Mȧyɔs ma aŋsom 27 - Ȧŋlemrȧnɛ Ȧfu

¹ Ɔwa ma a po botəs ti kəpa sə tə bȧkȧ tə kəkɔ ro Itali, a lȧnki Pɔlȧŋ yi antɛndɛbira alɔm ka ukaptin, ȧŋes ŋɔŋ ŋə yi Yuliɔs, ka akobali ka Akɔstɔs.

² Ka sə bȧkȧ rə abil ŋa Adramitiyɔm aŋa yema kɔ ka tabakɛ ta ro Asia, sə wɔŋ ro baŋ bana. Aristarkɔs-əŋ uMasidonia ɔwe ro Thɛsalonika ɔ yi yi saŋ.

³ Ka ȧŋrey alɔm sə bek ro Sidon. Ɔwa Yuliɔs ɔ wop Pɔlȧŋ ɔfinɔ, ɔ ter kɔ tə kəkɔ ka aŋyathki ŋɔŋ kȧmȧ ɔ bȧksər ȧŋdɛr ŋɔŋ.

⁴ Ɔwa ma sə wur ri-e, sə thas ro Saiprɔs rayɛr, pəkasifɛ aŋfef aŋ yi su rodi.

⁵ Ɔwa ma sə po thas kȧbȧŋ ka ro Silisia-e, yi ro Pamfiliya, sə der ro Mira, kȧpet ka ro Lusia.

⁶ Rȧ ɔkaptin ɔ bəp abil ŋa ro Alɛksandria aŋa yema kɔ ro Itali. Kɔ bȧk su ri.

⁷ Ɔwa ma sə po kɔnɛ kəthɛgbɛ mərey məgbathi-e, sə bek ka ɔlomanɛ wa ro Nidɔs yi asɔmpanɛ ɔwa aŋfef aŋ selɔ hɛ su, ka sə thas ro Krit rayɛr kəlomanɛ ro Salmonɛ.

⁸ Ɔwa ma sə kɔnɛ yi asɔmpanɛ sə gbapsa ŋi haŋ sə bek dɛr ɔlɔm, a bont ri kȧBȧkɛ kəfinɔ, ȧke yi ɔfati yi kȧpet ro Laseya.

⁹ Ma alɔkɔ agbȧthi aŋ po thas-e, ɔwa ȧŋbiyas aŋ yi abȧki mədɛr pəkasifɛ ȧŋsum aŋ po thɔŋ thas-e, Pɔlȧŋ ɔ maŋ ŋa.

¹⁰ kɔ pa ro rɔŋaŋ, Pa-ŋaŋ, i nənk kəpa ȧŋbiyas aŋ tə kasara ɔthasər, pə yi hɛ gbo ta akothe yi ȧŋbil-əŋ, kɛrɛ ta ɛŋesəm ɛ su sɔ.

¹¹ Kɛrɛ ɔkaptin ɔ botər ȧmerȧ ka ȧte ɔwe ba ȧŋbil ɔ pa pəthasi ka ȧtȧ Pɔl ɔ pa.

¹² Ɔwa ma kabakɛ kə thiŋkanɛ tə kətia ri haŋ ka ȧŋlɔkɔ ŋa ɔtaŋk-e, agbȧthi aŋ maŋ kȧmȧ aŋ thas ri bepi aŋ gbəli tȧŋ roŋ o roŋ tə kəbek ro Fɛnis kȧmȧ aŋ yi ri ka ȧŋlɔkɔ ŋa ɔtaŋk; kə yi kabakɛ ka ro Krit rayɛr ȧke lomanɛ aŋfef ŋa aŋdiyɔ yi ȧŋmɛrɔ.

¹³ Ɔwa ma aŋfef ŋa aŋdiyɔ aŋ fɛŋ ɔthɔfəl-e, aŋ nanɛ kəpa aŋ sɔthɔ ȧtȧ aŋ yema, aŋ ŋata antumbu ka aŋ kɔ ro Krit rayɛr ɔfati yi aŋgbaŋ.

¹⁴ Kɛrɛ pə won hɛ kədarəŋ kati-e, afef abȧki aŋ wur ri aŋa a bont aŋ Yurakwilo.

¹⁵ Ɔwa ma ȧŋfef aŋ gbip ȧŋbil-e, ɔwa aŋ gbəli hɛ sɔ lomanɛ aŋfef-e, sə ter ŋi kaŋ gbukɛnɛ su.

¹⁶ Ka sə thas rayɛr ka ayel alɔl aŋa a bont Klɔda, ɔwa sə kisis ȧŋbil alɔl yi asɔmpanɛ abana.

¹⁷ Ɔwa maŋ po ŋata ŋi-e, aŋ gbasi nəpɔl kaŋ sek ȧŋbil roratha, maŋ nesa sɔthlɔm aŋ tə gbeta ka ȧŋsənt akor; kaŋ thora ɛbɛla, aŋ kȧl gbukɛnɛ su.

¹⁸ Ma akənkəl kə gboŋkthas su ɔthasər-e, ka ȧŋrey alɔm sə wɔŋ kəfitha atothe ro baŋ.

¹⁹ Ɔwa ka ȧŋrey aŋa bekȧ məsas-e sə fitha yi mȧta ma su gbeŋ ɛgbatɛnɛ ya ȧŋbil.

²⁰ Ɔwa ma aret yi atɔs ɛ te gbɛntha ta mərey məgbathi-e, ɔwa kəŋkəl kəlɔl tha kə derər su-e, kagbak ȧmerȧ bɛ ȧke sə ba tə kəkisi kə kɔnɛ.

²¹ Ma pə won aŋ te di-e, Pɔlȧŋ ɔ təmȧ ŋa ratɔŋ, ɔ pa, Pa-ŋaŋ nə yi naŋ tə kətəla mi, nə te wur ro Krit-e, kȧmȧ nə te sɔthɔ naŋ masibo ame yi aŋkasara aŋe.

²² Ɔwa ka-ake i maŋ nu tə kəbak təbuth, kotȧy-e kəkasara ka aŋesəm kə ba hɛ kəyi kətɔŋ ka nu, kɛrɛ ȧŋbil gbo.

²³ Ȧtesoma-e ɔmaleka ka Kuru ɔwe ba mi, yi ɔwe i bȧtho, ɔ təmȧ mi rayɛr ka rȧtȧtȧk are,

²⁴ ɔ pa, Pɔl, te nesa. Mə ba tə kətəma rodi ka Sisar; ɔwa Kuru ɔ po laŋklia mu aŋa yi ro bil yi munɔ.

²⁵ Tiyȧŋ pa-ŋaŋ, bȧk nu təbuth, kotȧy-e i lanɛ Kuru kəpa pə tə yi mɔ mɔ kanɛ mi.

²⁶ Kɛrɛ a ba kəfitha su rə ayel alɔm.

²⁷ Kɛrɛ ma rȧtȧtȧk ara bekȧ tɔfɔt manlɛ rə bek-e, mɔ mə a gbukɛnɛ su reke o reke ka kȧbȧŋ ka Adriya, mɔlɔ ma kəren datɔŋ aŋlaŋgba ro bil aŋ nanɛ kəpa aŋ fat agbaŋ alɔm.

²⁸ Ɔwa aŋ fak antumbu, kaŋ fir kəpa ɔbɔlɔŋ ɔ yi ɛfatǝm kəgba. Maŋ kɔnɛ ɔthan-e, aŋ kȧl fak antumbu, kaŋ fir ɔbɔlɔŋ tə kəyi ɛfatǝm tɔfɔt tamath.

²⁹ Ɔwa maŋ nesa tə kəgbeta rə məsar rokɔm-e, aŋ fak ɛtumbu yɛrəŋ ka ȧŋbil rarəŋ, kaŋ fela rasɔk.

³⁰ Ɔwa ma aŋlaŋgba ŋa ro bil aŋ yema toŋk ka ȧŋbil-e, aŋ thora ȧŋbil alɔl ro baŋ, aŋ yɔ mɔ aŋ yema fak antumbu ka ȧŋbil rodi.

³¹ Ka Pɔlȧŋ ɔ pa ka ɔkaptin yi antim, Thambe aŋe aŋ tiyȧ ro bil-e, nə gbəli hɛ kisi.

³² Ɔwa antim aŋ gbək nabeŋa na ȧŋbil alɔl, aŋ ter ŋi aŋ fumpɔ.

³³ Ɔwa ma rasɔk rə der-e, Pɔlȧŋ ɔ nɛmthɛnɛ ŋa bɛ kȧmȧ aŋ gbasi da rədi, ɔ pa, Ȧŋrey aŋe ŋə bekȧ nu mərey tɔfɔt manlɛ ma nə wop asum-e, kəte di koko.

³⁴ Tiyȧŋ i nɛmthɛnɛ nu tə kəgbasi da rədi ta kakisi ka nu, kotȧy-e hali rəfon rin rə ba hɛ kədinɛ ka rȧbomp ra ukin o kin ka nu.

³⁵ Ma ɔ po pa ȧte-e, ɔ gbasi kəbo, ɔ muti Kuru mɔmɔ rodi ka ŋaŋ bɛ, ɔ siməth ki, kɔ təp kədi.

³⁶ Ka pə bɔnɛ ŋa bɛ, ɔwa ŋaŋ sɔ aŋ gbasi ra rədi.

³⁷ Saŋ bɛ sə yi ka ȧŋbil-e, mɔlɔ ma afəm tɛmɛ tərəŋ təgba təsas tɔfɔt tamthərukin.

³⁸ Maŋ po di ɔbeki-e, aŋ fəŋfsir ȧŋbil, aŋ fitha ȧpəla ro baŋ.

³⁹ Ma pə sɔk-e, aŋ tɛ hɛ aŋgbaŋ kɛrɛ aŋ nənk rəboŋ rəlɔm ara ba agbaŋ, kaŋ nəŋkanɛ bepi aŋ gbəli wɔŋȧ ri ȧŋbil.

⁴⁰ Maŋ po ŋata ɛtumbu-e, ɔlɛmp wati aŋ səli nabeŋa na ɛkorȧ, kaŋ ŋata ȧŋbɛla rodi ka aŋfef, aŋ lomanɛ aŋgbaŋ.

⁴¹ Kɛrɛ aŋ bek ro təbȧŋ tərəŋ tə gbanɛ-e, ka ȧŋbil aŋ yirȧ ka ȧŋsənt, ɔwa aŋsoth ŋa ȧŋbil aŋ bȧkər kɛrɛ kadarəŋ ka ȧŋbil kə təp kəsimtha salata aŋfɔsɔ ŋa ɛmunkəl.

⁴² Ka antim aŋ pa a yi tə kədifəth antɛndɛbira ta thani ukin ka ŋaŋ ɔ te ŋandəŋ kȧmȧ ɔ kisi.

⁴³ Kɛrɛ ma ɔkurgba ɔkaptin ɔ yema kisis Pɔl-əŋ-e, ɔ bɛnt ŋa tə kəyɔ ȧtȧ aŋ nanɛ, kɔ yamari kəpa ŋaŋ aŋa gbəli ŋandəŋ aŋ mɔtha fithanɛ ro baŋ kȧmȧ aŋ mɔtha bek ro gbaŋ;

⁴⁴ ɔwa aŋa tia-e, alɔm ka ɛbeŋ rokɔm, alɔm ka ɛyɛt ya ȧŋbil. Ɔwa ya pə re yi kəpa ŋa bɛ aŋ kisi ro gbaŋ.