AŋRomans 16 - Ȧŋlemrȧnɛ Ȧfu

¹ I maŋkər nu Fibi, ɔwɔnt su bɛra ɔwe yi ȧbɔy ŋa aŋchɔch ro Senkri,

² kȧmȧ nə malanɛ kɔ salata ɔMarki, mɔ mə aŋfəm ŋa Kuru aŋ yi tə kəyɔ, yi kȧmȧ nə mar kɔ rə tȧy o tȧy ȧtȧ ɔ yema. Ȧtesoma-e kɔn kɔnɔnɛ sɔ ɔ poŋ mar afəm agbȧthi, dɛ yi minɛ sɔ.

³ Kori Prisila yi Akuyla aŋkos a mi ka mapanth ma Yisɔs Krayst;

⁴ aŋa sɔnd talim taŋ ta salata mi; i muti ŋa mɔmɔ, ɔwa pə yi hɛ minɛ gbo son-e, kɛrɛ ɛchɔch bɛ ya tȧbona təlɔm sɔ.

⁵ Kori sɔ aŋchɔch aŋa yi ka ȧŋseth ŋaŋ. Kori Ɛpinitɔs ɔbɔthər kȧmi ufinɔ. Ɔ yi aŋkomi ȧtɔtɔkɔ ŋa Krayst ro Asia.

⁶ Kori Mariyama ɔwe po yɔna su mȧtȧy məgbathi.

⁷ Kori Andronaykɔs yi Yuniyasȧŋ, antəkom a mi; aŋ la yi dɛ yi minɛ ka ȧŋseth ŋa tȧrəŋka. Ŋa yi sɔ afəm akolo kətɔŋ ka aŋsom, kaŋ lanɛ Krayst sɔ mɔtha minɛŋ.

⁸ Kori Amplietɔs ɔbɔthər kȧmi rokor ka ɔMarki.

⁹ Kori Urbenɔs umar kȧsu ka Krayst, yi Stakis ɔbɔthər kȧmi.

¹⁰ Kori Apeles ɔwe yi ukristiɛn tə tɛntɛnɛ. Kori sɔ kabɔr ka Aristɔbulɔs.

¹¹ Kori Herodiɔn ɔwe yi ka rakom ra mi. Kori kabɔr ka Narsisɔs aŋa yi rokor ka ɔMarki.

¹² Kori Traifina yi Traifosa aŋa mə yɔ məpanth salata ɔMarki. Kori Persis ubɔthər, ɔ yɔ məpanth məgbathi ta ɔMarki.

¹³ Kori Rufɔs uthith ka ɔMarki yi ɔkara kɔŋ ɔwe po yi mɔ ɔkara kȧmi sɔ.

¹⁴ Kori Asinkritɔs, Flɛkɔn, Hamɛs, Patrobas, Hamas yi aŋwɔnt aŋa yi yi ŋaŋ.

¹⁵ Kori Filolokɔs, Yuliya, Niriyɔs yi ɔwɔnt kɔŋ ubɛra, dɛ yi Ɔlimpas yi aŋsəm bɛ aŋa yi yi ŋaŋ.

¹⁶ Korianɛ rə kəmuməlȧnɛ kəsəm. Ɛgbanɛ bɛ ya Krayst ɛ kori nu.

¹⁷ Ɔwa i nɛmthɛnɛ nu, awɔnt, lomar nu ŋaŋ aŋa mə yɔ məputhanɛ yi aŋa mə wɔŋȧ mȧtȧy ma kȧpəth kəŋamnɛ kȧthəksȧ kətəteŋ ȧke nə po thəkəs. Thȧnka ŋa.

¹⁸ Ȧtesoma-e afəm awunɔŋ aŋ yi hɛ ɛbɔy ya ɔMarki Krayst, aŋ yi gbo antar ŋa ɛmilɛ yaŋ. Ɔwa aŋ tə pəŋis ɛmerȧ ya ante tȧrȧ tȧy kətȧŋȧnɛ ka kafɔf ka ŋaŋ kəfinɔ, kəbɔthi təl.

¹⁹ A po tȧrȧ kabɔthi lanɛ ka nu dɛr o dɛr. Tiyȧŋ pə bɔnɛ mi bɛ ta ȧtȧ nu; kɛrɛ i yema nu nə yi atempi salata tȧfinɔ, yi apaŋi tȧy salata tȧləs.

²⁰ Kaŋka ɔKuru ka məthɔfəl ɔ tə gbəmər Sethani ka tatək ta nu ratha thani. Ta ȧŋboŋa ŋa ɔMarki kȧsu Yisɔs Krayst aŋ yi yi naŋ.

²¹ Timɔthi, ɔmar kȧmi ka mapanth, yi Lukəs, Yesɔn, Sɔsipatər, antəkom a mi, aŋ kori nu.

²² Minɛŋ Tatiyɔsȧŋ, minɛ gbal ȧŋreka ȧŋe, i kori mu kətȧŋ ka ɔMarki.

²³ Kayəs ɔwe yia mi, yi aŋchɔch alolok bɛ aŋ kori nu. Irastɔs ɔbɛnɛ ka ɛyɛt ɛbɛnɛ ya kȧpet, yi Kwartɔs ɔwɔnt su, aŋ kori nu.

²⁴ Ta ȧŋboŋa ŋa ɔMarki kȧsu Yisɔs Krayst aŋ yi yi naŋ bɛ.

²⁵ Ka-ake kɔn ɔwe gbəli bȧksər nu kətȧŋȧnɛ ka mapa məfinɔ ma Kuru ama a maŋkər mi, dɛ yi aŋkanɛ salata Yisɔs Kraystȧŋ, mɔlɔ ma kaŋaybi ka aŋgbundu aŋa a maŋk kȧbi ka ɔtəpɛ,

²⁶ (kɛrɛ ka-ake a tɔri ŋa gbafəth asabu ŋa mȧgbal ma Aŋnȧbi kətaŋ ka aŋyamari ŋa ɔKuru uthəbana, kȧmȧ pə re sɔk tȧbona bɛ tə kəwop kȧlanɛ),

²⁷ ta ayiki aŋ yi ka ɔKuru utempi son, salata Yisɔs Kraystȧŋ thȧnkȧŋ thəbana. Amina.