AŋRomans 14 - Ȧŋlemrȧnɛ Ȧfu

¹ Malanɛ nu ɔwɔnt ɔwe ba gbo kəlanɛ kəthan, te thoŋka thoŋka yi kɔn.

² Kȧlanɛ ka wuni kin kə mar ɔ di rəka, kɛrɛ ulɔm ɔwe ba kəlanɛ kəthan ɔ di ɛbuma gbo.

³ Ta ɔwuni ɔwe di-e ɔ te farki kɔn ɔwe te di; ɔwa ɔwe te di ɔ te thonkas ɔwe mə di, ȧtesoma-e Kuru ɔ po malanɛ kɔ.

⁴ Mun kanɛ ɔwe mə thonkas ȧŋbɔy ŋa wuni lɔm-e? Ka ɔmarki kɔŋ ɔ təmȧ, thalɔm ɔ fumpɔ. Ɔwa ɔ tə təmȧ yathi, pəkasifɛ ɔMarki ɔ ba afɔsɔ tə kətəmər kɔ.

⁵ Wuni kin ɔ nanɛ kəpa ȧrey ŋin aŋ thas alɔm; wuni lɔm ɔ nanɛ kəpa ȧrey o rei aŋ yi mɔlɔ min. Ta wuni o wuni ɔ tȧrȧ ti asɔbɛ ka ȧŋmerȧ ŋɔŋ.

⁶ Ɔwuni ɔwe mə wop ȧŋrey ɔ wop ŋi salata ɔMarki, dɛ yi kɔn ɔwe di ɔ di salata ɔMarki, kotȧy-e ɔ muti Kuru mɔmɔ. Ɔwa ɔwuni ɔwe mə te di-e, ɔ di hɛ salata ɔMarki, kɔ muti Kuru mɔmɔ sɔ.

⁷ Ȧtesoma-e ukin kȧsu ɔ yi hɛ ɔwe mə yi gbo salata anyɛthɛ ŋɔŋ, ɔwa ukin kȧsu ɔ fi hɛ salata aŋyɛthɛ ŋɔŋ gbo gbɛt.

⁸ kotȧy-e bepi sə yi sa akəli-e, sə yi sa akəli ta ɔMarki; ɔwa bepi sə fi-e, sə fi ta ɔMarki. Tiyȧŋ pə yi sɔ kəli-o, pə yi sə fi-o, ɔMarki kɔnɔ ba su.

⁹ Tesoma Krayst ɔ fi, kɔ kȧl kəli, kȧmȧ ɔ gbəli yi ɔMarki ka aŋfi dɛ yi ka aŋkəli.

¹⁰ Kɛrɛ munɔŋ, kɔyɛŋ mȧ mə thonkas ɔwɔnt a mu-i? Thalɔm munɔŋ sɔ, to pə som mȧ mə fəŋfərəs ɔwɔnt a mu-e? kotȧy-e saŋ bɛ sə ba tə kətəma rodi ka kawaŋ ka kərɔk ɛpa ka Krayst.

¹¹ kotȧy-e ɔ po gbal kəpa, Kəbi ma i yi ras, ɔMarki ɔ pa, Wuni o wuni ɔ tə sɔna mi tawu, Dɛ yi rəmer rə tə seri ta Kuru.

¹² Te ba ti ukin o kin kȧsu sə ba kəlɔmsənɛ ka Kuru.

¹³ Tiyȧŋ maŋ te nu thoŋkasanɛ, kɛrɛ maŋ botnɛ ti rə ȧmerȧ kȧmȧ wuni o wuni ɔ te bot da rəpəth ka aroŋ da ɔwɔnt kɔŋ thalɔm tȧy ȧtȧ mə yɔ ɔ pənthbəla.

¹⁴ I tȧrȧ ti, ɔwa pə sɔk mi gbəraŋ rokor ka ɔMarki Yisɔs, kəpa rəka o rəka rɛrɛnɛ-əŋ rə yi hɛ rənɔkɔ; kɛrɛ wuni o wuni ɔwe mə nənk rəka mɔ mə rə yi rənɔkɔ-e, rə yi rənɔkɔ yathi do rɔŋɔŋ.

¹⁵ Bepi ra rədi ra mu rə kɛthanɛ ɔwɔnt mu-e, di kati mə kɔth hɛ sɔ ka mȧbɔthər. Te ləsər kɔ yi da rədi ra mu, ma pə yi Krayst ɔ fi ta atɔŋ.

¹⁶ Te yɔ kȧmȧ ɔ fɔf ɔləs ta ȧtȧy ta mu təfinɔ.

¹⁷ ȧtesoma-e rȧbȧy ra Kuru rə yi hɛ kədi yi kəmun, kɛrɛ rə yi məlompi, yi məthɔfəl dɛ yi məbɔnɛ rokor ka ɔYina məsəm.

¹⁸ Pəkasifɛ kɔn ɔwe mə bȧtho Krayst yaŋ-e, ɔ thesis ȧŋmerȧ ŋa Kuru, dɛ yi afəm sɔ.

¹⁹ Tiyȧŋ maŋ taŋanɛ nu mȧtȧy ama mə sɔŋ məthɔfəl, yi mȧtȧy ama mə tempəs ukin yi ulɔmȧŋ.

²⁰ Te ləsər mȧpanth ma Kuru salata ra rədi. Ɛyɛt bɛ ɛyi ɛgbəraŋ, kɛrɛ wuni ɔ yɔ ɔləs bepi ɛdi yɔŋ ɛ kɛthas ulɔm.

²¹ Pə yi hɛ naŋ ɔfinɔ tə kədi ɔsɛm thalɔm tə kəmun məber, thalɔm tə kəyɔ koko ȧtȧ mə yɔ ɔwɔnt mu ɔ pənthbəla.

²² Bepi mə ba kəlanɛ-e, bɛnɛ ki kətɔŋ ka mu yi Kurɔŋ. Wuni ruba wɔŋ ɔwe mə te thoŋkasnɛ salata ȧtȧy ȧtȧ ɔ yɔ.

²³ Kɛrɛ ɔwe mə sikɛ ɔ ba mətheri bepi ɔ di, pəkasifɛ ɔ yɔ hɛ ti rə kəlanɛ; ɔwa tȧy o tȧy ȧtȧ te wur rə kəlanɛ tə yi ahakɛ.