Mȧyɔs ma aŋsom 26 - Ȧŋlemrȧnɛ Ȧfu

¹ Ka Akripaŋ ɔ pa ka Pɔlȧŋ, A po ter mu tə kəfɔfanɛ. Ka Pɔl ɔ thanthi kȧta kɔŋ, kɔ pa,

² Pə bɔnɛ mi ɔbȧy Akripa ma i gbəli fɔfȧnɛ thonɔŋ rodi ka mu ta mȧtȧy bɛ ama aŋYuda aŋ gbanthir mi,

³ pə tha gbethi ma mə tȧrȧ matanɛ yi ɛpa bɛ ɛyɛ yi kətɔŋ ka aŋYuda. Tiyȧŋ, ɔmari mu, sua mi ɛləns rə kəmuyu.

⁴ AŋYuda bɛ aŋ tȧrȧ aŋrusəmȧ a mi kȧbi ka rafɛth ra mi, aŋa yi ka ɔtɔtɔkɔ kətɔŋ ka ȧŋbona a mi ro Yerusalɛm.

⁵ Maŋ tȧrȧ mi kȧbi ka katəp-e, bepi aŋ selɔ tə kəseri ti-e, kəpa i yi uFarisi, i taŋanɛ kagbanth ȧke tha lomp ka andina a su.

⁶ Ɔwa ka-ake i təmȧ nɔ kȧmȧ a thonkas mi ta kagbak ȧmerȧ ka aŋlahiri aŋa Kurɔŋ ɔ sekər aŋkas a su;

⁷ aŋlahiri aŋa ɛbɔnsɔŋ ɛ su tɔfɔt yɛrəŋ aŋ gbak ȧmerȧ tə kəsɔthɔ, mɔ mə aŋ bȧtho Kuru asɔbɛ tȧtȧk yi rəyaŋ. Ɔwa salata kagbak ȧmerȧ ake-e ɔbȧy Akripa ta aŋYuda aŋ gbanthir mi.

⁸ kɔyɛŋ mə nənk ti tȧy tȧŋ yi tətui lanɛ bepi Kurɔŋ ɔ yokas aŋfi-e?

⁹ Tə tɛntɛnɛ min minɛnɛ i la nanɛ kəpa i yi tə kəyɔ tȧy təgbȧthi ȧtȧ yi təpeskɛ yi ȧŋes ŋa Yisɔs ɔwe ro Nasarɛth.

¹⁰ Ɔwa i la sɔ yɔ ȧte ro Yerusalɛm. I bot asəm agbȧthi ka ȧŋseth ŋa tərəŋka ma i po sɔthɔ afɔsɔ kəwur ka aŋkərbomp kətɔŋ ka aŋfode, ɔwa ma a difəth ŋa-e, minɛ i wosa ti.

¹¹ I thalər ŋa ɛlɔkɔ ɛgbathi ka ɛseth ɛgbanɛ, ka i mɛm tə kəyɔ ŋa aŋ ŋanmɛ Kurɔŋ. Ɔwa ma i yi ubaŋ hali ta ȧtȧ ŋaŋ-e, i sɔmpa ŋa haŋ ka təpet tətel.

¹² Tiyȧŋ ma i kɔnɛ ro Damaskɔs-e, i ba afɔsɔ yi aŋyamari ŋa aŋkərbomp kətɔŋ ka aŋfode.

¹³ Ka rəyaŋ-e, ɔbȧy, i nənk ro roŋ kəwalɛ kəwur ka ȧkuru, kəthasi ɔgbɛntha wa aret, kə gbɛntha kəgbətɔ mi yi ŋaŋ aŋa yi yi minɛŋ.

¹⁴ Ma saŋ bɛ sə po fumpɔ ro thɔf-e, i təlȧ rim rə pa ro rɔmi ka akənt ka kaHibru, Sɔl, Sɔl, kɔyɛŋ mȧ mə sɔmpa mi-e? Ɔ tuy tȧy tə kətuŋ akatək ka mu rə təbaŋk.

¹⁵ Ka i pa, Pa, mun kanɛ-e? Ka ɔMarki ɔ pa, Minɛ yi Yisɔs ɔwe mȧ mə sɔmpa.

¹⁶ Kɛrɛ yokanɛ, mə təmȧ ka ȧtȧtək ta mu, kotȧy-e i tɔrinɛ ro rɔmu ta ȧŋsabu aŋe kȧmȧ i səki mu ȧbɔy yi aseri ta mȧtȧy ama mə po nənk ro rɔmi, yi ta mȧtȧy ame i ba kǝ tɔrinɛ ro rɔmu.

¹⁷ I ti kathi mu ka aŋfəm yi ka tȧbona təlɔm, ka aŋa mə i som mu,

¹⁸ tə kəkanthi ɛfɔr yaŋ kȧmȧ aŋ wur ka ȧŋsum, aŋ der ka kawalɛ, kȧmȧ aŋ wur ka aŋfɔsɔ ŋa Sethani kəkɔ ka Kuru, kȧmȧ aŋ sɔthɔ katerɔ ka ɛhakɛ yi kɛŋ kətɔŋ ka ŋaŋ aŋa a səməs rə kəlanɛ mi.

¹⁹ Kɛrɛ ɔbȧy Akripa, i kasi hɛ manəŋk ma ȧŋriyana,

²⁰ kɛrɛ i mɔtha tamər ŋaŋ aŋa yi ro Damaskɔs yi ro Yerusalɛm yi ka ȧŋthɔf a Yuda bɛ, yi ka tȧbona təlɔm sɔ, kȧmȧ aŋ thupi, aŋ fəlɛ ka Kuru, ɔwa aŋ yɔ mapanth ama yi məmari ta kəthupi.

²¹ Ta ȧte aŋYuda aŋ wop mi ka ȧŋseth ŋa Kuru, kaŋ tȧŋ tə kədif mi.

²² Kɛrɛ ma i po sɔthɔ kəmar ȧke wur ka Kuru-e, i təmȧ haŋ thonɔŋ, i seri ka aŋlɔl yi aŋbana kəte pa tȧy o tȧy pəthas ȧtȧ Aŋnȧbi yi Mosis aŋ pa tə ba tə kəyɔnɛ;

²³ kəpa Kraystȧŋ ɔ ba kənȧkȧsi, ɔwa kəpa kɔnɔ ɔ yi ɔtɔtɔkɔ tə kətaməs kawalɛ ka aŋfəm yi ka tȧbona təlɔm kətȧŋȧnɛ ka kȧyokanɛ ka aŋfi.

²⁴ Ma Pɔlȧŋ ɔ gbaki yaŋ-e, Fɛstɔs ɔ pa rə rim rəbana, Pɔl, mə wɔŋ aməl; kȧtȧrȧ ka mu kəbana kə po lȧfthi mu upəŋk.

²⁵ Kɛrɛ Pɔl ɔ pa, I yi hɛ wuni pəŋk, Fɛstɔs ubana, i fɔf gbo sim ta təteŋ yi kətemp.

²⁶ kotȧy-e ɔbȧy ɔ tȧrȧ mȧtȧy ame ka ɔwe i fɔf yi kəmintha. I lanɛ kəpa a maŋk hɛ kɔ mȧtȧy ame, kotȧy-e a yɔ hɛ ma dɛr ɔmaŋknɛ.

²⁷ Ɔbȧy Akripa mə lanɛ Aŋnȧbi? I tȧrȧ kəpa mə lanɛ.

²⁸ Ka Akripa ɔ pa ka Pɔl, Pə tiyȧ gbo ɔthan kathɔnthɔ mi mə tə səki mi naŋ uKristiɛn.

²⁹ Ka Pɔlȧŋ ɔ pa, Kaŋka Kuru-e, pə yi hɛ munɔ gbo son, kɛrɛ ŋaŋ bɛ aŋa təlȧ mi thonɔŋ, kȧmȧ ŋa sɔ aŋ yi mɔ minɛŋ thambe ta atɔrɛntha ȧte.

³⁰ Ka ɔbȧy ɔ yokanɛ, yi ɔgbəka dɛ yi Bɛnisȧŋ, yi ŋaŋ aŋa yirȧ yi ŋaŋ.

³¹ Ɔwa maŋ wur-e aŋ fɔfȧnɛ aŋ pa, Ɔlaŋgba ɔwe ɔ yɔ hɛ tȧy o tȧy ȧtȧ bek tə kədif kɔ thalɔm tə kətand kɔ.

³² Ka Akripaŋ ɔ pa ka Fɛstɔs, A gbəli naŋ ter ɔlaŋgba ɔwe bepi ɔ tha lȧnki hɛ naŋ ȧŋpa ŋɔŋ ka Sisar.