Mȧyɔs ma aŋsom 9 - Ȧŋlemrȧnɛ Ȧfu

¹ Ka Sɔl-əŋ ɔ ŋesəmnɛ ras kəgbind yi kədifəth ka aŋfəm ŋa Kuru, kɔ kɔnɛ ka ɔfode ubana,

² ɔ tholir kɔ ɛreka tə kəkɔ ro Damaskɔs ka ɛseth ɛgbanɛ, kama-e, bepi ɔ fir ri wuni o wuni ɔwe yi ka aRoŋ-e, pə yi afəm aruni-o, afəm abom-o, ɔ kȧrȧ ŋa asekəth ro Yerusalɛm.

³ Ma ɔ yi ka ȧŋbiyas-e, ɔ fatər ro Damaskɔs-e, kəwalɛ ka məsembu kəwur ka ȧkuru kə gbɛnthar kɔ.

⁴ kɔ fumpɔ ro thɔf, ɔ təlȧ rim ara fɔfȧnɛ kɔ, rə pa, Sɔl, Sɔl, kɔyɛŋ mȧ mə sɔmpa mi-e?

⁵ kɔ pa, Mun kanɛ-e Pa? Ka ɔMarki ɔ pa, Minɛŋ Yisɔsȧŋ ɔwe mə sɔmpa.

⁶ Ɔwa rə kəyɛr yi kəkabanɛ ɔ pa, Mariki ko mə yema i yɔ-e? Ka ɔMarki ɔ pa, Yokanɛ, wɔŋ ro pet, ɔwa a tə tɔri mu ȧte mə ba kəyɔ.

⁷ Ɔwa aŋfəm aŋa yi ka ȧŋbiyas yi kɔnɔ aŋ təmȧ, aŋ gbəli hɛ fɔf maŋ təl ȧrim kɛrɛ aŋ nənk hɛ wuni.

⁸ Ka Sɔl-əŋ ɔ yokanɛ ro thɔf; ɔwa ma a kanthi ɛfɔr yɔŋ-e, ɔ gbəli hɛ nənk. Ka a wop kɔ kȧta, a kera kɔ ro Damaskɔs.

⁹ kɔ ba mərey məsas ɔ nənk hɛ, ɔ di hɛ, ɔ mun hɛ.

¹⁰ Ɔwa ukarande ulɔm ɔ yi ro Damaskɔs, a bont kɔ Ananayas, ka ɔMarki ɔ kanɛ kɔ rə mərey, Ananayas, kɔ wosa ɔ pa, ƆMariki minɛ ɔwe.

¹¹ Ka ɔMarki ɔ pa ro ŋɔŋ, Yokanɛ, mə kɔ ka aroŋ ara a bont Toloŋ, mə yif ka ȧŋseth ŋa Yudas ta ukin a bont Sɔl, wuni ka ro Tarsɔs, kotȧy-e ɔ ramnɛ.

¹² kɔ po nənk rə mərey ulaŋgba ɔwe a bont Ananayas ɔ wɔŋ, ɔ reŋ kɔ mȧta mɔŋ kȧmȧ ɔ kȧl sɔthɔ kakəli kɔŋ.

¹³ Ka Ananayas ɔ pa, Pa, i po təl rə afəm agbȧthi ta ɔlaŋgba ɔwe, ta maləs məgbathi ama ɔ yɔ aŋsəm a mu ro Yerusalɛm.

¹⁴ Ɔwa hali anɔ ɔ ba afɔsɔ kəwur ka aŋkərbomp kətɔŋ ka aŋfode tə kəsek ŋa bɛ aŋa mə ramnɛ ka ȧŋes a mu.

¹⁵ Kɛrɛ ɔMarki ɔ pa ro ŋɔŋ, Kɔnɛ, kotȧy-e ɔ yi rəka rəthith ta ȧtȧ mi, tə kəkera ȧŋes a mi rodi ka tȧbona təlɔm, yi abȧy, yi aŋwuth ŋa Isrɛl.

¹⁶ kotȧy-e i ti tɔri kɔ mȧtȧy məgbathi ama ɔ ba tə kənakasi salata ȧŋes a mi.

¹⁷ Ka Ananayas ɔ kɔnɛ, ɔ wɔŋ ka ȧŋseth, kɔ reŋ kɔ mȧta mɔŋ, ɔ pa, Wɔnt mi Sɔl, ɔMarki, pə yi mɔ Yisɔsȧŋ ɔwe mə nənk ro roŋ ka kȧder ka mu, ɔ som mi kȧmȧ mə sɔthɔ kakəli ka mu, yi kȧmȧ a lasər mu ɔYina məsəm.

¹⁸ Ɔwa ka ɔlɛmp wati pə yi mɔ ɛkɛmpitha ɛ wur ka ɛfɔr yɔŋ, ɔwa ɔ sɔthɔ kakəli kɔŋ, ka a yokanɛ, ka a baftays kɔ.

¹⁹ Ɔwa ma ɔ po di-e, ɔ sɔthɔ afɔsɔ. Kɔ ba mərey məlɔm yi aŋkarande ro Damaskɔs.

²⁰ Ka ɔlɛmp wati ka ɛseth ɛgbanɛ ɔ taməs Yisɔs, kəpa ɔ yi ɔWan ka Kuru.

²¹ Ɔwa aŋfəm bɛ aŋa təlȧ kɔ aŋ kabanɛ, aŋ pa, Kɔn tha ɔwe ɔwe dim ŋaŋ aŋa ramnɛ ka ȧŋes aŋe ro Yerusalɛm-i? kɔ der sɔ nɔ ta ȧtȧy tin tati, kȧmȧ ɔ kera ŋa asekəth rodi ka aŋkərbomp kətɔŋ ka aŋfode.

²² Kɛrɛ Sɔl-əŋ ɔ bȧr sɔthɔ afɔsɔ, kɔ fikthanɛ aŋYuda aŋa yirȧ ro Damaskɔs ma ɔ tɔri kəpa ɔwe-əŋ ɔ yi ɔKrayst.

²³ Ɔwa ma mərey məlai mə po thas-e, aŋYuda aŋ nəŋkanɛ tə kədif kɔ;

²⁴ kɛrɛ Sɔl-əŋ ɔ sɔthnɛ ta kasəth ka ŋaŋ. Ka aŋ bumər tadare ta kȧpet pali gbɛs-əŋ kȧmȧ aŋ gbəli dif kɔ.

²⁵ Ka aŋkarande aŋ gbasi kɔ tȧtȧk, aŋ bot kɔ rə kəbəlai, kaŋ thora kɔ ka anthatha.

²⁶ Ma Sɔl-əŋ ɔ der ro Yerusalɛm-e, ɔ yema kulunɛ yi aŋkarande, kɛrɛ ŋa bɛ aŋ nesa kɔ, aŋ lanɛ hɛ kəpa ɔ yi ukarande.

²⁷ Kɛrɛ Barnabas ɔ gbasi kɔ, ɔ kȧrȧ kɔ ka aŋsom, ɔ lɔma ŋa to ɔ po nənk ɔMarki ro roŋ, dɛ yi to ɔMarki ɔ po fɔfȧnɛ kɔ, ɔwa kəpa ɔ po kawandi rə kəmintha ro Damaskɔs ka ȧŋes ŋa Yisɔs.

²⁸ kɔ yi rɛ yi ŋaŋ, ɔ wɔŋ, ɔ wur ro Yerusalɛm,

²⁹ ɔwa ɔ fɔf rə kəmintha ka ȧŋes ŋa ɔMarki Yisɔsȧŋ, kɔ thoŋka yi aŋYuda aŋa a kom ro Kris; kɛrɛ ŋaŋ, aŋ thɛns tə kədif kɔ.

³⁰ Ɔwa ma aŋwɔnt aŋ tȧrȧ ti-e, aŋ kera kɔ ro Sisaria, kaŋ somra kɔ ro Tarsɔs.

³¹ Ka aŋchɔch ro Yudia, ro Kalili yi ro Samaria aŋ ba məthɔfəl, ɔwa aŋ sɔthɔ kəbaksər. Ɔwa maŋ kɔth ka ranes ra ɔMarki yi ka kȧbɛfəth ka ɔYina məsəm-e, aŋ bȧrnɛ.

³² Ka pə re yi ma Pitaŋ ɔ kɔth kɔth ka mȧgbȧp bɛ-e, ɔ der kori aŋsəm aŋa yirȧ ro Lida.

³³ kɔ bəp ri wan duni ulɔm, ȧŋes ŋɔŋ ŋə yi Iniyasȧŋ, ɔwe po fənthȧ təren tȧmthərɛsas, ɔ ba məthanthaŋ.

³⁴ Ka Pitaŋ ɔ kanɛ kɔ, Iniyas, Yisɔs Kraystȧŋ ɔ yenkəs mu. Yokanɛ mə bɛmpa kafənt ka mu. Kɔ yokanɛ ka ɔlɛmp wati.

³⁵ Ka ŋa bɛ aŋa yirȧ ro Lida yi ro Seron aŋ nənk kɔ, kaŋ lafthɛ ka ɔMarki.

³⁶ Ukarande ulɔm ɔ yirȧ ro Yɔpa, ȧŋes ŋɔŋ ŋə yi Tabitha, aŋa a tepa kəpa Dɔkas; ɔya ɔwe ɔ la məyɔs məfinɔ yi kəboya kəbana.

³⁷ Ka pə re yi ka marey mati, rətu rə wop kɔ, kɔ fi. Ɔwa ma a po bukɔ kɔ-e, a bot kɔ ka ȧkonko ka ȧŋseth rokɔm.

³⁸ Ma kaLida kə yi ɔfati yi ro Yɔpa-e, ɔwa aŋkarande aŋ təl kəpa Pitaŋ ɔ yi ri-e, aŋ som alaŋgba ŋarəŋ ro ŋɔŋ, aŋ nɛmthɛnɛ kȧmȧ ɔ te linsa tə kəder ro ŋaŋ.

³⁹ Ka Pitaŋ ɔ yokanɛ ɔ kɔnɛ yi ŋaŋ. Ɔwa ma ɔ bek-e, aŋ gbepa kɔ ka ȧŋseth rokɔm. Ambora bɛ aŋ təmȧ kɔ rayɛr, aŋ bok, kaŋ tɔri kɔ ȧsuma yi ɛlopra ɛyɛ Dorkas ɔ bɛmpa ma ɔ yi yi ŋaŋ.

⁴⁰ Ka Pitaŋ ɔ wurɔ ŋa bɛ kɔ sɔ təwu, ɔ ramnɛ; kɔ lafthɛ ka kabel, ɔ pa, Tabitha, yokanɛ. Kɔ kanthi ɛfɔr yɔŋ; ɔwa ma ɔ nənk Pitaŋ, ɔ yirȧ.

⁴¹ kɔ sɔŋ kɔ kȧta kɔŋ, kɔ yokanɛ. Ma ɔ po tela aŋsəm yi ȧŋbora-e, ɔ laŋklia ŋa kɔ ukəli.

⁴² Ma ȧtȧy ȧte tə gbanthɛnɛ ro Yɔpa-e, afəm agbȧthi aŋ lanɛ ka ɔMarki.

⁴³ Ka Pitaŋ ɔ yirȧ ro Yɔpa mərey məgbathi ka ȧŋseth ŋa Saymɔn ɔkaraŋke.