ yi ɔbȧy ka abȧy bɛ.

¹¹ A birons nu do rɔŋɔŋ sɔ yi kabirons ȧke te yi rə məta, ma nə bus mayi mələs ma madɛr ka kabirons ka Krayst.

¹² Ka a po maŋk nu yi kɔn ka ȧŋbaftisəm, ro pə yi ka-ake a yokas nu sɔ yi kɔn kətȧŋȧnɛ ka kȧlanɛ ka mapanth ma Kuru ɔwe po yokas kɔ ka rafi.

¹³ Ɔwa naŋ, ma nə yi ras afi asabu ŋa ɛhakɛ ɛ nu dɛ yi kate birons ka madɛr ma nu-e, a po kəlis nu, (i kȧl pa ti), yi Kraystȧŋ, kɔ tera su makənȧ ma su bɛ.

¹⁴ kɔ nasi maseri ma ȧŋthɔ ama təmȧ kəŋamnɛ su dɛ yi kələsər su, kɔ tɔŋa ma, ɔwa ɔ tȧŋ tȧŋ ma ka akənt kɔŋ kəpəŋkinɛ;

¹⁵ kɔ ləsər aŋfɔsɔ ŋa agbəka dɛ yi abȧy bɛ, ɔwa ɔ tɔri gbafəth kəpa ɔ po tham ŋa ka akənt kɔŋ kəpəŋkinɛ.

¹⁶ Tiyȧŋ ta wuni o wuni ɔ te nu thonkas salata kədi-o, kəmun-o, ɛmet-o, thalɔm ŋof afu-o, ta a pa ras aŋsabath.

¹⁷ Mȧtȧy ame mə yi gbo amumpəl ŋa mȧtȧy ama ba kəder, kɛrɛ ȧŋdɛr gbeŋ aŋ yi ka Kraystȧŋ.

¹⁸ Te selɔ wuni o wuni ɔ keyr nu ȧŋrȧm a nu rə kəyɔ nu nə ba kəthoranɛ kəyɔr, thalɔm rə kəbatho amaleka; pə yi wuni ɔwe mə kori korinɛ ka manəŋk ama ɔ po nənk, kɔ ŋatanɛ rə ȧmerȧ afoth kətȧŋȧnɛ ka mafela ma madɛr.

¹⁹ Wuni wunɔŋ ɔ wop hɛ gbaŋ ka Kraystȧŋ rȧbomp, ro pə yi ȧŋdɛr alolok bɛ aŋ sɔthɔ aŋfɔsɔ ŋati, kȧmȧ pə re yi ɔ ɔkɔtir o kɔtir dɛ yi nəbəntha o bəntha ɛ sekəranɛ dɛr ɔkin, tə kətɛŋa yi katɛŋa ka Kuru Məsaba.

²⁰ Tiyȧŋ bepi nə po fi yi Krayst ka matanstans ma raru-e to pə som nə yɔ ras mɔ mȧ pə yi ȧdȧru rə ba nu-e, tə kəyi nə taŋanɛ ɛsiraŋ mɔ-e,

^21-22 Te gbasi, Te tham, Te gboŋ, (ma pə yi mȧtȧy ame bɛ mə tə poŋ ka kakiyanɛ kati), kətȧŋȧnɛ ka aŋyamari yi mȧthəksȧ ma wuni kəpet-e?

²³ Tɛntɛnɛ mȧtȧy ame mə ba mȧbȧlȧnɛ ma kȧtemp ȧke mə mar rə kəbatho, yi kəthorȧnɛ dɛ yi kəwopnɛ ȧŋdɛr, kɛrɛ mə mar hɛ wuni tə kətham ɛfela ya madɛr hali.