Mȧyɔs ma aŋsom 25 - Ȧŋlemrȧnɛ Ȧfu

¹ Tiyȧŋ Fɛstɔs-əŋ, ma ɔ po der ka anthɔf-e, kədarəŋ ka mərey məsas-e, ɔ kɔnɛ ro Yerusalɛm kəwur ro Sisaria.

² Ɔwa aŋkərbomp kətɔŋ ka aŋfode yi aŋfəm abana ŋa aŋ Yuda aŋ rɔnda Pɔlȧŋ ro ŋɔŋ, kaŋ nɛmthɛnɛ kɔ,

³ kəthola afɛrɛ ta atɔŋ kȧmȧ ɔ som tə kəkara kɔ ro Yerusalɛm, kȧmȧ aŋ səth kɔ, ɔwa aŋ dif kɔ ro roŋ.

⁴ Kɛrɛ Fɛstɔs ɔ lasi kəpa a bɛnɛ Pɔl ro Sisaria, ɔwa kɔn kɔnɔnɛ ɔ tə yeŋk kȧlanɛ ri.

⁵ kɔ pa sɔ, Tiyȧŋ, ta ŋaŋ aŋa gbəli kətɔŋ ka nu aŋ paya mi, kȧmȧ aŋ gbanthir ɔlaŋgba ɔwe, kȧmȧ a tȧrȧ bepi ɔ pɔnthnɛ tȧy o tȧy.

⁶ Ɔwa ma ɔ yi ro rɔŋaŋ ta mərey məthasi tɔfɔt-e, ɔ kȧl thor ro Sisaria, ɔwa ka rabəth rəlɔm ɔ yirȧ ka kawaŋ ka kəthoŋkas, ɔ yamari kȧmȧ a kȧrȧ Pɔl.

⁷ Ma ɔ der-e, aŋYuda aŋa wur ro Yerusalɛm aŋ təmȧ aŋ gbətɔ kɔ, aŋ gbanthir kɔ yi mȧtȧy mələs məgbathi ama aŋ te gbəli bȧksər.

⁸ Pɔlȧŋ ɔ pa ka kagbaki kɔŋ, I pɔnthnɛ hɛ ȧŋthɔ ŋa aŋYuda, thalɔm ȧŋseth ŋa Kuru, thalɔm Sisar.

⁹ Kɛrɛ Fɛstɔs-əŋ, ma ɔ yema sɔthɔ ȧŋes afinɔ ka aŋYuda-e, ɔ lasianɛ Pɔlȧŋ ɔ pa, Mə selɔ tə kəkɔ ro Yerusalɛm kȧmȧ a thonkas mu ri ta mȧtȧy ame rodi ka mi-i?

¹⁰ Kɛrɛ Pɔlȧŋ ɔ pa, Minɛ i təmȧ ka kawaŋ kəthoŋkas ka Sisar rȧ a mar thonkas mi. I tha yɔyɛ aŋYuda tȧy o tȧy ȧtȧ yi tələs, mɔ mȧ munɔ sɔ mə tara-e.

¹¹ Ɔwa bepi minɛŋ i yi wuni ɔwe po yɔ tȧy tələs-e, ɔwa i po yɔ ȧtȧ bek dif-e, i kasi hɛ tə kəfi. Kɛrɛ bepi mȧtȧy ame ama a gbanthir mi mə yi hɛ tateŋ-e, wuni o wuni ɔ gbəli hɛ lȧnki mi ro rɔŋaŋ. I lȧnki ȧŋpa a mi ka Sisar.

¹² Ɔwa ma Fɛstɔsȧŋ ɔ po nənkȧnɛ yi ŋaŋ-e, ɔ pa, Mə po lȧnkəli ȧŋpa a mu ka Sisar; ɔwa ka Sisar rȧ mȧ mə kɔ.

¹³ Kədarəŋ ka mərey məlɔm-e, Akripaŋ ɔbȧy yi Bɛnisȧŋ aŋ der ro Sisaria tə kəkori Fɛstɔs-əŋ.

¹⁴ Maŋ yi ri ta mərey məgbathi-e, Fɛstɔs ɔ tɔri ȧŋpa ŋa Pɔl ka ɔbȧy, ɔ pa, Wuni lɔm ɔ yi ri ɔwe Filiks ɔ tey utand,

¹⁵ ta ɔwe, ka ȧŋlɔkɔ i yi ro Yerusalɛm-e, aŋkərbomp kətɔŋ ka aŋfode yi aŋbȧki ŋa aŋYuda aŋ tɔri mi, ɔwa aŋ yif kȧmȧ i thonkas kɔ.

¹⁶ Ka i lasia ŋa kəpa matanɛ ma aŋRom thahɔ tə kəlaŋkli wuni tə kədif kɔ yeŋka ȧŋgbȧnthir, dɛ yi kɔnɔ ɔwe a gbanthir-e aŋ kəlianɛ, ɔwa ɔ ba afɛrɛ tə kəgbaki ȧŋpa aŋa a reŋ kɔ.

¹⁷ Tiyȧŋ maŋ po thoŋklanɛ nɔ-e i linsa hɛ, kɛrɛ rabəth rəlɔm i yirȧ ka kawaŋ ka kəthoŋkas, ka i yamari kȧmȧ a kȧrȧ ɔlaŋgba.

¹⁸ Ɔwa, ma ȧŋgbȧnthir aŋ yokanɛ, a gbanthir hɛ kɔ ta mȧtȧy mələs mɔ ama i nanɛ,

¹⁹ aŋ ba gbo ɛpa ɛlɔm ya andina ŋaŋ, yi ta Yisɔs ukin ɔwe po fi, ɔwe Pɔlȧŋ ɔ pa ɔ yi ukəli.

²⁰ Ɔwa ma pə sɔkanɛ mi to i yi tə kəgbɛlɛŋ mȧtȧy ame, i yif kɔ bepi ɔ selɔ kɔ ro Yerusalɛm kȧmȧ a thonkas kɔ ri ta mȧtȧy ame.

²¹ Kɛrɛ ma Pɔl ɔ po lȧnki ȧŋpa ŋɔŋ kȧmȧ Akɔstɔs ɔ gbək ŋi-e, i yamari kȧmȧ a bɛnɛ kɔ haŋ i somra kɔ ka Sisar.

²² Akripa ɔ pa ka Fɛstɔs, Minɛŋ gbeŋ, i ba afela tə kətəla ɔlaŋgba. Ka Fɛstɔs-əŋ ɔ pa, Ɔwa ninaŋ mə tə təlȧ kɔ.

²³ Ɔwa ka rabəth rəlɔm, ma Akripa yi Bɛnisȧŋ aŋ der-e rə ayiki abana, aŋ wɔŋ ka ɔdɛr ɔtəl yi aŋkaptin abana, yi aŋfəm abȧki ŋa kȧpet, ka aŋyamari ŋa Fɛstɔs-əŋ, a wɔŋȧ Pɔlȧŋ.

²⁴ Ka Fɛstɔs ɔ pa, Ɔbȧy Akripa yi afəm bɛ aŋa bəpər nɔ yi saŋ, nə nənk ɔlaŋgba ɔwe ta ɔwe ȧruniya bɛ ŋa aŋYuda aŋ nɛmthɛnɛ mi ro Yerusalɛm yi nɔ sɔ, aŋ sela kɔ ɛrɔŋ kəpa pə mar hɛ sɔ ɔ ŋesəm.

²⁵ Kɛrɛ i po fir kəpa ɔ yɔ hɛ tȧy o tȧy ȧtȧ bek tə kədif kɔ. Ɔwa ma kɔn kɔnɔnɛ ɔ lȧnki ȧŋpa ŋɔŋ ka Sisar-e, i botəs tə kəsomra kɔ.

²⁶ Ta atɔŋ i ba hɛ tȧy ta təteŋ tə kəgbalər ɔmarki kȧmi. Tiyȧŋ i kȧrȧ kɔ rodi ka nu, pə tha gbethi munɔ ɔbȧy Akripa, kȧmȧ bepi mə gbɛŋgbɛŋ kɔ-e, i gbəli ba tȧy tə kəgbal.

²⁷ kotȧy-e i nənk ti mɔ apənk tə kəsomra ukɛndɛbira bepi i tɔri hɛ mȧtȧy ama a gbanthir kɔ-e.