Mȧyɔs ma aŋsom 20 - Ȧŋlemrȧnɛ Ȧfu

¹ Kədarəŋ ka ma aŋyagba aŋe aŋ poŋ-e, Pɔlȧŋ ɔ som kətela aŋkarande, kɔ bȧkəs ŋa təbuth, ɔ lemnɛ ŋa, kɔ wur ri tə kəkɔ ro Masidoniya.

² Ma ɔ po kɔth kɔth ka ɛgbap ɛye-e, ɔwa ɔ po sɔŋ ŋa ɛmaŋ ɛgbathi-e, ɔ der ro Kris, ro ɔ yirȧ yof ɛsas.

³ Ma ɔ pai tə kəbȧkȧ rə ȧbil tə kəkɔ ro Siriya-e, ɔ fir kəpa aŋYuda aŋ səth kɔ kɔ botəs tə kəkalanɛ ro Masidoniya.

⁴ Ɔwa Sopita ɔwe ro Beriya, Aristarkɔs yi Sɛkɔndɔs ŋa ro Thɛsalonika, Kayɔs ɔwe ro Dabi, yi Timɔthi-əŋ, dɛ yi Tikikɔs yi Trofimɔs ŋa ro Asia sɔ aŋ paya kɔ.

⁵ Kɛrɛ aŋe aŋ təmȧ su kədi, aŋ bɔ kar su ro Troas.

⁶ Ɔwa saŋ sə wur ro Filipay rə abil kədarȧŋ ka amet ma kabo kəpaŋi ɛgbith, ɔwa ka mərey tamath sə bəp ŋa ro Troas, ro sə ba mərey tȧmthədɛrəŋ.

⁷ Ka ȧŋrey ȧtɔtɔkɔ ŋa ȧŋyik, ma sə gbanɛ dɛr rɔkin tə kəsiməth kəbo-e, Pɔlȧŋ ɔ fɔfȧnɛ ŋa, kɔ botəs tə kəkɔnɛ ka ninaŋ, ɔ kȧl bȧsər fɔfȧnɛ ŋa haŋ kəren datɔŋ.

⁸ Ɛmothȧ ɛgbȧthi ɛ yi ka ȧŋkonko rokɔm ro sə po gbanɛ.

⁹ Ulaŋgba ulɔm ɔwe ba ȧŋes ŋa Yutikɔs ɔ yirȧ ka aŋwinda, ka mərey mə bȧk kɔ, ɔwa ma Pɔl ɔ bȧsər gbo kəfɔf-e, mȧrey mə thasər kɔ, kɔ ranthəmɛ, ɔ fumpɔ ro thɔf kəwur ka andɛk aŋa bekȧ ɛsas, ka a gbasi kɔ ufi.

¹⁰ Ɔwa Pɔlȧŋ ɔ thor, ɔ fumpər kɔ, kɔ mampəlanɛ kɔ, ɔ pa, Te nu soli, aŋesəm ŋɔŋ aŋ yi ri ras.

¹¹ Ɔwa ma ɔ kȧl gbep-e, ɔ siməth kabo, ɔ di, ɔwa ɔ kȧl fɔfȧnɛ ŋa ɔwoni haŋ pə sɔk, kɔ kɔnɛ tɛn.

¹² Ɔwa aŋ kȧrȧ ɔlaŋgba ukəli, ka pə bɔnɛ ŋa ɔthasər.

¹³ Kɛrɛ ma saŋ sə təmȧ kədi-e, sə bȧkȧ ro bil tə kəkɔ ro Asɔs, rə sə nanɛ Pɔl ɔ tə bȧkȧ; kotȧy-e ya ɔ botəs ti, kɔn kɔnɔnɛŋ ɔ nanɛ tə kətȧŋ ro gbaŋ.

¹⁴ Ɔwa ma ɔ bəp su ro Asɔs-e, ɔ bȧkȧ, ka sə der ro Mitilinɛ.

¹⁵ Ma sə wur ri-e, ka ȧŋrey alɔm sə bek ro Kiyɔs; ɔwa ka ȧŋrey aŋa tanda-e, ro Samɔs, ɔwa ka ȧŋrey aŋa kȧl tȧndȧ-e, sə bek ro Militɔs.

¹⁶ Ȧtesoma-e Pɔlȧŋ ɔ po botəs ti tə kəthas ro Ɛfisɔs kȧmȧ ɔ te ba kəwon ro Asia; kotȧy-e ɔ timɔnɛ kȧmȧ bepi ɔ gbəli-e, ɔ bek ro Yerusalɛm ka ȧŋrey ŋa Pɛntikɔst.

¹⁷ Ɔwa kəwur ro Militɔs-e, ɔ som ro Ɛfisɔs tə kətela aŋbȧki ŋa aŋchɔch.

¹⁸ Ɔwa maŋ po der ro rɔŋɔŋ-e, ɔ pa ro ŋaŋ, Naŋ nə tȧrȧ katəp ka ȧŋrey ȧtɔtɔkɔ aŋa i wɔŋ ro Asia, to matanɛ ma mi mə yi kətɔŋ ka nu alɔkɔ bɛ,

¹⁹ ma i bȧtho ɔMarki yi ȧmerȧ athoranɛ, yi mantər məgbathi, yi ȧŋsɔmpanɛŋ aŋa ɛyaŋfa ya aŋYuda ɛ kȧrȧ mi;

²⁰ to i te tey tə kətɔri nu tȧy o tȧy ȧtȧ gbəli mar nu, kɛrɛ i thəksa nu gbafəth, ɔwa rə aseth o seth

²¹ i seri ka aŋYuda yi aŋKrik kathupi ka Kuru, yi kȧlanɛ ka ɔMarki kȧsu Yisɔs Krayst.

²² Ɔwa ka-ake, kəla, i kɔ ro Yerusalɛm yi ȧmerȧ asekəranɛ dɛ yi kəte tȧrȧ ȧtȧ ba kəbəp mi ri;

²³ pəthas gbo rə kəpet o pet ɔYina məsəm ɔ seri mi gbafəth kəpa tərəŋka yi ɛsɔmpanɛ ɛ kar mi.

²⁴ Kɛrɛ mȧtȧy ame mə yɔ hɛ i borȧnɛ, ɔwa i gbasi hɛ aŋesəm a mi mɔ rəka rəbaki mɔlɔ ta ȧtȧ mi, kaŋka gbo i gbəli gbanthi ȧŋbara a mi yi məbɔnɛ, dɛ yi mapanth ama ɔMarki Yisɔs ɔ sɔŋ mi, tə kəseri ȧkɛra kəfinɔ ka ȧŋboŋa ŋa Kuru.

²⁵ Ɔwa ka-ake, kəla, i tȧrȧ kəpa na bɛ-e, kətɔŋ ka aŋa i la kɔth kɔth tə kətaməs rȧbȧy ra Kuru-e, nə ba hɛ kənəŋk ader ra mi sɔ.

²⁶ Tiyȧŋ i seri nu thonɔŋ kəpa minɛ i yi ugbəraŋ ka mȧtir ma afəm bɛ.

²⁷ kotȧy-e i la hɛ tey kətɔri nu tȧteŋ ta Kuru Məsaba bɛ.

²⁸ Tiyȧŋ botnɛ nu, ɔwa kȧl tȧmtȧmnɛ ta akuthi bɛ ka aŋa ɔYina məsəm ɔ po bot nu aŋkəlɛnɛ-e, kȧmȧ nə wɔnthər aŋchɔch ŋa ɔMarki aŋa ɔ po wai ka mȧtir mɔŋ gbeŋ.

²⁹ I tȧrȧ kəpa kədarəŋ ka kakɔnɛ kȧmi təthɔlu təbaŋ aŋ tə wɔŋ kətɔŋ ka nu, aŋa mə te ba ȧney ta akuthi.

³⁰ Ɔwa afəm aruni aŋ tə yokanɛ kətɔŋ ka nu gbeŋ, ɔwa aŋ tə fɔf mȧtȧy məkənə kȧmȧ aŋ liŋanɛ aŋkarande.

³¹ Tiyȧŋ bum nu, ɔwa kala nu ɛmerȧ kəpa gbɛs pali-əŋ, mɔlɔ ma təren təsas, i tey hɛ kəmaŋ wuni o wuni yi mantər.

³² Ɔwa ka-ake i lȧnki nu ka Kuru yi ka ȧrim ra ȧŋboŋa ŋɔŋ, ara ba afɔsɔ tə kəbaksər nu, dɛ yi tə kəsɔŋ nu ani kətɔŋ ka ŋaŋ aŋa a po səməs.

³³ I la hɛ fela akala ȧferȧ, abɔŋɔ thalɔm ɛlopra ya wuni o wuni.

³⁴ Naŋ nə tȧrȧ kəpa mȧta ame mə po sɔthɔnɛ ara i yema, yi ta ŋaŋ sɔ aŋa yi yi minɛŋ.

³⁵ I po sɔŋ nu amɔl ka mȧtȧy bɛ, kȧmȧ mɔ mə nə yɔ məpanth mɔ minɛŋ-e, nə yi tə kəmar aŋa te ba afɔsɔ, yi tə kəkala ȧmerȧ ka ȧsim ta ɔMarki Yisɔsȧŋ ma ɔ pa, Kȧsɔŋ kə ba aruba pəthasi kasɔthɔ.

³⁶ Ɔwa ma ɔ po fɔf yaŋ-e, ɔ sɔ təwu, kɔ ramnɛ yi ŋaŋ bɛ.

³⁷ Ɔwa ŋaŋ bɛ aŋ bok kəbok kəbana, aŋ mampəlanɛ kɔ ro lim, kaŋ muməl kɔ.

³⁸ Pə tha nɔsinɛ ŋa bɛ ta ȧsim ȧte ɔ kanɛ ŋa kəpa aŋ ba hɛ kənəŋk ader rɔŋ sɔ. Kaŋ paya kɔ ro bil.