AŋHibru 5 - Ȧŋlemrȧnɛ Ȧfu

¹ kotȧy-e ufode o fode bɛ ɔwe a thith kətɔŋ ka aŋfəm-e, a bot kɔ tə kətəma ta aŋfəm ka mȧtȧy ma Kuru, kȧmȧ ɔ sɔŋ ɛboya dɛ yi kȧmȧ ɔ wurɔ ɛsathka ta ɛhakɛ.

² Ɔwa, ma kɔnɔ gbeŋ ɔ təlnɛ mȧrȧnt ma madɛr-e, ɔ gbəli sɔ muyu ante tȧrȧ tȧy dɛ yi aŋsɔkar.

³ Kɛrɛ ta ȧŋsabu aŋe gbeŋ ɔ ba tə kəwura asathka ta ɛhakɛ yɔŋ sɔ, hali mɔ mɔ yɔ ta ɛya aŋfəm.

⁴ Ɔwa wuni o wuni ɔ gbəli hɛ thithanɛ matəma ame, thambe Kuru ɔ thith kɔ mɔ po thith Erɔn.

⁵ Ɔwa ya pə yi sɔ-e, Kraystȧŋ kɔnɔ thithanɛ hɛ matəma ma kasəki ufode ubana; kɛrɛ ɔwe kanɛ kɔ, Munɔ mə yi ɔWan kȧmi, Thonɔŋ i po kom mu. Kɔnɔ thith kɔ.

⁶ Mɔ mɔ pa sɔ ka ɔdɛr ɔlɔm, Munɔ mə yi ufode ta thəbana mɔ Mɛlkisidɛk.

⁷ Ɔwa Yisɔsȧŋ, ȧke ɔ yi nɔru-e, ɔ sel ɛrɔŋ dɛ yi ɔ wur mantər ma mɔ ramnɛ kəramnɛ yi kənɛmthɛnɛ kəsɔbɛ, ka kɔn ɔwe ba afɔsɔ tə kəkisis kɔ ka rəfi. Ɔwa a təl taramnɛ tɔŋ asabu ŋa ranes ara ɔ ba ka Kuru Məsaba.

⁸ Kɛrɛ hali mɔ yi ɔWan-e, ɔ thəksa kəsanɛ kətȧŋȧnɛ ka mȧtȧy ama ɔ po nakasi;

⁹ ɔwa ma a po gbenthis kɔ-e, ɔ səkɛ ɔTəpi ka ŋaŋ bɛ aŋa mə sanɛ do rɔŋɔŋ.

¹⁰ Kotȧy-e Kuru gbeŋ ɔ tela kɔ ufode ubana kətȧŋȧnɛ ka rafode ra Mɛlkisidɛk.

¹¹ Sə ba tȧy təgbȧthi tə kəpa ta sala tɔŋ, kɛrɛ mȧtȧy mati mə yi mətuy lokthɛ nu-e, ma pə yi ti-e, nə ba ɛmerȧ ɛgbolŋanɛ.

¹² Kotȧy-e thambe wuni ɔ kȧl thəksa nu ɛkolo ɛtɔtɔkɔ ya ȧrim ra Kuru-e, kədarəŋ ka ka ȧŋlɔkɔ awoni aŋe nə yi naŋ tə kəyi akarmɔkɔ. Nə səkɛ mɔ ŋaŋ aŋa yema manɔnɔ beta ȧdarədi rəbaki mɔ ɔsɛm.

¹³ Kotȧy-e kɔnɔ ɔwe yema gbo mənɔnɔ-e, ɔ ba hɛ kətara ka ȧrim ra məlompi, pəkasifɛ ɔ yi ras kəlɛnth.

¹⁴ Kɛrɛ ara rədi rəbaki rə yi ta ŋaŋ aŋa po tɛŋa, hali ŋaŋ aŋa tȧrȧ rə ȧmerȧ tə kəgbaski təlompi yi tələs.