AŋHibru 11 - Ȧŋlemrȧnɛ Ȧfu

¹ Tiyȧŋ kȧlanɛ kə yi kapələnɛ ka mȧtȧy ta ama mə sə gbakər ȧmerȧ, ɔwa kə yi sɔ maseri ma mȧtȧy ama mə sə te tha nəŋka rəfɔr.

² Kətaŋanɛ kati aŋbȧki thəpaŋ aŋ sɔthɔ mes məfinɔ.

³ Asabu ŋa kȧlanɛ sə tȧrȧ kəpa a bɛmpa ȧdȧru ka ȧrim ra Kuru, te ba ti sə tȧrȧ kəpa ɛyɛt ɛyɛ sə nəŋka rəfɔr-e, a bɛmpa yi kəwur ka ɛyɛt ɛyɛ sə te gbəli nənk.

⁴ Rə kəlanɛ-e, Ebɛl ɔ sɔŋ Kuru sathka təbeki təthasi Ken, ɔwa di kati a seri ta atɔŋ kəpa ɔ yi ulompi; ka Kuru ɔ sɔŋ maseri mati sɔ ma a malanɛ ɛboya yɔŋ, kɔ fi kɛrɛ salata kȧlanɛ kɔŋ-e, ɔ fɔf ras.

⁵ Rə kəlanɛ a sɛmpi Inɔk ka ȧdȧru kȧmȧ ɔ te nənk rəfi; ɔwa a nənk hɛ kɔ sɔ pəkasifɛ Kuru kɔnɔ poŋ gbasi kɔ; ɔwa yeŋka ɔ gbasi kɔ-e, ɔ ba maseri kəpa ɔ bɔnɛs Kuru finɔ.

⁶ Kɛrɛ rə kəte ba kəlanɛ sə gbəli hɛ bɔnɛs Kuru, kotȧy-e ɔwuni ɔwe fatər Kuru-e, thambe ɔ lanɛ kəpa Kuru ɔ yi-e, ɔwa sɔ-e, ɔ tə kȧl rȧm ŋaŋ aŋa thɛns kɔ tə tɛntɛnɛ.

⁷ Rə kəlanɛ Now, ma Kuru ɔ maŋ kɔ salata mȧtȧy ama ɔ te tha nəŋk-e, ɔ su ɛləns, kɔ bɛmpa abil tə kəkisis rȧkomra rɔŋ; ɔwa di kati ɔ sɔŋ ȧdȧru mətheri, kɔ sɔthɔ mȧlompi ama yi ka kəlanɛ.

⁸ Rə kəlanɛ Ebraham ma a tela kɔ tə kəwur ka aŋfəm ŋɔŋ kȧmȧ ɔ kɔnɛ ka ȧŋthɔf aŋa ɔ yi tə kəsɔthɔ mɔ kɛŋ-e, ɔ kɔnɛ, hali ma ɔ te tȧrȧ ro mɔ kɔ-e.

⁹ Rə kəlanɛ ɔ yirȧ ka ȧŋthɔf ŋa aŋlahiri mɔ ka athɔf ȧtel, kɔ yirȧ ka ɛseth ya atotha yi Aysak dɛ yi Yekɔb, aŋwuth ŋɔŋ aŋa ba tȧy tin dɛ yi kɔn ka aŋlahiri.

¹⁰ kotȧy-e ɔ kəlianɛ ta kȧpet ȧke ba mətəmər məbaksər, ȧke pə yi Kuru kɔnɔ yi ɔtəpi dɛ yi ɔbɛmpa.

¹¹ Rə kəlanɛ Sara kɔn kɔnɔnɛ ɔ sɔthɔ afɔsɔ tə kəkom hali ma ɔ po thas ȧŋlɔkɔ ŋati-e, pəkasifɛ ɔ lanɛ kəpa kɔn ɔwe sɔŋ kɔ aŋlahiri ɔ yi ubɔthi lanɛ.

¹² Tiyȧŋ, ka wuni kin ɔwe bȧlȧnɛ mɔ wuni fi-e, a kom awuth agbȧthi mɔlɔ ma atɔs ta kȧriyana, dɛ yi mɔlɔ ma kasənt ȧke yi ro baŋ rayɛr ȧke wuni ɔ te gbəli lɔm.

¹³ Aŋe bɛ-e aŋ fi ka kəlanɛ, aŋ sɔthɔ hɛ ɛlahiri, kɛrɛ aŋ nənk yi gbo abɔli poŋ, ɔwa aŋ malanɛ yi kaŋ seri kəpa aŋ yi atik dɛ yi afəm ŋa ɛbiyas ka ȧdȧru are.

¹⁴ kotȧy-e afəm aŋa mə pa sim təwunɔŋ aŋ tɔri gbəraŋ kəpa aŋ thɛns ȧŋthɔf ŋaŋ gbeŋ.

¹⁵ Ɔwa tɛntɛnɛ bepi aŋ kala ȧmerȧ ka ȧŋthɔf ro aŋ wur-e, aŋ tə ba naŋ aŋfɛrɛ tə kəkalanɛ ri.

¹⁶ Kɛrɛ ka-ake aŋ fela athɔf afisa aŋa yi mɔ ro riyana; tiyȧŋ Kuru ɔ lap hɛ maŋ tela kɔ ɔKuru ka ŋaŋ, pəkasifɛ ɔ po bɛnɛnɛ kəpet ta ȧtȧ ŋaŋ.

¹⁷ Rə kəlanɛ Ebraham ma a mɛmər kɔ-e, ɔ wurɔ Aysak sathka; yao kɔn ɔwe po sɔthɔ ɛlahiri ɔ selɔ tə kəsɔnd ɔwan kɔŋ ukin,

¹⁸ ta ɔwe a po pa, Ka Aysak takomra ta mu tə tə wur;

¹⁹ kɔ nanɛ kəpa Kuru ɔ gbəli yokas wuni hali ka rȧfi; ɔwa pə bȧlȧnɛ mɔ ɔ kȧl sɔthɔ Aysak yathi kəwur ka rȧfi rati.

²⁰ Rə kəlanɛ Aysak ɔ ruba Yekɔb-əŋ yi Isɔ ta salata mȧtȧy ama ba tə kəder.

²¹ Rə kəlanɛ Yekɔb-əŋ, ma ɔ yema fi-e, ɔ ruba aŋwuth ŋarəŋ ŋa Yosɛf; ɔwa ɔ sanɛ ka kȧtək kɔŋ rə kəbatho Kuru.

²² Rə kəlanɛ, Yosɛf ma ɔ yema fi-e, ɔ tɔri aŋwuth ŋa Isrɛl to maŋ ba kəwur ro Iyipt, kɔ yamari ŋa sɔ ta tabanth tɔŋ.

²³ Rə kəlanɛ aŋkomra ŋa Mosis aŋ maŋk kɔ yof ɛsas, pəkasifɛ aŋ nənk kəpa ɔ yi wath ubɔthi kəli uthasər; aŋ nesa hɛ aŋyamari ŋa ɔbȧy.

²⁴ Rə kəlanɛ Mosisȧŋ, ma ɔ po tɛŋa-e, ɔ selɔ hɛ a tela kɔ ɔwan ka ɔwan bɛra ka Fero;

²⁵ kɛrɛ ɔ thith tə kəsɔmpanɛ dɛ aŋfəm ŋa Kuru pəthas tə kəba mabɔnɛ məgbut ma ɛhakɛ.

²⁶ Ɔ nanɛ kəpa kənakasi salata Krayst kə yi rəyola pəthasi atɛŋ bɛ ta ro Iyipt, ȧtesoma-e ɔ kəlianɛ ta ȧŋrȧm aŋa yi ro kəri.

²⁷ Rə kəlanɛ ɔ wur ro Iyipt, ɔ nesa hɛ rabaŋ ra ɔbȧy, kotȧy-e ɔ muyu mɔ nənk ro ȧmerȧ ɔwe sə te nəŋka rəfɔr.

²⁸ Rə kəlanɛ ɔ wop amet ma kapainɛ dɛ yi kawɔnsir mȧtir, kȧmȧ ɔwe po ləsər aŋwuth ȧtɔtɔkɔ ɔ te gboŋ sɔ aŋIsrɛl.

²⁹ Rə kəlanɛ aŋ fəsi kȧbȧŋ kəyim mɔ roŋ dəwosi, kɛrɛ ma aŋfəm ŋa ro Iyipt aŋ mɛm tə kəyɔ ti sɔ-e, aŋ dinɛ ro baŋ.

³⁰ Rə kəlanɛ ɛthatha ya ro Yɛriko ɛ fumpɔ bəm ma a gbətɔsnɛ yi mərey tȧmthədɛrəŋ.

³¹ Rə kəlanɛ Rehab, ɔbɛra urəpi ɔ fi hɛ kətɔŋ ka ante lanɛ pəkasifɛ ɔ malanɛ aŋtombəla yi məthɔfəl.

³² Ɔwa to mɛ gbəli sɔ pa-e? kotȧy-e alɔkɔ aŋ tə pond mi tə kətɔri ta Kidiyɔnȧŋ, yi Barakȧŋ, yi Samsin-əŋ, yi Yɛfthaŋ; ta Debid sɔ yi Samuɛlȧŋ, dɛ yi Aŋnȧbi;

³³ rə kəlanɛ aŋfəm aŋe aŋ tham təbȧy, aŋ yɔ məlompi, aŋ sɔthɔ ɛlahiri, aŋ kantha tasəŋ ta təsoyila,

³⁴ aŋ dimsi ɔbaŋ wa nȧnt, aŋ fisə kəwur ka rəfi ra agbathɔ, aŋ səkɛ abȧki mədɛr kəwur ka rəyai, aŋ yi abȧki təbuth tə kətim, aŋ bȧl asəfȧ ta aŋfəm ȧthȧnthonɛ.

³⁵ Afəm abom aŋ sɔthɔ aŋfi a ŋaŋ aŋ kȧl yokanɛ ka kȧboma; alɔm-e, a gbaŋar ŋa rə anakasi athasər, aŋ malanɛ hɛ kakisi ȧke a taka ŋaŋ, kaŋka gbo aŋ gbəli sɔthɔ ŋesəm afisa ka kakal yokanɛ ka aŋfi.

³⁶ Ɔwa a mɛmər alɔm rə məsel mələs, ka a sap ŋa yi rəkɛt, yao a tand ŋa rə tɔrɛntha ka ȧŋseth ȧtərənkȧ;

³⁷ a ləməs ŋa yi məsar, a sera ŋa ratɔŋ, a gbɔns ŋa, a difȧ ŋa yi ɛgbathɔ, aŋ thasəsnɛ gbo ka ȧŋthɔf ka ɛreka ya təlɔmɛ yi atir. Aŋ tiyȧ rə amɔnɛ, ka a bȧr sɔmpar ŋa tə kəyɔ ŋa ɔbaŋ.

³⁸ Ta aŋfəm aŋe ȧdȧru rə yi hɛ rəbeki. Aŋ lunɛ lunɛ ro wula yi təteŋ; aŋ maŋknɛ ka təyaŋka yi ka təbi ro thɔf.

³⁹ Kɛrɛ aŋfəm aŋe bɛ hali maŋ po sɔthɔ mes məfinɔ asabu ŋa kəlanɛ-e, aŋ nənk hɛ ɔlasər wa aŋlahiri gbeŋ.

⁴⁰ Pəkasifɛ Kuru ɔ po nanɛ tȧy təfisa ta ȧtȧ su-e, kȧmȧ pə te yi naŋ a səki ŋa agbenthis kətei su rodarəŋ.