Mȧyɔs ma aŋsom 8 - Ȧŋlemrȧnɛ Ȧfu

¹ Ka Sɔl-əŋ ɔ ba dim din yi ŋaŋ ta kadif kɔ. Ɔwa ka ȧŋlɔkɔ ŋati athalər abana aŋ təp ro Yerusalɛm ka aŋchɔch. Ka ŋa bɛ aŋ sakanɛ ro Yudia yi ro Samaria, thambe aŋsom.

² Ka afəm aruni aŋa bȧtho Kuru aŋ maŋk Stifɛn-əŋ, kaŋ bok kɔ kəbok kəbana.

³ Kɛrɛ Sɔl-əŋ ɔ thalər aŋchɔch, ɔ wɔŋ rə aseth o seth, ɔ lins aŋfəm aruni yi aŋfəm abɛra, kɔ wɔŋȧ ŋa ka ȧŋseth ŋa tərəŋka.

⁴ Tiyȧŋ ŋaŋ aŋa sakanɛ aŋ kɔnɛ kətɔri ȧrim-əŋ dɛr o dɛr.

⁵ Ka Filip ɔ thor ka kȧpet ka Samaria, ɔ taməs Krayst ro rɔŋaŋ.

⁶ Ɔwa aŋfəm aŋ malanɛ mȧtȧy ama Filipȧŋ ɔ fɔf rə ȧmerȧ ŋin, maŋ təl-e, aŋ kȧl nənk ɛmisali ɛyɛ ɔ yɔ.

⁷ kotȧy-e akərəfi aləs aŋ wur rə kəsel ɛrɔŋ ka agbȧthi aŋa ba ŋa; ɔwa ɔ yenkəs afəm agbȧthi aŋa ba məthanthaŋ yi aŋa yi atətkɛ.

⁸ Ɔwa məbɔnɛ məbana mə yi ka kȧpet kati.

⁹ Kɛrɛ ulaŋgba ulɔm ɔ yi ri, ȧŋes ŋɔŋ ŋə yi Saymɔn, ɔ la thupəs, ɔ yɔ kȧmȧ aŋfəm ŋa ro Samaria aŋ kabanɛ, kɔ kolonɛ kəpa kɔnɔ ɔ yi wuni bana.

¹⁰ Ka ŋa bɛ aŋ sua kɔ ɛləns kətəp ka ɔlɔl haŋ ka ɔbana, aŋ pa, Ɔlaŋgba ɔwe ɔ yi aŋfɔsɔ abana ŋa Kuru.

¹¹ kaŋ sua kɔ ɛləns pəkasifɛ ɔwoni thɔŋ ɔ yɔ ŋa aŋ kabanɛ yi kathupəs kɔŋ.

¹² Kɛrɛ maŋ lanɛ Filipȧŋ, mɔ mɔ tɔri ŋa ta ȧkɛra kəfinɔ ka rȧbȧy ra Kuru-e, yi ta ȧŋes ŋa Yisɔs-e, a baftays ŋa, runi-ŋaŋ yi bom-ŋaŋ.

¹³ Ɔwa Saymɔnȧŋ, kɔnɔ sɔ ɔ lanɛ; ɔwa ma a baftays kɔ-e, ɔ tiyȧ yi Filipȧŋ, kɔ kabanɛ ma ɔ nənk ɛmisali yi mȧtȧy məkabanɛ ama yɔnɛ.

¹⁴ Ɔwa ma aŋsom aŋa yi ro Yerusalɛm aŋ təl kəpa aŋSameriya aŋ po malanɛ ȧrim ra Kuru-e, aŋ som Pitaŋ yi Yɔnȧŋ ro rɔŋaŋ.

¹⁵ Ɔwa ma aŋe aŋ po der-e, aŋ ramnɛ ta ȧtȧ ŋaŋ kȧmȧ aŋ sɔthɔ ɔYina məsəm,

¹⁶ kotȧy-e ɔ tha thorər hɛ ukin ka ŋaŋ; a po gbo baftays ŋa ka ȧŋes ŋa ɔMarki Yisɔs.

¹⁷ Ka Pitaŋ yi Yɔnȧŋ aŋ rend ŋa mȧta maŋ, kaŋ sɔthɔ ɔYina məsəm.

¹⁸ Ɔwa ma Saymɔnȧŋ ɔ nənk kəpa rə kərend mȧta ma aŋsom a sɔŋ ɔYina məsəm-e, ɔ taka ŋa akala,

¹⁹ kɔ pa, Sɔŋ mi aŋfɔsɔ aŋe kȧmȧ pə yi wuni o wuni ka ɔwe mə i reŋ mȧta ma mi-e, ɔ tə sɔthɔ ɔYina məsəm.

²⁰ Kɛrɛ Pitaŋ ɔ kanɛ kɔ, Kaŋka aŋkala ȧferȧ a mu aŋ dinɛ yi munɔŋ-e, pəkasifɛ mə nanɛ tə kəsɔthɔ ȧŋboya ŋa Kuru yi akala.

²¹ Mə ba hɛ ȧgbȧp thalɔm ani ka ȧŋpa aŋe, kotȧy-e ȧŋmerȧ a mu aŋ yi hɛ alompi rodi ka Kuru.

²² Tiyȧŋ thupi ta maləs ma mu ame, nɛmthɛnɛ Kuru, kȧmȧ bepi pə gbəli yi-e, ɔ tə tera mu ȧŋnanɛ ŋa ȧŋmerȧ a mu.

²³ kotȧy-e i nənk kəpa mə yi ka ɔroŋkəth wa kȧtut yi ka ɔsekəranɛ wa mȧləs.

²⁴ Ka Saymɔn ɔ pa, Na bɛ, nɛmthɛnɛ nu Kuru ta ȧtȧ mi, kȧmȧ mȧtȧy ama nə pa mə te wop mi.

²⁵ Ɔwa ŋaŋ-e, maŋ po sɔŋ məseri, dɛ yi aŋ po fɔf ȧrim ra ɔMariki-e, aŋ kȧlanɛ ro Yerusalɛm, kaŋ tɔri ȧkɛra kəfinɔ rə təgbɔm təgbȧthi ta aŋSameriya.

²⁶ Ka ɔmaleka ka Kuru ɔ fɔfȧnɛ Filipȧŋ ɔ pa, Yokanɛ, mə kɔ ka aŋdiyɔ, mə lomanɛ ka aroŋ ara wur ro Yerusalɛm kəkɔ ro Kesa, ka aŋwula.

²⁷ kɔ yokanɛ ɔ kɔnɛ. Ɔwa kəla, uthem ka ro Ithiyopiya, ulaŋgba ugbai ɔwe ba afɔsɔ abana roratha ka Kandasɛŋ, ɔbȧy ubɛra ka ro Ithiyopiya, ɔwa ɔ yi ɔbɛnɛ ka ɛyɛt yɔŋ ɛbaki mɔlɔ, ɔ po der ro Yerusalɛm tə kəbatho.

²⁸ kɔ yi ka kakalanɛ kɔŋ, ɔ yirȧ ka aŋkik ŋɔŋ, ɔ karaŋ ȧkȧfȧ ka ɔnȧbi Isaya.

²⁹ Ka ɔYina ɔ kanɛ Filipȧŋ, Kɔ fatər aŋkik aŋe kȧmȧ nə taŋanɛ.

³⁰ Ka Filip ɔ gbukɛ, ɔ təlȧ kɔ ɔ karaŋ ȧkȧfȧ ka ɔnȧbi Isaya, kɔ yif kɔ, Mə tȧrȧ ȧte mə karaŋ-i?

³¹ kɔ pa, To mə i gbəli thambe wuni lɔm ɔ tɔri mi-a? kɔ nɛmthɛnɛ Filipȧŋ kȧmȧ ɔ gbep ɔ yirȧ rayɛr kɔŋ.

³² Ɔwa ɔdɛr ka mȧgbal məsəm ro ɔ karaŋ ri are, A kera kɔ mɔ kəlɔmɛ tə kəfai; Ɔwa mɔ kəlɔmɛ kəfɛth rodi ka ɔwe ma fon kɔ Yaŋ ɔ te wurɔ dim.

³³ Ka kathoranɛ kɔŋ a nɔy kɔ mamari mɔŋ; Kanɛ mə tɔri ta rȧkomra rɔŋ-e? kotȧy-e a nɔy aŋesəm ŋɔŋ ka ȧdȧru.

³⁴ Ka ɔlaŋgba ugbai ɔ yif Filipȧŋ, ɔ pa, Ɔmari mu, ta kanɛ ɔnȧbi ɔ fɔf ȧte-e? Ta kɔn kɔnɔnɛ ba, thalɔm ta wuni lɔm-i?

³⁵ Ka Filipȧŋ ɔ wɔŋ kəthəksa kɔ, ɔ təp ka mȧgbal məsəm ame, ɔ tɔri kɔ ta Yisɔs.

³⁶ Ɔwa mɔ mə aŋ kɔnɛ ro roŋ-e, aŋ bəp mȧnt məlɔm, ka ɔlaŋgba ugbai ɔ pa, Kəla, mȧnt mi ame, ko mə bɛnt kəbaptais mi-e?

³⁷ Ka Filipȧŋ ɔ pa, Bepi mə lanɛ yi ȧŋmerȧ a mu bɛ-e, mə gbəli. Kɔ wosa, ɔ pa, I lanɛ kəpa Yisɔs Krayst ɔ yi ɔWan ka Kuru.

³⁸ kɔ yamari kȧmȧ aŋkik aŋ təmȧ soŋ, ka ŋa ŋarəŋ aŋ thor ro mȧnt, Filipȧŋ yi ɔlaŋgba ugbai, kɔ baftays kɔ.

³⁹ Ɔwa maŋ wur ro mant-e, ɔYina ka ɔMarki ɔ yɔ kȧmȧ Filipȧŋ ɔ dinɛ kɔ, ka ɔlaŋgba ugbai ɔ nənk hɛ kɔ sɔ; kɔ kɔnɛ yi kəsel məbɔnɛ.

⁴⁰ Kɛrɛ a bəp Filipȧŋ ro Asotɔs. Ɔwa ɔ thas kətɔri ȧkɛra kəfinɔ ka tapet bɛ haŋ ɔ bek ro Sisaria.