AŋHibru 2 - Ȧŋlemrȧnɛ Ȧfu

¹ Tȧsom sə yi tə kəbot ɛmerȧ ɛ su ɔbaksər ka tapa ȧtȧ sə po təl ta thani tə kathɛ su.

² kotȧy-e bepi a bȧksər ȧkɛra ȧke aŋmȧleka aŋ tɔri kȧmȧ pə re yi wuni o wuni ɔwe mə ləsər ki thalɔm ɔ pɛnsa ki ɔ sɔthɔ ȧŋrȧm alompi ŋati-e,

³ to saŋ mə sə gbəli kisi bepi sə say kakisi kəbana mɔ ake-e? kotȧy-e ɔMarki kɔnɔ mɔtha tɔri ki ɔwa ŋaŋ aŋa po təlȧ kɔ aŋ bȧksər ki do rɔsu.

⁴ Ɔwa Kuru sɔ ɔ seri ti rə ɛmisali, yi rə mȧtȧy məkabanɛ tətəp, dɛ yi rə ɛboya ya ɔYina məsəm ɛyɛ ɔ sɔŋ kətȧŋȧnɛ ka mȧselɔ mɔŋ.

⁵ kotȧy-e Kuru ɔ sɔŋ hɛ amaleka kagbəka rokɔm ka ȧdȧru ara ba tə kəder, ta ȧtȧ mə sə fɔf.

⁶ Kɛrɛ wuni ɔ pa ka ɔdɛr ɔlɔm, To wuni kəpet ɔ yi ma mə nanɛ kɔ-e? Thalɔm ɔwan ka wuni ma mə raŋko kɔ-e?

⁷ Munɔ mə po bɛmpa kɔ-e roratha ka aŋmȧleka ta alɔkɔ agbut, Mə po pɔlɔ kɔ yi ayiki dɛ yi alambe, Ɔwa mə təmər kɔ rokɔm ka mapanth ma mȧta ma mu bɛ.

⁸ Ɔwa mə po bot koko bɛ ka ȧtȧtək tɔŋ roratha. Ma ɔ bot koko roratha kɔŋ-e, pə yi mɔ ɔ tey hɛ koko ara te ba kəsanɛ do rɔŋɔŋ. Kɛrɛ ka-ake sə tha nənk hɛ mȧtȧy bɛ mə sanɛ do rɔŋɔŋ.

⁹ Kɛrɛ sə nənk kɔn ɔwe a bɛmpa roratha ka aŋmȧleka ta alɔkɔ agbut, hali Yisɔs, ɔwa a pɔlɔ kɔ ka-ake rə ayiki abana asabu ŋa anakasi ŋa rəfi, kȧmȧ pə re yi ka ȧŋboŋa ŋa Kuru-e, ɔ gbəli tham rəfi ta wuni o wuni.

¹⁰ Ɔwa kɔnɔ ta ɔwe ɛyɛt bɛ ɛ yi, dɛ ɔwe mə bȧksər mȧtȧy bɛ-e, ma ɔ kȧrȧ awuth agbȧthi ka ayiki-e, pə yi ɔlompi kama-e ɔ gbenthis ɔTəpi wa kakisi ka ŋaŋ kətȧŋȧnɛ ka kənakasi.

¹¹ kotȧy-e ɔwe səməs yi ŋaŋ aŋa ɔ səməs-e, aŋ ba ɔKas kin; tiyȧŋ ɔ lap hɛ tə kəbont ŋa awɔnt,

¹² kɔ pa, Mine i ti taməs ȧŋes a mu kətɔŋ ka aŋwɔnt a mi, I ti thɔkəs mu kətɔŋ ka aŋfəm ŋa Kuru.

¹³ Ɔwa, I ti bot aŋlanɛ a mi ro rɔŋɔŋ. Ɔwa sɔ-e, Kəli minɛŋ dɛ yi aŋwuth aŋa Kuru ɔ po sɔŋ mi.

¹⁴ Tiyȧŋ ma aŋwuth aŋ ba madɛr yi mȧtir ma rawuni kəpet-e, kɔn kɔnɔnɛ sɔ ɔ gbasi mayi mati kȧmȧ kətȧŋȧnɛ ka rȧfi ɔ gbəli ləsər kɔn ɔwe ba aŋfɔsɔ ŋa rəfi, kɔnɔ yi mɔ Sethani.

¹⁵ Ɔwa sɔ-e, kȧmȧ ɔ bani ŋaŋ aŋa yi atar ka marey maŋ bɛ asabu ŋa ranes ra rəfi.

¹⁶ Tə tɛntɛnɛ Yisɔs ɔ de hɛ kȧmȧ ɔ sɔŋ kəmar ka amaleka, kɛrɛ ka aŋwuth ŋa Ebraham.

¹⁷ Tiyȧŋ pə yi ɔlompi kȧmȧ a yɔ kɔ mɔ aŋwɔnt ŋɔŋ rə koko bɛ, kȧmȧ ɔ gbəli yi ufode ɔwe ba ȧney, ubɔthi lanɛ ka mȧtȧy ma Kuru, kȧmȧ ɔ gbəli nɛmthɛnɛ ta ɛhakɛ ya aŋfəm.

¹⁸ kotȧy-e ma kɔn kɔnɔnɛ ɔ po nakasi rə ɛgbɔnsanɛ, ɔ gbəli sɔ mar ŋaŋ aŋa mə a gbɔns ka-ake.