AŋHibru 4 - Ȧŋlemrȧnɛ Ȧfu

¹ Tiyȧŋ, ma sə ba ras aŋlahiri ŋa kəwɔŋ ka ɔfothanɛ wɔŋ-e, maŋ nesa nu ta thani ukin ka nu ɔ thȧpi kəsɔthɔ ri.

² Ȧtesoma-e a tɔri su sɔ ȧkɛra kəfinɔ ka Kuru mɔlɔ min mɔ ŋaŋ; kɛrɛ ȧkɛra ȧke aŋ po təl kə mar hɛ ŋa, pəkasifɛ aŋ lanɛ hɛ maŋ təl ki.

³ kotȧy-e saŋ aŋa po lanɛ sə wɔŋ ka ɔfothanɛ wati, mɔ mɔ pa, I gbiŋ ka rȧbaŋ da mi, kəpa, Aŋ gbəli hɛ wɔŋ ka ɔfothanɛ ɔ mi; hali ma Kuru ɔ pons thɔŋ mȧpanth mati kȧbi ka ɔtəpɛr wa ȧdȧru.

⁴ kotȧy-e ka ɔdɛr ɔlɔm ɔ fɔf ta ȧŋrey aŋa bekȧ tȧmthədɛrəŋ, ɔ pa yaŋ, Ɔwa Kuru ɔ fothanɛ ka mapanth mɔŋ bɛ ka ȧŋrey aŋa bekȧ tȧmthədɛrəŋ.

⁵ Ɔwa ɔ pa sɔ, Aŋ gbəli hɛ wɔŋ ka ɔfothanɛ ɔ mi.

⁶ Ma sə nənk kəpa alɔm aŋ tə wɔŋ ri-e, kɛrɛ ŋaŋ aŋa mɔtha təl ȧkɛra kəfinɔ aŋ wɔŋ hɛ ri salata kate ka ŋaŋ lanɛ-e,

⁷ kədarəŋ kati Kuru ɔ kȧl sɔ bont ȧrey alɔm, ma ɔ pa kətȧŋȧnɛ ka Debid, (mɔ mɔ poŋ thɔŋ pa ti thəpaŋ), Thonɔŋ, bepi nə təl ȧrim rɔŋ-e, Te gbolŋas ɛmerȧ ɛ nu.

⁸ kotȧy-e bepi Yɔsua ɔ po sɔŋ ŋa kəfothanɛ tɛntɛnɛ-e, sə ba hɛ sɔ kətəl Kuru ɔ fɔf ta ȧrey alɔm.

⁹ Tiyȧŋ kəfothanɛ kə yi ta aŋfəm ŋa Kuru.

¹⁰ kotȧy-e ɔwe poŋ thɔŋ wɔŋ ka ɔfothanɛ wa Kuru-e, ɔ po fothanɛ ka mapanth mɔŋ, mɔ mə Kuru ɔ po fothanɛ ka amɔŋ.

¹¹ Tiyȧŋ maŋ bȧsər nu kəwɔŋ ka ɔfothanɛ wati, kȧmȧ wuni o wuni ɔ te fumpɔ salata kate sanɛ kin kati.

¹² kotȧy-e ȧrim ra Kuru rə yi rəkəli dɛ yi rəyasyas, rəwɔŋi sɔ pəthasi agbathɔ ŋa ran narəŋ, ɔwa rə gbəli gbai kətɔŋ ka ȧŋmerȧ yi aŋyina, dɛ yi ɔkɔtir yi mȧfith, ɔwa rə gbəli tȧrȧ ɛnanɛ yi mafela ma ȧŋmerȧ.

¹³ Ɔwa rəka o rəka rəbɛmpa rə yi hɛ ara ɔ te nəŋka rəfɔr; kɛrɛ koko rə yi rətiŋ dɛ yi rəgbafəth ka kakəli ka ɔwe sə ba tə kəgbakia.

¹⁴ Ɔwa, ma sə ba ufode ubana ɔwe po gbəkinɛ ȧŋriyana gbeŋ, pə yi mɔ Yisɔsȧŋ, ɔWan ka Kuru-e, maŋ wop nu maseri ma su gbaŋ,

¹⁵ pəkasifɛ sə ba hɛ ufode ubana ɔwe te gbəli təlnɛ mȧrȧnt ma su; kɛrɛ a la mɛmər kɔ yi ɛgbɔns rə roŋ o roŋ mɔlɔ min mɔ saŋ, kɛrɛ ɔ tha yɔ hɛ ahakɛ bɛ.

¹⁶ Tiyȧŋ maŋ der nu yi təbuth təbaki ka kawaŋ ka rȧbȧy ra ȧŋboŋa-e, kȧmȧ sə gbəli sɔthɔ ȧney, dɛ yi kəmar ka ȧŋlɔkɔ ŋa kapaŋ kȧsu.