AŋHibru 8 - Ȧŋlemrȧnɛ Ȧfu

¹ Ɔwa aŋkolo ŋa mȧtȧy ama sə po fɔfȧnɛ, ŋi aŋe; sə ba ufode ubana ɔwe po yirȧ ka kȧdiyɔ ka kawaŋ ka rȧbȧy ra ɔKuru ka ayiki ro riyana.

² Kɔnɔ yi uFode ka ɔdɛr ɔsəm, dɛ yi ka ȧŋseth ŋa akotha atəteŋ ŋa Kuru, aŋa ɔMarki ɔ bɛmpa, pə yi hɛ wuni kəpet.

³ kotȧy-e a thith ufode o fode ubana tə kəsɔŋ ɛboya dɛ yi sathka; tiyȧŋ ɔfode ubana ɔwe, thambe kɔnɔ sɔ ɔ ba ara ɔ gbəli sɔŋ.

⁴ Bepi ɔ yi ras nɔru-e, ɔ gbəli hɛ yi naŋ ufode bɛ-e, pəkasifɛ afode alɔm aŋ yi aŋa sɔŋ ɛboya kətȧŋȧnɛ ka ȧŋthɔ;

⁵ aŋa bȧtho kətȧŋȧnɛ ka mȧbȧlȧnɛ dɛ yi anthunthəranɛ ŋa ɔdɛr ɔsəm wa ro riyana, kotȧy-e ma Kuru ɔ tɔri Mosis ma ɔ yema bɛmpa ȧŋseth ŋa akotha-e, ɔ pa, Kəli kȧmȧ mə bɛmpa koko bɛ kətȧŋȧnɛ ka mȧbȧlȧnɛ ama i po tɔri mu ka kateŋ.

⁶ Kɛrɛ ka-ake kayɔna ȧke Krayst ɔ po sɔthɔ kia tha yi kəfinɔ, kotȧy-e ɔ yi ukasa ka aŋlemranɛ afisa-e, aŋa təmȧ rokɔm ka ɛlahiri ɛfisa.

⁷ kotȧy-e bepi aŋlemranɛ ȧtɔtɔkɔ aŋ ba hɛ kɛrɛ, aŋ ba hɛ mən naŋ tə kəthɛns alɔm.

⁸ Kɛrɛ ɔ thɛkɛ ŋa kotȧy-e ɔ pa, Kəla, marey mə tə der, ɔMarki ɔ pa, Ma i ti təmsər alemranɛ afu yi rȧkomra ra Isrɛl, Dɛ yi rȧkomra ra Yuda:

⁹ Pə yi hɛ mɔ aŋlemranɛ aŋa i təmsər yi aŋbemba ŋaŋ, Ka ȧŋrey ma i wop ŋa ka kȧta tə kəwura ŋa ka ȧŋthɔf ŋa Iyipt, Pəkasifɛ aŋ bȧkər hɛ ka aŋlemranɛ a mi, Tesom i bȧr ŋa kəmuth, yaŋ ɔMarki ɔ pa.

¹⁰ Kɛrɛ aŋlemranɛ ŋi aŋe aŋa mɛ re sek yi rȧkomra ra Isrɛl, Kədarəŋ ka marey mati, ɔMarki ɔ pa. I ti bot ɛthɔ ɛ mi ka ɛnanɛ yaŋ, I ti gbal yi ka ɛmerȧ yaŋ. Ɔwa i ti yi ɔKuru ka ŋaŋ, ɔwa ŋaŋ aŋ tə yi aŋfəm a mi.

¹¹ Aŋ ba hɛ sɔ kəthəksa wuni o wuni ɔfatanɛ kɔŋ, Dɛ yi wuni o wuni ɔwɔnt kɔŋ, tə kəpa, Tara ɔMarki; kotȧy-e ŋaŋ bɛ aŋ tə tȧrȧ mi, Kətəp ka ɔlɔl haŋ kəkɔ ka ɔbana.

¹² kotȧy-e i ti ba ȧney ka makənə maŋ, Ɔwa i ba hɛ sɔ kəkala ȧmerȧ ka ɛhakɛ yaŋ.

¹³ Ma ɔ pa, Alemranɛ afu, pə yi kəpa ɔ po səki antɔtɔkɔ akur. Ɔwa rəka o rəka ara mə bȧk dɛ yi ara mə kura rə won hɛ thas.