AŋHibru 10 - Ȧŋlemrȧnɛ Ȧfu

¹ Te ba ti kȧbi ȧŋthɔ aŋ ba gbo ȧŋmumpəl ŋa mȧtȧy məfinɔ ama ba kəder-e, beta aŋ ba mȧtȧy mati məgbenthis-e, aŋ gbəli hɛ yɔ kȧmȧ thȧnkȧŋ asathka ȧtȧ a sɔŋ kəren o kəren tə gbenthis ŋaŋ aŋa fatər.

² Bepi pə yi hɛ ti-e, a gbəli hɛ naŋ tey kəwura ti-i? Pəkasifɛ bepi a po thɔŋ fethər ŋaŋ aŋa fatər win-e, ɛnanɛ yaŋ ɛ ba hɛ sɔ kəkara ŋa mȧtəlnɛ ma ɛhakɛ.

³ Kɛrɛ asabu ŋa asathka tati aŋ kala ȧmerȧ ta ɛhakɛ kəren o kəren.

⁴ Pəkasifɛ mȧtir ma ɛthura dɛ yi atir mə ba hɛ afɔsɔ tə kənɔi ɛhakɛ hali.

⁵ Tiyȧŋ ma ɔ der ka ȧdȧru, ɔ pa, Sathka dɛ yi aboya mə fela hɛ, Kɛrɛ mə bɛnɛnɛ adɛr ta ȧtȧ mi.

⁶ Mə ba hɛ məbɔnɛ salata sathka təthɔy thalɔm sathka ta ɛhakɛ

⁷ Ka ȧŋlɔkɔ ŋati i pa, Kəla i po der Tə kəyɔ mȧselɔ ma mu ɔKuru, Mɔ mə a po gbal ta salata minɛŋ ka ȧkȧfȧ kəsəm.

⁸ Ma ɔ pa, Mə fela hɛ, ɔwa mə ba hɛ məbɔnɛ ka sathka yi ɛboya, yi sathka təthɔy, dɛ yi sathka ta ɛhakɛ ȧtȧ a sɔŋ kətȧŋȧnɛ ka anthɔ-e;

⁹ ɔ pa sɔ, I der tə kəyɔ mȧselɔ ma mu ɔKuru. Ɔ nɔy antɔtɔkɔ kȧmȧ ɔ gbəli təmsər ȧŋbekȧ yɛrəŋ.

¹⁰ Ɔwa kətȧŋȧnɛ ka mȧselɔ mati a po səməs su asabu ŋa kasɔndnɛ ka ȧŋdɛr ŋa Yisɔs Krayst win haŋ thəbana.

¹¹ Ufode o fode ɔ təmȧ tə kəyɔna ȧrey o rey, rə kəsɔŋ katkat sathka tin ȧtȧ te gbəli nɔy ɛhakɛ ɛ su thȧnkȧŋ.

¹² Kɛrɛ ɔfode ɔwe-e, ma ɔ po sɔŋ sathka ta ɛhakɛ win haŋ thəbana, ɔ yirȧ ka kȧta kədiɔ ka Kuru.

¹³ Ɔ kar haŋ a bot atheranɛ ŋɔŋ ka ȧtȧtək tɔŋ ratha,

¹⁴ kotȧy-e asabu ŋa sathka tin ɔ poŋ gbenthis ŋaŋ aŋa yi asəməs-e thȧnkȧŋ thəbana.

¹⁵ Sə ba sɔ maseri ma ɔYina ma ɔ po pa,

¹⁶ Aŋlemranɛ ŋi aŋe aŋa minɛ mɛ sek dɛ yi ŋaŋ Rodarəŋ ka marey mati, ɔMarki ɔ pa, I ti bot ɛthɔ ɛ mi ka ɛmerȧ yaŋ, Ɔwa i ti gbal yi ka ɛnanɛ yaŋ,

¹⁷ Ɔ pa sɔ, I gbəli hɛ sɔ kala ȧmerȧ ka ɛhakɛ yi makənȧ maŋ.

¹⁸ Tiyȧŋ ro kȧterɔ ka ɛhakɛ mɔ ake kə yi-e, kəwurɔ sathka təlɔm kə yi hɛ sɔ.

¹⁹ Te ba ti awɔnt, ma sə ba təbuth təbaki tə kəwɔŋ ka ɔdɛr ɔsəm thɔ bɛ asabu ŋa mȧtir ma Yisɔs-e,

²⁰ ka aroŋ dəfu dɛ yi rəkəli ara ɔ po kanthɛ su, tə kəthas ka ȧŋkunkla, pə yi mɔ-e, kətaŋ ka ȧŋdɛr ŋɔŋ;

²¹ ɔwa ma sə ba sɔ uFode ubana rokɔm ka ȧŋseth ŋa Kurɔŋ,

²² maŋ fatər kɔ nu gbɛpti yi ȧmerȧ atəteŋ ka ɔlasər wa kȧlanɛ-e, rə kəba ɛmerȧ ɛ su ɛyak kəwur ka ɛnanɛ ɛləs, dɛ yi madɛr ma su məfethər rɛ mȧnt məgbəraŋ.

²³ Maŋ wop nu gbaŋ kȧlanɛ kȧsu kȧmȧ kə te yiŋkthanɛ; kotȧy-e kɔn ɔwe sɔŋ su aŋlahiri ɔ yi ubɔthi lanɛ.

²⁴ Maŋ gbonkthasnɛ nu ukin dɛ yi ulɔm kəkɔ ka mȧbɔthər yi mȧyɔs məfinɔ.

²⁵ Ɔwa maŋ te nu pənɛ tə kəgbanɛ rɔkin, mɔ mə afəm alɔm mə aŋ pənɛ; kɛrɛ maŋ bȧksəranɛ nu təbuth, pə tha gbethi ma nə nənk kəpa ȧŋrey ŋa Krayst aŋ po fat.

²⁶ kotȧy-e bepi sə yɔ ɛhakɛ kəsias kədarəŋ ka ma sə po sɔthɔ kȧtȧrȧ ka tateŋ-e, sathka təlɔm tə yi hɛ ta ɛhakɛ,

²⁷ koko rə tiyȧ hɛ sɔ thambe kəkəlianɛ rə rənes ta kathoŋkas, dɛ yi rəbaŋ mɔ nȧnt ara yi tə kələsər antheranɛ ŋa tȧteŋ.

²⁸ Wuni o wuni ɔwe farki ȧŋthɔ ŋa Mosis a dif kɔ kəte ba ȧney ka maseri ma afəm ŋarəŋ thalɔm asas.

²⁹ Kɛrɛ kɔn ɔwe mə nas nas ɔWan ka Kuru-e, dɛ yi ɔwe nənk ɔyai mȧtir ma aŋlemranɛ aŋa po səməs kɔ-e, ɔwa ɔwe say sɔ ɔYina ka aboŋa-e, nə nanɛ hɛ kəpa kɔnɔ yi ubeki tə kəsɔthɔ athalər athasər-i?

³⁰ kotȧy-e sə tȧrȧ kɔn ɔwe po pa, Minɛ ba kəkalɔ, minɛ i ti ram. Ɔwa sɔ-e, ƆMariki ɔ tə thonkas aŋfəm ŋɔŋ.

³¹ Tȧy təninis tȧŋ tə kəfumpɔ ka mȧta ma ɔKuru ukəli.

³² Kɛrɛ kala ȧmerȧ ka marey ma thəpaŋ. Rodarəŋ ka ma nə po sɔthɔ ȧŋmothȧ-e, nə po muyu kətim kəbaki mədɛr, rɛ ɛsɔmpanɛ.

³³ Ka ȧŋgbȧp ŋin-e, a sambos nu ka ɔgbaif rə tənal dɛ yi ɛsɔmpanɛ; ka ȧŋgbȧp alɔm nə yi ayeranɛ dɛ yi ŋaŋ aŋa ba ɛsɔmpanɛ ɛwunɔŋ.

³⁴ Ȧtesoma-e nə ba ȧney ka atɛndɛbira, ɔwa nə kȧl selɔ rə məbɔnɛ ma a luk ɛyɛt ɛ nu, kȧbi nə tȧrȧ kəpa nə ba kɛŋ kəfisa ȧke ba kətia thȧnkȧŋ.

³⁵ Te ba ti te nu gbapɛ kapələnɛ ka nu ȧke mə ba ȧrȧm abana.

³⁶ kotȧy-e nə ba tə kəmuyu, kȧmȧ ma nə po yɔ mȧselɔ ma Kuru-e, nə tə sɔthɔ aŋlahiri:

³⁷ Pəkasifɛ pə tiyȧ gbo ɔthan kȧmȧ ɔwe yi tə kəder ɔ tə der. Ɔ kali kali hɛ sɔ.

³⁸ Kɛrɛ ȧŋbɔy a mi ulompi ɔ tə ba aŋesəm kətaŋ ka kəlanɛ, Ɔwa bepi ɔ kȧl mədarəŋ-e, ȧŋmerȧ a mi aŋ ba hɛ sɔ məbɔnɛ ro ŋɔŋ.

³⁹ Kɛrɛ saŋ sə yi hɛ mɔ ŋaŋ aŋa kȧl mədarəŋ, sə yi mɔ ŋaŋ aŋa lanɛ haŋ kəkɔ ka kakisi ka ɛŋesəm yaŋ.