AŋFilipai 2 - Ȧŋlemrȧnɛ Ȧfu

¹ Ɔwa bepi kəbɛfəth kə yi ka Kraist-e, bepi aŋfɔsɔ ŋa mȧbɔthər ŋȧ yi-e, bepi mamanɛ ma ɔYina-e, bepi məthɔfəl dɛ yi ȧney ɛ yi-e,

² lasər nu mabɔnɛ ma mi rə kəba ȧmerȧ ŋin yi məbɔthər min dɛ yi rim din.

³ Te yɔ koko rə kəkolonɛ, kɛrɛ rə ȧmerȧ athoranɛ, yɔ nu kȧmȧ ukin ɔ nanɛ ulɔm tə kəyi ufisa pəthas kɔn kɔnɔnɛ.

⁴ Ta wuni o wuni ɔ te gbo raŋkonɛ, kɛrɛ ta ɔ raŋko sɔ aŋkos ŋɔŋ.

⁵ Ta ȧŋmerȧ ŋa Krayst aŋ yi do rɔnu sɔ;

⁶ ɔwɔ-e, hali ma ɔ ba ka ɔtəpɛr mayi ma Kuru gbeŋ-e, ɔ wop hɛ rȧwuni ra Kuru rɔŋ ɔbaksər thebeŋ mɔ rəka rəbaki mɔlɔ.

⁷ Kɛrɛ ɔ kus aŋyiki, kɔ gbasi mayi ma ȧbɔy, ka a səki kɔ wuni kəpet;

⁸ ɔwa ma ɔ po wɔŋ ka mayi ma wuni kəpet-e, ɔ thoranɛ haŋ kəkɔ ka rȧfi, yao, hali rafi ra akənt kəpəŋkinɛ.

⁹ Te ba ti Kuru ɔ kȧl ŋata kɔ ɔbɔli rəkɔm, kɔ sɔŋ kɔ ŋes aŋa yi rokɔm ka ŋes o ŋes;

¹⁰ kȧmȧ pə yi ka ȧŋes ŋa Yisɔs-e, wuni o wuni ɔ tə sɔ tawu, ro riana-o, nɔru-o, dɛ yi ka ȧdȧru ratha;

¹¹ kȧmȧ kəsəŋ o kəsəŋ kə seri kəpa Yisɔs Krayst ɔ yi ɔMarki ka aŋyiki ŋa Kuru ɔKas.

¹² Tiyȧŋ, ambɔthər a mi, mɔ mȧ nə poŋ thɔŋ sanɛ ȧrim lɔkɔ o lɔkɔ, pə yi hɛ gbo ma i yi kətɔŋ ka nu, kɛrɛ pə tha gbethi ka kate kȧmi bəpər, bȧsər kȧmȧ nə yɔ kakisi ka nu kə yi kəpons, rə rənes dɛ yi kəyɛr yɛr.

¹³ kotȧy-e Kuru kɔnɔ mə yɔ məpanth rokor ka nu kȧmȧ nə yema-e, ɔwa nə kȧl lasər mȧselɔ mɔŋ məfinɔ.

¹⁴ Yɔ nu tȧy o tȧy yi kəte fɔfəthanɛ dɛ yi kəte pɛnsanɛ;

¹⁵ kȧmȧ nə gbəli yi apaŋi tȧy, kəte ba məthɛkɛ, mɔ aŋwuth ŋa Kuru aŋa te ba apora kətɔŋ ka rəkomra rəgbərəfanɛ dɛ yi rəkənɛ-e, ɔwa nə yi tə kəgbɛntha kətɔŋ ka ŋaŋ mɔ ɛmothȧ nɔru.

¹⁶ Wop nu ȧsim ta aŋesəm gbaŋ, kȧmȧ i gbəli ba tȧy təkolonɛ ka ȧŋrey ŋa Krayst kəpa ye, i la hɛ gbukɛ kətiŋ, thalɔm i la hɛ yɔ məpanth fu fa fu.

¹⁷ Yao, hali i yi sathka ta kȧlanɛ ka nu, i ba ti məbɔnɛ, ka i yasanɛ rɛ məbɔnɛ dɛ yi nia bɛ.

¹⁸ Yaŋ sɔ sel nu məbɔnɛ, ɔwa ba nu məyanthənɛ dɛ yi minɛŋ.

¹⁹ Kɛrɛ i gbak ȧmerȧ ka ɔMarki Yisɔs tə kəyeŋk som Timɔthi do rɔnu, kȧmȧ i gbəli ba kəbɛfəth kətal, ma i tȧrȧ mayi ma nu.

²⁰ Ȧtesoma-e i ba hɛ wuni lɔm ɔwe ba ȧmerȧ awunɔŋ mɔ kɔnɔ, ɔwe ba sɔ asoli ta ȧtȧ nu.

²¹ Pəkasifɛ wuni o wuni ɔ thɛns gbo aŋyɛthɛ ŋɔŋ, ɔ nanɛ hɛ ta mȧtȧy ma Yisɔs Krayst.

²² Kɛrɛ nə tȧrȧ Timɔthi, ko wuni mɔ yi, kəpa-e mɔ mə ɔwan mɔ yɔna ɔkas, ya sɔ mɔ yɔna mi, ka kabasər ka mapanth ma ȧkɛra kəfinɔ ka Kuru.

²³ Tiyȧŋ i gbak ȧmerȧ tə kəyeŋk som kɔ do rɔnu, ma i poŋ tȧrȧ to pə ba kəyi yi minɛŋ.

²⁴ Kɛrɛ i pələnɛ ka ɔMarki kəpa minɛŋ, i ti gbəli yeŋk der do rɔnu.

²⁵ Kɛrɛ i nəŋka ti ɔfinɔ tə kəsom Ɛpafroditɔs do rɔnu ka-ake, ɔwe mə yi ɔwɔnt mi, yi ɔkos mi ka mapanth dɛ yi katim, kɔ yi sɔ usom ta ȧtȧ nu, ɔwe po yɔna mi ka kate ba kȧmi.

²⁶ Kȧbi ɔ ba kiro ta ȧtȧ nu bɛ, ka pə sɔmpa kɔ rə ȧmerȧ kotȧy-e nə po təl kəpa ɔ tuy.

²⁷ Ȧtesoma-e ɔ la tu ɔbaki yathi, kɔ bun fi, kɛrɛ Kuru ɔ ba kɔ ȧney; ɔwa pə yi hɛ kɔn son, kɛrɛ minɛŋ sɔ, kȧmȧ i te ba ɔnɔsinɛ rokɔm ka ɔnɔsinɛ.

²⁸ Tiyȧŋ i fela tə kəsom kɔ do rɔnu, kȧmȧ ma nə nənk kɔ sɔ-e, nə tə ba məbɔnɛ, dɛ yi kȧmȧ ɔnɔsinɛ ɔ mi ɔ gbəŋkɛ.

²⁹ Malanɛ kɔ nu ka ɔMarki yi məbɔnɛ; ɔwa lȧmbe nu wuni wunɔŋ,

³⁰ pəkasifɛ ta salata mȧpanth ma Krayst ɔ bun fi, kɔ sikɛ hɛ ta aŋesəm ŋɔŋ, tə kəgbenthis kayɔna ka nu do rɔmi.