AŋHibru 7 - Ȧŋlemrȧnɛ Ȧfu

¹ kotȧy-e, ɔMɛlkisidɛk ɔwe, ɔwe yi mɔ-e ɔbȧy ka ro Salem dɛ yi ɔfode ka Kuru Məsaba-e, ɔ gbanɛ Ebraham ma ɔ wur kəwur ka kədifəth aŋbȧy, kɔ ruba kɔ,

² ka Ebraham ɔ sɔŋ kɔ ayaka ka mayɛt bɛ; (ma pə yi ka ɔtɔtɔkɔ ka katepa ka ȧŋes ŋɔŋ ɔ yi ɔbȧy ka mȧlompi, ɔwa ɔ yi sɔ ɔbȧy ka ro Salem, pə yi mɔ-e ɔbȧy ka mȧthɔfəl.

³ Ɔ ba hɛ ukas, ɔ ba hɛ ukara, ɔ ba hɛ abemba; ɔ ba hɛ ɔtəpɛr thalɔm ɔgbanthir; ta ȧŋsabu aŋe ɔ bȧlȧnɛ mɔ ɔWan ka Kuru) kɔ tiyȧ ufode ta thȧbana.

⁴ Kal nanɛ aŋfɔsɔ abana aŋa ɔwuni ɔwe ɔ ba, tə kəsɔthɔ ayaka ka ɛyɛt ɛluk ya Ebraham ɔbemba.

⁵ Tə tɛntɛnɛ aŋwuth ŋa Libay aŋa ba mapanth ma rafode, aŋ ba məmari tə kəgbasi ɛyaka kəwur ka aŋfəm kətȧŋȧnɛ ka ȧŋthɔ, pə yi mɔ-e, kəwur ka aŋwɔnt ŋaŋ hali aŋ yi ka rȧkomra ra Ebraham.

⁶ Kɛrɛ Mɛlkisidɛk ɔwe te yi ka rȧkomra ra ŋaŋ ɔ malanɛ ɛyaka ka Ebraham, ɔwa ɔ ruba kɔn ɔwe ba ɛlahiri.

⁷ Ɔwa wuni ɔ gbəli hɛ pɛnsa kəpa ɔbana ɔ tə ruba ɔlɔl.

⁸ Anɔ, afəm aŋa ba tə kəfi aŋ sɔthɔ ɛyaka; kɛrɛ ri-e, a seri kəpa kɔn ɔwe sɔthɔ yi ɔ yi ukəli.

⁹ Ɔwa pə bȧlȧnɛ mɔ-e, Libay sɔ, ɔwe sɔthɔ ɛyaka-e, ɔ sɔŋ ɛyaka kətaŋ ka Ebraham.

¹⁰ kotȧy-e ɔ yi ras rokor ka ɔkas kɔŋ ma Mɛlkisidɛk ɔ gbanɛ yi Ebraham.

¹¹ Tiyȧŋ bepi pə yi kəgbenthis kə la yi naŋ ka rafode ra Libay-e, ro pə yi aŋfəm aŋ sɔthɔ ȧŋthɔ, to pə som ufode ulɔm ɔ ba tə kəder ka kagbanth ka Mɛlkisidɛk beta ka kagbanth ka Erɔn-e?

¹² Pəkasifɛ ma rafode rə siŋkar-e, a ba sɔ kəsiŋkar ȧŋthɔ.

¹³ kotȧy-e a fɔf mȧtȧy ame salata wuni ɔwe yi rə ȧbɔnshɔ ȧlɔm. Ɔwa ka ȧŋbɔnshɔ ŋati hali wuni kin ɔ la hɛ yɔ mapanth ma ȧŋbɛsɛ.

¹⁴ Sə tȧrȧ kəpa ɔMarki kȧsu ɔ wur ka ȧŋbɔnshɔ ŋa Yuda, ɔwa ta ȧŋbɔnshɔ ŋati Mosis ɔ pa hɛ koko salata rafode.

¹⁵ Ɔwa pə tha thɔŋ sɔk su gbəraŋ bepi pə yi ti-e, ufode ulɔm ɔ yi tə kəder ka mȧbȧlȧnɛ ma Mɛlkisidɛk-e,

¹⁶ ɔwe sɔthɔ rafode rɔŋ, pə yi hɛ kətȧŋȧnɛ ka ȧŋsiraŋ ŋa ȧŋthɔ, kɛrɛ ka aŋfɔsɔ ŋa aŋesəm thəbana.

¹⁷ kotȧy-e a seri ta atɔŋ kəpa, Munɔ mə yi ufode ta thəbana, Kətaŋ ka kagbanth ka Mɛlkisidɛk.

¹⁸ Ka ȧŋgbȧp ŋin a nasi ȧŋthɔ ȧtɔtɔkɔ, pəkasifɛ aŋ yi ayay, ɔwa aŋ mar hɛ.

¹⁹ (kotȧy-e ȧŋthɔ aŋ səki hɛ koko rəgbenthis). Kɛrɛ ka ȧŋgbȧp alɔm a sɔŋ su kəgbak ȧmerȧ kəfisa, ɔwa kətȧŋȧnɛ kati sə gbəli fatər Kuru.

²⁰ Ɔwa a bȧksər rafode rəfu rati rə agbiŋ,

²¹ kotȧy-e ŋaŋ aŋa la yi afode thəpaŋ-e, aŋ gbasi matəma maŋ kəte ba agbiŋ, kɛrɛ ɔwe-e a bȧksər kɔ rə agbiŋ kəpa ye, ƆMariki ɔ poŋ gbiŋ, ɔwa ɔ siŋkar hɛ mabotəs mɔŋ, Munɔ mə yi ufode ta thȧnkȧŋ thəbana.

²² Te ba ti Yisɔs ɔ yi aŋseri ŋa alemranɛ afisa.

²³ Ɔwa tɛntɛnɛ aŋfode ȧtɔtɔkɔ aŋ yi agbȧthi, pəkasifɛ rəfi rə bɛnt ŋa tə kətia ka rafode.

²⁴ Kɛrɛ ɔwuni ɔwe-e, ɔ wop rafode rɔŋ thȧnkȧŋ thəbana, pəkasifɛ ɔ yi ta thȧnkȧŋ thəbana.

²⁵ Tiyȧŋ ɔ gbəli kisis ŋaŋ fewu aŋa der ka Kuru kətȧŋȧnɛ ro ŋɔŋ ma ɔ yi ukəli thȧnkȧŋ tə kənɛmthɛnɛ ta ȧtȧ ŋaŋ.

²⁶ kotȧy-e, ɔbeki su tə kəba ufode ubana mɔ ɔwe-e, ɔwe yi usəm-e, upaŋi yaŋfa-e, ugbəraŋ-e; ɔwe yi ugbaskɛ ka afəm ka ahakɛ, dɛ yi ɔwe a ŋata ɔbɔli rəkɔm pəthas kȧriyana.

²⁷ Ɔwe tǝ ba kəwura sathka ȧrey o rei mɔ afode alɔm, ka ɔtɔtɔkɔ ta ɛhakɛ yɔŋ, ɔwa rodarəŋ kati ta ɛhakɛ ya aŋfəm. Kotȧy-e ɔ po yɔ ti win, ma ɔ sɔndnɛ.

²⁸ Tə tɛntɛnɛ ȧŋthɔ aŋ tə thith wuni kəpet ka rayay rɔŋ tə kəyi ɔfode ubana-e, kɛrɛ ȧrim ra aŋgbiŋ, ara der rodarəŋ ka ȧŋthɔ rə thith ɔWan ɔwe yi ugbenthis thȧnkȧŋ thəbana.