Mȧyɔs ma aŋsom 17 - Ȧŋlemrȧnɛ Ȧfu

¹ Ɔwa maŋ po thas ro Amfipolis yi ro Apoloniya-e, aŋ der ro Thɛsalonika, ro ȧŋseth agbanɛ ŋa aŋYuda aŋ yi.

² Ka Pɔlȧŋ, mɔ mə matanɛ mɔŋ mə yi, ɔ wɔŋ yi ŋaŋ, ɔwa ka ɛsabath ɛsas ɔ fɔfȧnɛ ŋa ta mȧgbal

³ ama ɔ yɛksi gbəraŋ, kɔ tɔri kəpa Krayst a ba tə kənakasi, dɛ yi tə kəkal yokanɛ ka aŋfi. Kɔ pa, Yisɔsȧŋ ɔwe ta ɔwe i tɔri nu, kɔnɔ ɔ yi ɔKrayst.

⁴ Ɔwa ȧruniya rəbana kətɔŋ ka aŋKrik aŋa bȧtho Kuru yi agbȧthi ka aŋkərbomp kətɔŋ ka ŋaŋ aŋa bȧtho Kuru-e, aŋ gbapsa Pɔl yi Sailas-əŋ.

⁵ Kɛrɛ aŋYuda alɔm aŋa te lanɛ, maŋ la kətut-e, aŋ thoŋklanɛ akobali ka alaŋgba ayay, kaŋ fak atotok ro pet. Aŋ tura ȧŋseth ŋa Yesɔn, aŋ thɛns tə kəkara Pɔlȧŋ yi Sailas-əŋ ka aŋfəm.

⁶ Ɔwa maŋ te fir ŋa-e, aŋ te lins Yesɔn yi aŋwɔnt alɔm rodi ka aŋbȧy ŋa kȧpet, kaŋ woŋa aŋ pa, Aŋe-e, aŋa po lȧfthi ȧdȧru, aŋ der nɔ sɔ,

⁷ aŋa Yesɔn ɔ yia; aŋe bɛ aŋ sai ɛthɔ ya Sisar, aŋ pa, Ubȧy ulɔm ɔ yi, Yisɔs ɔkin.

⁸ Ka pə sɔmpa aŋfəm yi aŋbȧy ŋa kȧpet maŋ təl mȧtȧy ame.

⁹ Maŋ po sɔthɔ məsɛkɛ ka Yesɔn yi aŋlɔm-e, aŋ ter ŋa aŋ kɔnɛ.

¹⁰ Ka ɔlɛmp wati aŋwɔnt aŋ somra Pɔl yi Sailas-əŋ ro Beriya tȧtȧk. Ŋaŋ mən-e, maŋ bek ri-e, aŋ wɔŋ ka ȧŋseth agbanɛ ŋa aŋYuda.

¹¹ Ɔwa aŋe aŋ yi afəm atal pəthasi ŋaŋ aŋa yi ro Thɛsalonika, kotȧy-e aŋ malanɛ ȧrim yi ɛmerȧ ɛselɔ, aŋ gbɛŋgbɛŋ mȧgbal ma Kuru ȧrey o rey, kȧmȧ aŋ tȧrȧ bepi mȧtȧy ame mə yi tȧteŋ.

¹² Tiyȧŋ agbȧthi kətɔŋ ka ŋaŋ aŋ lanɛ; aŋfəm abom aKrik ayola, yi aŋruni sɔ, agbȧthi gbo.

¹³ Kɛrɛ ma aŋYuda ro Thɛsalonika aŋ təl kəpa Pɔlȧŋ ɔ taməs sɔ ȧrim ra Kuru ro Beriya-e, aŋ der ri sɔ kaŋ pər aŋfəm.

¹⁴ Ka ɔlɛmp wati aŋwɔnt aŋ kera Pɔlȧŋ haŋ ro baŋ, kɛrɛ Sailas yi Timɔthi-əŋ aŋ tiyȧ ri.

¹⁵ Kɛrɛ ŋaŋ aŋa paya Pɔlȧŋ aŋ kɔ haŋ aŋ bek ro Athɛns. Ɔwa maŋ sɔthɔ ayamari ta Sailas yi Timɔthi kȧmȧ aŋ timɔnɛ tə kəder ro ŋɔŋ-e, aŋ kȧlanɛ.

¹⁶ Ɔwa ma Pɔlȧŋ ɔ kar ŋa ro Athɛns-e, ȧŋmerȧ ŋɔŋ aŋ sɔmpa kɔ ma ɔ nənk kȧpet kə la yɛt ɛpathəs.

¹⁷ kɔ fɔfȧnɛ aŋYuda ka ȧŋseth agbanɛ yi aŋfəm alɔm aŋa bȧtho ri, yi aŋfəm aŋa ɔ bəp ka ɔdɛr ɔthila ȧrey o rey.

¹⁸ Ka aŋfəm atempi alɔm, aŋƐpikurian yi aŋStoik aŋ bəp kɔ. Alɔm aŋ pa, To wuni thɛlma ɔwe ɔ yema pa-e? Aŋlɔm aŋ pa, Pə yi mɔ ɔ tam ta aturu tətel, pəkasifɛ ɔ tɔri ta Yisɔsȧŋ yi kȧyokanɛ ka rȧfi.

¹⁹ kaŋ wop kɔ aŋ kȧrȧ kɔ ro Areopakɔs, aŋ pa, Sə yema tȧrȧ to kəthəksa kəfu ake kə yi, ȧke mȧ mə fɔf-e?

²⁰ kotȧy-e mə kȧrȧ mȧtȧy mətel məlɔm ka ɛləns ɛ su. Tiyȧŋ sə yema tȧrȧ ko mȧtȧy ame mə yi.

²¹ (kotȧy-e aŋAthens bɛ yi aŋtik aŋa yi ri aŋ ba hɛ tȧy tə kəyɔ, thambe tə kəfɔf thalɔm tə kəsu ɛləns ka ȧtȧy təfu).

²² Ka Pɔlȧŋ ɔ təmȧ ka aŋAreopakɔs ratɔŋ, ɔ pa, Na aŋfəm aruni ŋa ro Athɛns, i nənk kəpa nə yi afəm awopəs ɛdina.

²³ Ȧtesoma-e mȧ mȧ i thasəs-e, i kəli ɛyɛt ɛyɛ nə bȧtho, ka i nənk abɛsɛ ro a gbal, TA ƆKURU ƆWE sə TE TARA. Kɔnɔ ɔwe nə bȧtho kəte kɔ tȧrȧ, kɔnɔ kati mə i tɔri nu.

²⁴ ƆKuru ɔwe bɛmpa ȧdȧru yi koko bɛ ara yi ri, ma kɔnɔ ɔ yi ɔMarki ka ro riyana yi ȧdȧru, ɔ yirȧ hɛ rə ɛseth ɛramnɛ ɛyɛ a bɛmpa yi məta;

²⁵ thalɔm a ba hɛ kəyɔna kɔ yi mȧta ma afəm, tə kəyi mɔ ɔ paŋ rəka, ma pə yi kɔn kɔnɔnɛ ɔ sɔŋ bɛ ɛŋesəm, yi aŋesəm yi ɛyɛt bɛ.

²⁶ kɔ bɛmpa ka mətir min tȧbona ta aŋfəm sɛŋk kȧmȧ aŋ yirȧ ka ȧŋthɔf rokɔm bɛ, kɔ po botəs ŋa ɛlɔkɔ yi tənəŋkəra ta ɔyira wɔŋ,

²⁷ kȧmȧ aŋ thɛns Kuru, bepi aŋ gbəli bɛlbɛla ta atɔŋ tə kəfir kɔ, halisa ɔ bɔlȧnɛ hɛ ukin o kin kȧsu.

²⁸ kotȧy-e, ro rɔŋɔŋ sə ŋesəm, sə borȧnɛ ɔwa sə yi, mɔ mə məgbal məlɔm ma ɔleŋ ka nu mə pa, Saŋ sɔ sə yi rȧkomra rɔŋ.

²⁹ Ɔwa ma sə yi rȧkomra ra Kuru-e, pə mar hɛ sə nanɛ kəpa raKuru rə bȧlȧnɛ mɔ abɔŋɔ thalɔm akala ȧferȧ, thalɔm ȧsar ɛyɛ wuni kəpet mɔ path rə məsɔth yi kȧtemp kɔŋ.

³⁰ Tiyȧŋ Kurɔŋ ɔ paysa ɛfɔr ka ɛlɔkɔ ya kate tȧrȧ, kɛrɛ ka-ake ɔ yamari aŋfəm dɛr o dɛr tə kəthupi.

³¹ Pəkasifɛ ɔ po bot ȧrey ma ɔ ba kəthoŋkas ȧdȧru rə məlompi ka kȧta ka ɔwuni ɔwe ɔ po thith. Ɔwa ɔ po sɔŋ ti məlanɛnɛ ka aŋfəm bɛ ma ɔ po yokas kɔ ka rafi.

³² Maŋ təl ta kȧyokanɛ ka aŋfi-e, alɔm aŋ sel, alɔm aŋ pa, Sə tə sua mu ɛləns sɔ ta ȧte.

³³ Ka Pɔlȧŋ ɔ wur kətɔŋ ka ŋaŋ.

³⁴ Kɛrɛ afəm aruni alɔm aŋ gbapsa kɔ, aŋ lanɛ. Diyonisiyɔs ɔAreyopakait ɔ yi ukin ka ŋaŋ, yi wuni bom, ȧŋes ŋɔŋ ŋə yi Damaris, yi afəm alɔm.