Mȧyɔs ma aŋsom 22 - Ȧŋlemrȧnɛ Ȧfu

¹ Awɔnt yi akas, ka-ake su nu ɛləns ka aŋgbaki a mi.

² Ɔwa maŋ təl kəpa ɔ fɔfȧnɛ ŋa ka kaHibru-e, aŋ taŋk. Kɔ pa,

³ Minɛ i yi uYuda, a kom mi ro Tarsɔs ȧke yi ro Silisia, kɛrɛ a rusəm mi ka kȧpet ake ka ȧtȧtək ta Kamaliyɛl, a thəksa mi finɔ mɔ matanɛ məgbenthis ma ȧŋthɔ ŋa aŋkas a su mə yi, ka afela abaŋ aŋ wop mi ta Kuru, hali mɔ mə naŋ nə yi thonɔŋ.

⁴ Ɔwa i sɔmpa ŋaŋ aŋa wop aRoŋ are haŋ hali pə yi tə kədif ŋa, i sekəth ɔwa i lȧnki aŋfəm aruni yi aŋfəm abom kȧmȧ a bot ŋa ka ȧŋseth ŋa tȧrəŋka.

⁵ Hali sɔ ɔfode ubana ɔ tə seri ta ȧtȧ mi, dɛ yi aŋbȧki sɔ; kəwur ro rɔŋaŋ sɔ i sɔthɔ ɛreka ta aŋwɔnt, ka i kɔnɛ ro Damaskɔs tə kəkara ŋaŋ aŋa yi ri ro Yerusalɛm asekəth, kȧmȧ a thalər ŋa.

⁶ Ka pə re yi ma i yi ka ȧŋbiyas a mi, ɔwa i fatər ro Damaskɔs-e, ka ȧŋlɔkɔ ŋa aret kəgbep-e, ɔlɛmp wati kəwalɛ kəbana kəwur ka ȧkuru kəgbɛntha kə gbətɔnɛ mi.

⁷ Ka i fumpɔ ro thɔf, ka i təlȧ rim rə pa ro rɔmi, Sɔl, Sɔl, kɔyɛŋ mȧ mə sɔmpa mi-e?

⁸ Ka i lasi i pa Mun kanɛ-e Pa? kɔ pa ro mi, Minɛ yi Yisɔs ɔwe ro Nasarɛth ɔwe mȧ mə sɔmpa.

⁹ Ɔwa ŋaŋ aŋa yi yi minɛŋ aŋ nənk kəwalɛ tɛntɛnɛ, kɛrɛ aŋ təl hɛ ȧrim ra ɔwe fɔfȧnɛ mi.

¹⁰ Ka i pa, To mə i yɔ-e, Pa? Ka ɔMarki ɔ pa ro rɔmi, Yokanɛ, mə wɔŋ ro Damaskɔs, ɔwa rə mə a tɔri mu mȧtȧy bɛ ama a botȧ mu tə kəyɔ.

¹¹ Ɔwa ma i te gbəli nənk salata aŋyiki ŋa kawalɛ kati-e, ŋaŋ aŋa yi yi minɛŋ aŋ wop mi kəta, ka i wɔŋ ro Damaskɔs.

¹² Ka ulangba ɔwe ba ȧŋes ŋa Ananayas, ɔwe nesa Kuru ka makur ma ȧŋthɔ, ɔ ba ŋes afinɔ kətɔŋ ka aŋYuda bɛ aŋa yirȧ ri,

¹³ ɔ der ro rɔmi, ɔ təmȧ rayɛr kȧmi, kɔ pa, Wɔnt mi Sɔl, kȧl sɔthɔ kakəli ka mu. Ka ȧŋlɔkɔ ŋati gbeŋ i kəli kɔ.

¹⁴ kɔ pa, ƆKuru ka aŋkas a su, ɔ po thith mu tə kətara mȧselɔ mɔŋ dɛ yi tə kənəŋk ɔWuni lompi, ɔwa tə kətəl ȧrim ra kȧsəŋ kɔŋ.

¹⁵ kotȧy-e mə ba kəyi aseri ta atɔŋ ka aŋfəm bɛ-e, ta ȧtȧ mə po nənk yi ȧtȧ mə po təl.

¹⁶ Ɔwa kɔyɛŋ mȧ mə linsa-e? Yokanɛ, yɔ a baftays mu, mə yak ɛhakɛ ɛ mu rə kətela ka ȧŋes ŋa ɔMarki.

¹⁷ Ka pə re yi ma i po kȧlanɛ ro Yerusalɛm-e, ma i ramnɛ ka ȧŋseth ŋa Kuru-e, i wɔŋ rə mərey.

¹⁸ Ka i nənk ɔ pa ro rɔmi, Timonɛ mə wur ro Yerusalɛm lɛmp lɛmp, pəkasifɛ aŋ selɔ hɛ malanɛ maseri ma mu ta ȧtȧ mi.

¹⁹ Ka i pa, Pa, ŋaŋ gbeŋ aŋ tȧrȧ kəpa i bot ŋa ka ȧŋseth ŋa tərəŋka, ɔwa i sap ka ɛseth ɛgbanɛ ŋaŋ aŋa lanɛ mu bɛ.

²⁰ Ɔwa ma a loŋ mȧtir ma Stifɛn aŋseri a mu, minɛ sɔ i təmȧ rayɛr, i selɔ ta ti, ɔwa i bɛnɛ ɛlopra ya aŋa dif kɔ.

²¹ kɔ pa ro mi, Kɔnɛ, ȧtesoma-e i ti som mu ɔbɔli poŋ ka tȧbona təlɔm.

²² Ɔwa aŋ sua kɔ ɛləns haŋ ka ȧrim are, kaŋ ŋata ȧsim taŋ, aŋ pa, Ta a tɔŋa ɔwuni wunɔŋ ka ȧdȧru. Pə mar hɛ ɔ ŋesəm.

²³ Mɔ mə aŋ sɔnkɔ-e, aŋ bus ȧsuma taŋ, aŋ lakəs kabof rokɔm,

²⁴ ɔkaptin ubana ɔ yamari kȧmȧ a kera kɔ ro Barak, ɔ kanɛ ŋa kȧmȧ a gbɛŋgbɛŋ kɔ yi kəsap, kȧmȧ ɔ gbəli tȧrȧ ȧtȧ som a selər kɔ ɛrɔŋ.

²⁵ Ɔwa maŋ po sek kɔ yi nəreka-e, Pɔlȧŋ ɔ pa ka ɔkaptin ɔwe təmȧ rayɛr, Mə ba afɔsɔ tə kəsap wuni ɔwe yi uRom-i ɔwe a te tha sɔŋ mətheri-i?

²⁶ Ma ɔkaptin ɔ təl ȧte-e, ɔ kɔ ka ɔkaptin ubana kɔ kanɛ kɔ, ɔ pa, Botnɛ ka ȧtȧ mȧ mə yɔ-e kotȧy-e ɔlaŋgba ɔwe, uRom wɔŋ.

²⁷ Ka ɔkaptin ubana ɔ der, ɔ yif kɔ, Kanɛ mi, munɔ mə yi uRom-i? kɔ pa, Aŋkɔ.

²⁸ Ka ɔkaptin ubana ɔ pa, I sɔthɔ radure are rə akala abana. Ka Pɔl ɔ pa, Kɛrɛ minɛŋ, a kom mi uRom.

²⁹ Ka ɔlɛmp wati ŋaŋ aŋa yema gbɛŋgbɛŋ kɔ aŋ wur ro ŋɔŋ. Ɔwa ɔkaptin ubana sɔ ɔ nesa ma ɔ tȧrȧ kəpa Pɔlȧŋ ɔ yi uRom, pəkasifɛ a po sek kɔ.

³⁰ Ka ȧŋrey alɔm, ma ɔ yema tȧrȧ tȧteŋ ȧtȧ som aŋYuda aŋ gbanthir kɔ-e, ɔ səli kɔ, ɔwa ɔ yamari aŋfode abana yi aŋSanhedrin bɛ tə kəgbanɛ, kɔ kȧrȧ Pɔlȧŋ, kɔ təmər kɔ rodi ka ŋaŋ.