AŋRomans 6 - Ȧŋlemrȧnɛ Ȧfu

¹ To mə sə pa thɔŋ-a? Sə bȧsər nu kəyɔ ɛhakɛ kȧmȧ aboŋa aŋ la-i?

² Saki ti; saŋ aŋa po fi ta ahakɛ-e, to mə sə gbəli tiyȧ ri sɔ-e?

³ Nə tȧrȧ hɛ ti kəpa saŋ aŋa a po baftays ka Yisɔs Kraystȧŋ, a baftays su kəwɔŋ ka rafi rɔŋ-i?

⁴ Tiyȧŋ ka ȧŋbaftisəm ȧsu a maŋk su yi kɔn ka rəfi, soma mɔ mə a yɔ Krayst ɔ kȧl yokanɛ kətɔŋ ka aŋfi-e, ka aŋfɔsɔ ŋa ɔKas-e, yaŋ sɔ saŋ sə yi tə kəkɔth ka aroŋ da aŋesəm afu.

⁵ kotȧy-e bepi pə yi sə pantnɛ rɔkin yi rafi rɔŋ-e, sə tə pantnɛ tɛntɛnɛ rɔkin yi kȧyokanɛ kɔŋ ka rəfi.

⁶ Sə tȧrȧ kəpa ɔwuni kur kȧsu a po tȧŋ kɔ ka akənt kəpəŋkinɛ yi kɔn kȧmȧ mayi ma su ma ahakɛ mə gbəli dinɛ, ɔwa kȧmȧ sə te sɔ yi atar ŋa ahakɛ.

⁷ Ɔwa ɔwe po fi-e ɔ po yi kəyankaŋ kəwur ka ȧŋhakɛ.

⁸ Kɛrɛ bepi pə yi thɔŋ sə po fi yi Kraystȧŋ, sə lanɛ kəpa sə tə kȧl yi sɔ yi kɔn.

⁹ Sə tȧrȧ kəpa ma Krayst ɔ kȧl yokanɛ kətɔŋ ka aŋfi-e, ɔ fi hɛ sɔ thȧnkȧŋ. Rȧfi rə gbəli hɛ sɔ gbəka kɔ.

¹⁰ kotȧy-e rafi ara ɔ fi-e, rə yi rəfi ta ahakɛ win ta thəbana, kɛrɛ aŋesəm aŋa ɔ ba thɔŋ-e, ɔ ba ŋi ta salata Kuru.

¹¹ Yaŋ sɔ naŋ nə yi tə kəlɔmnɛ kəpa ye nə yi nia afi ta ahakɛ, kɛrɛ nə yi akəli ta Kuru salata Yisɔs Krayst ɔMarki kȧsu.

¹² Tiyȧŋ te selɔ ahakɛ aŋ gbəka ka madɛr ma nu tə kəyɔ mafela mati.

¹³ Te sɔnd malaŋktha ma madɛr ma nu ka ahakɛ mɔ ɛyɛt ɛtima ya mȧkənȧ, kɛrɛ sɔndnɛ ka Kuru mɔ afəm akəli aŋa po wur ka rəfi kəkɔ ka aŋesəm, yi malaŋktha ma madɛr ma nu mɔ ɛyɛt ɛtima ya məlompi salata Kuru.

¹⁴ kotȧy-e ahakɛ aŋ gbəli hɛ sɔ gbəka nu kȧbi nə yi hɛ sɔ ka anthɔ-e, nə yi roratha ka ȧŋboŋa ŋa Kuru.

¹⁵ To pə yi thɔŋ-a? Sə yi nu tə kəyɔ ahakɛ pəkasifɛ sə yi hɛ roratha ka ȧŋthɔ kɛrɛ roratha ka aboŋa-i? Kuru saki ti.

¹⁶ Nə tɛ hɛ kəpa ka ɔwe nə sɔndnɛ mɔ atar asanɛ, nə yi ɛbɔy ya ɔkin kati, pə yi ka ahakɛ kəkɔ ka rəfi-e, thalɔm pə yi ka kəsanɛ Kuru kəkɔ ka məlompi-i?

¹⁷ Kɛrɛ sə muti Kuru mɔmɔ pəkasifɛ ma nə la yi ɛbɔy ya ahakɛ, nə po wop rə ȧmerȧ kathəksa ȧke a tɔri nu.

¹⁸ Ma a wurɔ nu ka ratar ra ahakɛ-e, nə səkɛ atar ŋa mȧlompi.

¹⁹ I fɔf mɔ wuni kəpet salata mȧrȧnt ma madɛr ma nu; kotȧy-e mɔ mə nə la sɔnd malaŋktha ma nu tə kəyɔ mələs dɛ yi mȧkənə tətəp tətəp bɛ, ɔwa ka-ake nə yi tə kəsɔnd malaŋktha ma nu tə kəyɔ məlompi kəkɔ ka kȧsəməsnɛ.

²⁰ kotȧy-e ma nə yi ɛbɔy ya ahakɛ-e, nə paŋ məlompi;

²¹ kɛrɛ ko tȧy təfinɔ nə po sɔthɔ kəwur ka mȧyɔs mati-e, pə yi mɔ mȧyɔs ama sɔŋ nu məlap ka-ake ma nə nanɛ ma-e? Ȧtesoma-e ɔthalnɛ wa mȧyɔs mati ɔ yi rəfi.

²² Kɛrɛ ka-ake ma nə po wur ka ratar ra ahakɛ-e, ɔwa nə səkɛ antar ŋa Kuru-e, nə ba ȧŋrȧm ŋa kəsəməsnɛ dɛ yi ka ɔthalnɛ wati sɔ-e, aŋesəm thəbana.

²³ kotȧy-e ȧŋrȧm ŋa ahakɛ aŋ yi rəfi, kɛrɛ ȧŋboya ŋa Kuru aŋ yi aŋesəm thəbana rokor ka Yisɔs Krayst ɔMarki kȧsu.