Mȧyɔs ma aŋsom 4 - Ȧŋlemrȧnɛ Ȧfu

¹ Ɔwa maŋ fɔfȧnɛ aŋfəm-e, aŋfode-o, ɔwe yi rȧbomp ka ȧŋseth ŋa Kuru-o, yi aŋSadusi aŋ bəp ŋa,

² ka pə bansȧnɛ ŋa ta maŋ thəksa aŋfəm-e, dɛ yi kətȧŋȧnɛ Yisɔsȧŋ, kȧyokanɛ ka aŋfi.

³ kaŋ wop ŋa mȧwop ma rȧbȧy haŋ pə sɔk, pəkasifɛ ȧŋsum aŋ po thɔŋ wɔŋ.

⁴ Kɛrɛ agbȧthi aŋa təl ȧrim aŋ lanɛ; ɔwa aŋyirka ŋa aŋfəm aruni aŋ yi mɔlɔ ma ɛwul tamath.

⁵ Ka pə re yi ka ȧŋrey alɔm-e, aŋgbəka-o, aŋbȧki-o, yi aŋkarmɔkɔ aŋ thoŋklanɛ dɛr rɔkin ro Yerusalɛm.

⁶ Ka Anas-əŋ, ɔfode ubana, yi Kayafasȧŋ, yi Yɔnȧŋ, yi Alɛksandaŋ, dɛ yi ŋaŋ aŋa yi ka rȧkomra ra ɔfode ubana aŋ bəpər.

⁷ Maŋ po təmər ŋa ratɔŋ-e, aŋ yif ŋa, aŋ pa, Ko afɔsɔ, thalɔm ka ȧŋes areke nə yɔ ȧte-e?

⁸ Ka Pitaŋ ɔ la ɔYina məsəm, ɔ pa ro ŋaŋ, Naŋ agbəka ŋa aŋfəm, yi abȧki ŋa Isrɛl,

⁹ bepi a gbɛlɛŋ su thonɔŋ salata mayɔ məfinɔ a po yɔ ka ulaŋgba ugbɛba, to som ɔ sɔthɔ kəyeŋk mədɛr-e;

¹⁰ ta naŋ bɛ yi aŋfəm ŋa ro Isrɛl bɛ, nə tȧrȧ kəpa, ka ȧŋes ŋa Yisɔs Krayst ɔwe ro Nasarɛth ɔwe nə tȧŋ ka akənt kəpəŋkinɛ-e, ɔwe Kuru ɔ yokas ka rəfi, ka ȧŋes ŋɔŋ gbeŋ ɔlaŋgba ɔwe ɔ təmȧ rodi ka nu uyeŋki mədɛr.

¹¹ Kɔnɔ ɔ yi aŋsar aŋa naŋ atəmər ȧŋseth nə po sai sai, ŋa a po səki rȧbomp ra ȧŋkoŋ.

¹² Ɔwa kakisi kə yi hɛ ka wuni o wuni ulɔm, kotȧy-e, ŋes o ŋes alɔm aŋ yi hɛ ka ȧdȧru are aŋa a sɔŋ kətɔŋ ka aŋfəm ro sə gbəli sɔthɔ kakisi.

¹³ Ɔwa maŋ nənk kamintha ka Pitaŋ yi Yɔnȧŋ, ɔwa aŋ tȧrȧ kəpa aŋ yi hɛ afəm atempi ɔwa aŋ sɔthɔ hɛ kəkaraŋ-e, aŋ kabanɛ; ɔwa aŋ sɔthnɛ kəpa aŋ la yi yi Yisɔs.

¹⁴ Ɔwa maŋ nənk ɔlaŋgba ɔwe a yenkəs ɔ təmȧ yi ŋaŋ-e, aŋ gbəli hɛ sɔ pa koko.

¹⁵ Kɛrɛ maŋ yamari ŋa kȧmȧ aŋ wur ka aŋSanhedrin aŋ nəŋkanɛ,

¹⁶ aŋ pa, To mə sə yɔ aŋfəm aŋe-e, ȧtesoma-e aŋfəm bɛ ro Yerusalɛm aŋ tȧrȧ kəpa tɛntɛnɛ a po yɔ tȧy təkabanɛ ka kȧta ka ŋaŋ, ɔwa saŋ sə gbəli hɛ pɛnsa ti.

¹⁷ Kɛrɛ kȧmȧ tə te bȧr gbanthɛnɛ kətɔŋ ka aŋfəm, maŋ ninisnɛ ŋa nu kȧmȧ aŋ te sɔ fɔfȧnɛ wuni o wuni ka ȧŋes aŋe.

¹⁸ kaŋ tela ŋa, kaŋ yamari ŋa kȧmȧ aŋ te sɔ fɔf thalɔm aŋ thəksa ka ȧŋes ŋa Yisɔs.

¹⁹ Kɛrɛ Pitaŋ yi Yɔnȧŋ aŋ lasi aŋ pa ro rɔŋaŋ, Bepi pə yi ɔlompi rodi ka Kuru tə kətəla nu pəthasi Kuru-e, gbək ti nu;

²⁰ kotȧy-e saŋ sə gbəli gbo fɔf mȧtȧy ama sə po nənk yi ama sə po təl.

²¹ Ɔwa maŋ po bȧr ninisnɛ ŋa-e, aŋ tera ŋa aŋ kɔnɛ, maŋ te fir roŋ ro mə aŋ tȧŋ tə kəsɔmpa ŋa ta ȧŋsabu ŋa aŋfəm, pəkasifɛ aŋfəm bɛ aŋ yikis Kuru ta ȧtȧ po yɔnɛ.

²² kotȧy-e ɔlaŋgba ka ɔwe a yɔ ȧtȧy təkabanɛ ȧte; ɔ bȧk ɔthasi təren təgba tərəŋ.

²³ Ma a tera ŋa-e, aŋ kɔnɛ ka aŋkos ŋaŋ, aŋ kanɛ ŋa bɛ ȧte aŋkərbomp kətɔŋ ka aŋfode yi aŋbȧki aŋ kanɛ ŋa.

²⁴ Maŋ təl ti-e, aŋ ŋata ȧsim taŋ ka Kuru yawin-əŋ, aŋ pa, ƆMariki, munɔ po bɛmpa ȧkuru yi ȧŋthɔf, yi kȧbȧŋ, yi ɛyɛ yi ri bɛ;

²⁵ ɔwe ka ɔYina məsəm ka kȧsəŋ ka ɔkas kȧsu Debidȧŋ ȧŋbɔy a mu, mə pa, To som tȧbona təlɔm tə bansȧ-e? Ɔwa aŋfəm aŋ tȧmtȧmnɛ mȧtȧy məyai-e?

²⁶ aŋbȧy ŋa ȧdȧru aŋ bɛnɛnɛ ɛsəfa, Ɔwa aŋgbəka aŋ thoŋklanɛ dɛr rɔkin, Tə kəŋamnɛ ɔMarki yi ɔKrayst kɔŋ;

²⁷ ȧtesoma-e ka təteŋ ka kȧpet ake pə yi hɛ gbo Hɛrɔdȧŋ yi Pɔntiɔs Paylet son, kɛrɛ təbona təlɔm yi aŋfəm ŋa Isrɛl sɔ, aŋ po thoŋklanɛ tə kəkȧsi Yisɔsȧŋ ȧŋBɔy a mu usəm ɔwe mə po pɔlɔ

²⁸ tə kəyɔ tȧy o tȧy ȧtȧ aŋfɔsɔ yi kȧtȧrȧ ka mu kə botəs thəpaŋ tə kəyɔnɛ.

²⁹ Ɔwa ka-ake ɔMarki, kəli mȧgbind maŋ, ɔwa mar ɛbɔy ɛ mu kȧmȧ aŋ kanɛ mapa ma mu rə kəmintha,

³⁰ ma munɔ mə thanthi kȧta ka mu tə kəyeŋkəs afəm; ɔwa kȧmȧ ɛmisali yi mȧtȧy məkabanɛ mə yɔnɛ salata ȧŋes ŋa ȧŋBɔy a mu usəm Yisɔsȧŋ.

³¹ Ɔwa maŋ po ramnɛ-e, ɔdɛr ro aŋ thoŋklanɛ dɛr rɔkin-e, pə yiŋkthanɛ ri, kaŋ la ɔYina məsəm, ɔwa aŋ fɔf ȧrim ra Kuru rə kəmintha.

³² Ɔwa ȧruniya ara lanɛ rə ba ȧmerȧ ŋin yi afela ŋin; hali wuni kin ɔ pa hɛ ta ɛyɛt yɔŋ ɛyɛ ɔ ba kəpa ɛ yi ɛyɔŋ, kɛrɛ aŋ ba ɛyɛt bɛ ɔthənanɛ.

³³ Aŋsom aŋ seri ta kȧyokanɛ ka ɔMarki Yisɔs rə afɔsɔ abana; ɔwa aboŋa abana aŋ yi rokɔm ka ŋaŋ.

³⁴ Wuni o wuni ɔ yi hɛ kətɔŋ ka ŋaŋ ɔwe paŋ rəka ȧtesoma-e ŋaŋ aŋa ba təkai thalɔm ɛseth aŋ thila yi, kaŋ kȧrȧ amɔlɔ ma ɛyɛt ɛyɛ aŋ thila,

³⁵ ɔwa aŋ bot ŋi ka ȧtȧtək ta aŋsom, kaŋ yerəs rə wuni o wuni mɔlɔ ma kapaŋ kɔŋ kə yi.

³⁶ Ɔwa Yosɛfȧŋ ɔwe aŋsom aŋ sɔŋ ȧŋes ŋa Barnabas, (bepi a tepa ŋi ŋə yi Wan ka kȧBɛfəth), uLifay wɔŋ, wuni ka ro Siprɔs,

³⁷ ma ɔ po thila ȧŋkay ŋɔŋ, ɔ kȧrȧ aŋkala ŋati, ɔ bot ŋi ka ȧtȧtək ta aŋsom.