AŋHibru 6 - Ȧŋlemrȧnɛ Ȧfu

¹ Tiyȧŋ maŋ kɔnɛ nu rodi haŋ sə po tɛŋa. Maŋ tey nu mathəksa mətɔtɔkɔ ma Kraystȧŋ; maŋ te nu kȧl bot ɔtəmər wa kȧlanɛ kȧsu ɔwe yi mɔ kəthupi kəwur ka məpanth məfi, dɛ yi kəlanɛ Kuru,

² yi ta mȧthəksa ma kəbaptais, yi ta kəreŋ məta, yi ta kȧyokanɛ ka aŋfi, dɛ yi ta kathoŋkas kələpsɔ.

³ Yao, ka kamar ka Kuru-e, maŋ kɔnɛ nu rodi.

⁴ kotȧy-e bepi sə fɔf ta ŋaŋ aŋa po sɔthɔ ȧŋmothȧ, aŋa po tham ɔbɔthi wa ȧŋboya ŋa ro riana-e, aŋa po sɔthɔ ani ka ɔYina məsəm,

⁵ dɛ yi aŋa po thȧm ɔfinɔ wa ȧrim ra Kuru, dɛ yi ɛfɔsɔ ya ȧdȧru ara ba kəder-e;

⁶ bepi afəm awunɔŋ aŋ kala kəmuth-e, aŋ gbəli hɛ sɔ sɔthɔ kəthupi, kotȧy-e pə yi mɔ aŋ kȧl tȧŋ ɔWan ka Kuru ka akənt kəpəŋkinɛ ɔfu, ɔwa aŋ kȧl sambos kɔ gbafəth.

⁷ kotȧy-e ȧŋthɔf aŋa po sɔthɔ atɔm katkat, bepi aŋ kom mȧkomi ama mə yi məfinɔ ta aŋbȧf-e, aŋ tə sɔthɔ aŋruba ŋa Kuru.

⁸ Kɛrɛ bepi aŋ kom təbaŋk yi təsenduku, aŋ wur hɛ ŋani, ɔwa a won hɛ raŋka ŋi; ɔwa a tə ləpsɔ thɔy ŋi.

⁹ Kɛrɛ, abɔthər, hali ma sə fɔf yaŋ-e, sə ba ananɛ afisa ta ȧtȧ nu, pə yi mɔ ananɛ ta mȧtȧy ama mə kɔ ka kakisi ka nu.

¹⁰ kotȧy-e, Kuru ɔ ba hɛ məkənə tə kəpənɛ mapanth ma nu ma mȧbɔthər ama nə poŋ tɔri salata ȧŋes ŋɔŋ, ma nə po mar aŋfəm ŋɔŋ, ɔwa nə kȧl mar ŋa sɔ haŋ ka-ake.

¹¹ Sə fela kȧmȧ ukin o kin ka nu ɔ bȧsər tɔri kayasyas kin kati kəkɔ ka ɔlasər wa kagbak ȧmerȧ haŋ ka ɔthalnɛ.

¹² Kama nə te yi ayay, kɛrɛ nə tansanɛ ŋaŋ aŋa sɔthɔ ɛlahiri asabu ŋa kȧlanɛ dɛ yi kamuyu ka ŋaŋ.

¹³ kotȧy-e, ma Kuru ɔ sɔŋ aŋlahiri ka Ebraham-e, ɔ gbiŋ ka aŋyɛthɛ ŋɔŋ, pəkasifɛ ulɔm ɔ yi hɛ ɔwe yi ubana uthasi kɔ,

¹⁴ kɔ pa, Tɛntɛnɛ i ti ruba mu yi aruba, ɔwa i ti bȧrȧ mu yi kəbar.

¹⁵ Ɔwa ma Ebraham ɔ po muyu haŋ-e, ɔ sɔthɔ tɛn aŋlahiri.

¹⁶ Afəm a kəpet aŋ tə gbiŋ ka ara thasi ŋa; ɔwa kəgbiŋ kəbaksər kə tə pons apa o pa.

¹⁷ Tiyȧŋ ma Kuru ɔ yema tɔri ŋaŋ aŋa ba kəsɔthɔ aŋlahiri ŋɔŋ to mȧselɔ mɔŋ mə gbəli hɛ siŋkar-e, ɔ bȧksər ŋi yi agbiŋ,

¹⁸ kȧmȧ ka mȧtay mȧrəŋ ama te gbəli siŋkar, ro pə yi ɔfɔy hɛ tȧy ta Kuru tə kəyema-e, saŋ aŋa po thɔŋ gbukɛ ka ɔdɛr ɔmaŋknɛ tə kəwop kagbak ȧmerȧ ȧke a bot rodi ka su-e, sə gbəli ba kəbȧkəs kəbuth kəfinɔ.

¹⁹ Ɔwa sə ba kagbak ȧmerȧ ake, ȧke yi mɔ rǝka rəpələnɛ rəbaki mədɛr, pə yi mɔ kagbak ȧmerȧ ka tȧteŋ ȧke gbəli wɔŋ ka ɔdɛr ɔsəm thɔŋ bɛ rodarəŋ ka ȧŋkunkla.

²⁰ Ro Yisɔs ɔ po thas mɔ ɔTəma kədi ta ȧtȧ su, ma ɔ səkɛ ufode ubana ka kagbanth ka Mɛlkisidɛk thȧnkȧŋ thəbana.